သျှမ်းပြည် ဆီဆိုင်မြို့ကို စစ်ကောင်စီတပ်က လက်နက်ကြီးဖြင့် နေ့စဉ်နီးပါး ပစ်ခတ်မှုကြောင့် မပေါက်ကွဲသေးသည့် စစ်လက်နက်အကြွင်းအကျန်းများ ရပ်ကွက်တိုင်း၌ရှိနေကြောင်း စုံစမ်းသိရသည်။
ဆီဆိုင်မြို့ကို ဇန်နဝါရီလ နောက်ဆုံးပတ်ကတည်းက ပအိုဝ်းအမျိုးသားလွတ်မြောက်ရေး တပ်မတော် PNLA နှင့် ပူးပေါင်းတော်လှန်ရေး အင်အားစုတပ်ဖွဲ့များတို့ တစိတ်တပိုင်းထိန်းချုပ်လာပြီးနောက်ပိုင်း စစ်ကောင်စီသည် မြို့ထဲသို့ လက်နက်ကြီး၊ တင့်ကားဖြင့်ပစ်ခတ်ခြင်းအပါအဝင် ဒရုန်းနှင့်တိုက်လေယာဉ်ဖြင့် ဗုံးကြဲတိုက်ခိုက် ခြင်းများ ပြုလုပ်နေလျက်ရှိကြောင်း သိရသည်။
ထိုကဲ့သို့ အပြင်းအထန် တိုက်ခိုက်မှုခြင်းကြောင့် ဆီဆိုင်မြို့သည် မြို့ပျက်ကြီးသဖွယ် နေအိမ်၊ အဆောက်အဦးနှင့် ဘုန်းကြီးကျောင်း အများအပြားပျက်စီးသွားအပြင် ရပ်ကွက်တိုင်းတွင် မပေါက်သေးသည့် မိုင်းများ၊ ဗုံးသီးများလည်း ကျန်ရှိနေကြောင်း PNLO ၏ပြန်ကြားရေးတာဝန်ခံတစ်ဦးက ပြောသည်။
“ဟုတ်ကဲ့ပါ။ မြို့ထဲမှာတွေ့နေရတဲ့ ဗုံးသီးတွေက စစ်ကောင်စီဘက်က ပစ်လိုက်တဲ့လက်နက်ကြီးပါ။ ဒီဗုံးသီး တွေကရပ်ကွက်တိုင်းမှာရှိပါတယ်။ ပြီးတော့ မိုင်းထောင်ထားတွေလည်း ရှိတယ်။ မပေါက်ကွဲသေးတဲ့ မိုင်းတွေ အများကြီးရှိတယ်” ဟု ၎င်းကပြောသည်။
အဆိုပါ မပေါက်ကွဲသေးသည့် စစ်လက်နက်အကြွင်းအကျန် ပစ္စည်းများကြောင့် ဧပြီလ ၁ ရက်တွင် ဆီဆိုင်မြို့ထဲသို့ ပြန်သွားသည့် ဒေသခံအမျိုးသား ၁ ဦး မိုင်းနင်းမိပြီး ခြေထောက်ဖြတ်လိုက်ရသည်။
လက်ရှိတွင် ဆီဆိုင်မြို့မြောက်ဘက်ခြမ်းကို စစ်ကောင်စီတပ်ဖွဲ့နှင့် ပြည်သူ့စစ် PNO တို့က ထိန်းချုပ်ထားပြီး တောင်ဘက်ခြမ်းကိုတော့ ပအိုဝ်းအမျိုးသား လွတ်မြောက်ရေးတပ်မတော် PNLA နှင့် ပူးပေါင်းတော်လှန်ရေး အင်အားစုတပ်ဖွဲ့များက ထိန်းချုပ်ထားခြင်း ဖြစ်သည်။
“အခုဆီဆိုင်မြို့ထဲကို စစ်ကောင်စီဘက် ဝင်ခွင့်ပြုထားတယ်။ တရားဝင်ကြေညာထားတော့ မရှိဘူး။ သူတို့လူတွေနဲ့ ညှိပြီးဝင်ခွင့်ပြုထားတယ်။ အခုတလောကတော့ တစ်ယောက်ပြီးတစ်ယောက် ဝင်ပြီး ပစ္စည်းသယ်ယူနေကြတာပဲ။ တစ်ချို့က အိမ်ကို ပြန်ကြည့်တာ။ တချို့ကျမီးထဲမပါသွားတဲ့ ပစ္စည်းတွေပြန်သုံးလို့ ရမလားဆိုပြီး သယ်နေကြတာ” ဟု နေရပ်ပြန်ကြည့်သည့် ဆီဆိုင်မြို့ခံအမျိုးသားတစ်ဦးက ပြောသည်။
သို့သော် ဆီဆိုင်မြို့ထဲကို ပြန်ဝင်လာကြသည့် ဒေသခံများကို စစ်ကောင်စီက ပအိုဝ်းဝတ်စုံ ဝတ်ဆင်စေပြီး လူသားဒိုင်းလုပ်ကာ ဆီဆိုင်မြို့တွင်းနေရာအချို့တွင် ဓာတ်ပုံဝင်ရိုက်ကြောင်း၊ ပြည်သူအား လူသားဒိုင်းအဖြစ် အသုံးပြုရန် ရည်ရွယ်ချက်ဖြင့် လူထုများအား မြို့တွင်းပြန်ဝင်နိုင်ပြီဖြစ်ကြောင်း စစ်ကောင်စီက သတင်းမှား ဖြန့်နေသည်ဟု PNLO က မတ်လ ၃၀ ရက်တွင် အသိပေးထုတ်ပြန်ထားပါသည်။
ထို့အပြင် ဆီဆိုင်မြို့ကို ပြန်ဝင်လာကြသည့် ဒေသခံ ၂၀ ကျော်ကိုလည်း စစ်ကောင်စီက ဖမ်းဆီးထားပြီး အဆက်သွယ်ပြတ်တောက်နေကြောင်း ဆိုသည်။
သျှမ်းတောင် ဆီဆိုင်၊ ဟိုပုံးနှင့် ပင်လောင်းမြို့နယ် တိုက်ပွဲများကြောင့် အရပ်သား သေဆုံးမှု ၅၃ ဦးအထိ ရှိလာပြီး အမျိုးသမီးနှင့် ကလေးငယ်အပါအဝင် အရပ်သား ထိခိုက်ဒဏ်ရာရမှု ၇၀ ဝန်းကျင်အထိ မြင့်တက်လာနေကြောင်း ပအိုဝ်းလူငယ်အစည်းအရုံးက မတ်လ ၂၆ ရက်တွင် ထုတ်ပြန်ထားသည်။
