သျှမ်းပြည် တန့်ယန်းမြို့နယ်မှ တောင်သူလယ်သမားများ ကွန်ယက်က ဦးဆောင်ပြီး စစ်ကောင်စီ၏ စစ်မှုထမ်းဆင့်ခေါ်ခြင်းကို ဆန့်ကျင်ကြောင်း ထုတ်ပြန်လိုက်သည်။
ယမန်နေ့ (ဧပြီလ ၁ ရက်)တွင် တန့်ယန်းမြို့နယ် တောင်သူလယ်သမားများကွန်ယက်က ဦးဆောင်ပြီး အရပ်ဘက်အဖွဲ့များ၊ ဒေသခံလူငယ်နှင့် မိဘပြည်သူများက စစ်ကောင်စီ၏ ပြည်သူ့စစ်မှုထမ်း ဆင့်ခေါ်ရေး မြို့နယ်အဖွဲ့မှ စစ်မှုထမ်းရမည့် အသက်အရွယ်ရောက်သူများ၏ စာရင်းထုတ်ပြန် ဆင့်ခေါ်နေမှုအပေါ် ဆန့်ကျင်ကန့်ကွက်ကြောင်း ထုတ်ပြန်လာသည်။
“အခုလို တိုင်းပြည်ရှုပ်ထွေးနေတဲ့အချိန်မှာ စစ်မှုထမ်းဖို့ ကောက်တာက နိုင်ငံခြားတိုင်းပြည်နဲ့ စစ်ဖြစ်နေတဲ့အချိန်လည်း မဟုတ်ဘူး။ ဒီဟာက ကိုယ့်အချင်းချင်း ပြန်တိုက်ဖို့ပဲ ဖြစ်နေတာလေ၊ ဒီလိုလုပ်တာက လုံးဝ မသင့်လျော်ဘူး။ ဘယ်သူမဆို ဘယ်လူမျိုးမဆို မလုပ်ချင်ဘူး၊ ဒါကြောင့်မလို့ ဆန့်ကျင်ကန့်ကွက်ရခြင်း ဖြစ်ပါတယ်”ဟု ထုတ်ပြန်ချက်တွင် ပါဝင်ခဲ့သည့် တန့်ယန်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိအချိန်ကာလတွင် ပြည်သူ့စစ်မှုထမ်းရန် ဆင့်ခေါ်နေခြင်းသည် ပြည်သူများအား အကြပ်အတည်း ပိုမိုကြုံတွေ့စေနိုင်သည့်အပြင် လူငယ်များကို နေရပ်စွန့်ခွာရန် တွန်းအားပေးသလို ဖြစ်နေကြောင်း ဆိုထားသည်။
ထို့အပြင် စစ်မှုထမ်းရမည့် နာမည်စာရင်းသည် ပွင့်လင်းမြင်သာမှုနှင့် အဂတိကင်းရှင်းမှု ရှိမရှိ မေးခွန်းထုတ်စရာဖြစ်နေပြီး ပြည်သူအချင်းချင်းကြား အငြင်းပွားမှု၊ စိတ်ဝမ်းကွဲမှုများလည်း ဖြစ်ပေါ်လာစေနိုင်ကြောင်း ထုတ်ပြန်ချက်တွင် ရေးသားထားသည်။
“စစ်ကောင်စီက အဘက်ဘက်ကနေ တိုက်ခိုက်ခံနေရတော့ သူတို့ အင်အားနည်းလာတာပေါ့။ ဒါကြောင့် သူ့ဒေသမှာရှိတဲ့လူနဲ့ အချင်းချင်း ပြန်တိုက်အောင် လုပ်နေတာ၊ ကိုယ့်နိုင်ငံထဲက လူအချင်းချင်းကို ပြန်တိုက်ခိုင်းနေတာ၊ ငါးကြင်းဆီနဲ့ ငါးကြင်းပြန်ကြော်သလိုပေါ့။ ဒီဟာရဲ့ နောက်ကွယ်မှာ လာဘ်ပေးလာဘ်ယူမှုနဲ့ အကျင့်ပျက်ခြစားမှုတွေလည်း ရှိလာတယ်”ဟု တန့်ယန်းမြို့နယ်မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
စစ်ကောင်စီက ပြည်သူ့စစ်မှုထမ်းဥပဒေ ပြဋ္ဌာန်း၍ အကောင်အထည်ဖော်နေခြင်းသည် သင့်လျော်သည့် အချိန်ကာလ မဟုတ်ဘဲ စစ်မှုထမ်းရန် ဆင့်ခေါ်ခံရသူနှင့် ၎င်းမိသားစု ဘေးကင်းလုံခြုံရေးအတွက်လည်း စိုးရိမ်ရသည့်အပြင် တိုင်းရင်းသား အချင်းချင်းကြား စိတ်ဝမ်းကွဲစေနိုင်ခြင်းကြောင့် စစ်မှုထမ်းဆင့်ခေါ်နေခြင်းကို ပြန်လည်သုံးသပ်ရန် သို့မဟုတ် ရပ်ဆိုင်းရန်၊ ဆိုင်းငံ့ပေးရန် သဘောထားထုတ်ပြန်ကြောင်း ကြေညာချက်တွင် ဖော်ပြထားသည်။
“ဒီလုပ်နည်းလုပ်ဟန်ကို ပြောင်းလဲစေချင်တယ်။ စစ်တပ် အာဏာသိမ်းကတည်းက ပြည်တွင်းစစ် ပြန်ဖြစ်လာတာ အခုထိ အချင်းချင်း တိုက်လို့ မပြီးနိုင်တော့ဘူး။ လက်ရှိဖြစ်နေတဲ့ နိုင်ငံရေး အကြပ်အတည်းကို တွေ့ဆုံဆွေးနွေးပြီး မဖြေရှင်းနိုင်သေးသမျှတော့ ဒီတိုင်းဆက်ဖြစ်နေရင် ပိုနစ်နာသွားဖို့ပဲ ရှိတယ်၊ တိုင်းပြည်ပြိုကွဲနိုင်တဲ့ အခြေအနေထိ ရောက်သွားနိုင်တယ်”ဟု တန့်ယန်းမြို့မှ အသက်(၅၀)ကျော်အရွယ် အမျိုးသားတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် မတ်လ ၁၄ ရက်နေ့က တန့်ယန်းမြို့နယ် ပြည်သူ့စစ်မှုထမ်း ဆင့်ခေါ်ရေးအဖွဲ့သည် ရပ်ကွက်နှင့် ကျေးရွာအုပ်စု အုပ်ချုပ်ရေးမှူးများကို တန့်ယန်းမြို့တော်ခန်းမတွင် စစ်မှုထမ်းစာရင်း ကောက်ယူရန် အစည်းအဝေး ခေါ်ယူခဲ့ပြီး စစ်မှုထမ်းရမည့် အသက်အရွယ် ရောက်သူများ၏ စာရင်းကို မတ်လ ၁၈ ရက်နေ့ အရောက်ပို့ပေးရန် ညွှန်ကြားခဲ့ကြောင်း သိရသည်။
၎င်းနောက်တွင် တန့်ယန်းမြို့နယ် ပြည်သူ့စစ်မှုထမ်း ဆင့်ခေါ်ရေးအဖွဲ့သည် စစ်မှုထမ်းရမည့်သူများစာရင်းကို ထုတ်ပြန်၍ အုပ်ချုပ်ရေးမှူးများကို လက်မှတ်ထိုးခိုင်းကာ မတ်လ ၂၁ ရက်တွင် ၎င်းနာမည်စာရင်းအတိုင်း ရပ်ကွက်နှင့် ကျေးရွာအုပ်စုများထံ ပေးပို့ဆင့်ခေါ်နေကြောင်း တန့်ယန်းဒေသခံများက ပြောသည်။
