သျှမ်းပြည် မူဆယ်မြို့နယ်တွင် အွန်လိုင်းကျားဖြန့် လုပ်ကိုင်သည့် နေရာများကို စစ်ကောင်စီက ဝင်ရောက်စီးနင်းခဲ့ရာ လူ တစ်ထောင်ကျော်ကို ဖမ်းဆီးခံရကြောင်း စုံစမ်းသိရသည်။
မတ်လ ၂၇ ရက် ညပိုင်းမှ စတင်ပြီး မူဆယ်မြို့တွင် ဖွင့်လှစ်လုပ်ကိုင်နေသည့် အွန်လိုင်းကျားဖြန့် လုပ်ငန်းများကို စစ်ကောင်စီက ဝင်ရောက်စီးနင်းခဲ့ရာ မြန်မာနှင့် တရုတ်နိုင်ငံသား စုစုပေါင်း ၁၀၀၀ ကျော် ဖမ်းဆီးခံခဲ့ရပြီး တရုတ်နိုင်ငံသားများကို တရုတ်နိုင်ငံသို့ ပြန်လွှဲပြောင်းပေးခဲ့ကာ မြန်မာလူငယ်များကို ငွေဖြင့် ပြန်ရွေးခိုင်းနေကြောင်း မူဆယ်ဒေသခံများက ပြောသည်။
“မင်္ဂလာမူဆယ်နားက New Star Light ကုမ္ပဏီပိုင်တဲ့ ကိုးထပ်တိုက်ကိုတော့ အရင်ရက်က မှန်လုံကားနဲ့ လူအများကြီးကို ဝင်ဖမ်းသွားတာ။ စွမ်စော်ဘက်မှာ ဖမ်းတာနဲ့ဆိုရင် မြန်မာကော တရုတ်ကော အားလုံးပေါင်း လူထောင်ကျော် ရှိမယ်။ မြန်မာပြည်က တရုတ်တွေဆိုရင်တော့ ပိုက်ဆံနဲ့ ပြန်ရွေးရင် လွှတ်ပေးတယ်ပြောတယ်”ဟု မူဆယ်မြို့မှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
မူဆယ်မြို့တွင် ဖမ်းဆီးရမိသည့် အွန်လိုင်းကျားဖြန့် လုပ်ကိုင်သူ မြန်မာပြည်ဖွား တရုတ်လူမျိုး အပါအဝင် တရုတ်နိုင်ငံသား ၅၀၀ နီးပါးကို စစ်ကောင်စီက မန့်ဝိန်းနယ်စပ်ဂိတ်မှတဆင့် တရုတ်နိုင်ငံဘက်သို့ လွှဲပြောင်းပေးခဲ့ကြောင်း သိရသည်။
မူဆယ်စစ်ကောင်စီက လက်ရှိဖမ်းဆီးနေသည့် အွန်လိုင်းကျားဖြန့် လုပ်ကိုင်သူများသည် အားလုံးမဟုတ်ဘဲ တရုတ်၏ ဖိအားကြောင့် ဟန်ပြဖမ်းဆီးခြင်း ဖြစ်နိုင်ကြောင်း မူဆယ်ဒေသခံများက ပြောဆိုသည်။
“ဖမ်းသွားတာက အကုန်လုံး မဟုတ်သေးဘူး။ ဧက ၄၀ တို့၊ လေယာဉ်ကွင်းဟောင်းတို့ အဲ့ဘက်မှာ ရှိဦးမှာ၊ ဒါတောင်မှ နေရာရွှေ့သွားတာတွေ ကျန်သေးတယ်။ လေယာဉ်ကွင်းနားက ခိုင်ဇာနန်းတော်၊ ဧက ၄၀ ဦးမြင့်ဆွေ၊ 97 ငါးမျှားကျွန်း၊ စွမ်စော်၊ ကောင်းမူးတုံ ဒီဘက်မှာတွေက ခေါင်ကြီးတွေ ရှိတယ်။ ဟိုတယ်နာမည်ခံပြီး ကျားဖြန့် လုပ်စားတာတွေလည်း ရှိသေးတယ်”ဟု မူဆယ်မြို့မှ ၎င်းအမျိုးသားက သျှမ်းသံတော်ဆင့်ကို ဆက်ပြောသည်။
ထို့အပြင် အွန်လိုင်းကျားဖြန့် လောင်းကစားဝိုင်းများသည် စစ်ကောင်စီလက်အောက်ခံ ပန်းဆေး ပြည်သူ့စစ်အဖွဲ့က နမ့်ပေါ်တံတားအနီး ပန်ခမ်းကျေးရွာတွင်လည်းကောင်း၊ လုံထန်ပြည်သူ့စစ်က ပန်ခမ်းရေဆိပ်အနီးတွင်လည်းကောင်း၊ မော်ဆောင်းနှင့် မန်ဂျယ် ပြည်သူ့စစ်အဖွဲ့တို့က စွမ်စော်ရပ်ကွက်တို့တွင်လည်းကောင်း လုံခြုံရေးအပြည့်ဖြင့် ဖွင့်လှစ်ထားကြောင်း မူဆယ်ဒေသခံများက ပြောသည်။
မူဆယ်မြို့တွင် ဖွင့်လှစ်လုပ်ကိုင်နေသည့် အွန်လိုင်းကျားဖြန့် လုပ်ငန်းများအတွက် တာဝန်ရှိသည့် ဂိုဏ်းခေါင်းဆောင်များ တရုတ်ရဲတပ်ဖွဲ့၏ ဖမ်းဆီးခြင်းခံရကြောင်း ဒေသခံများက ပြောဆိုနေသော်လည်း သျှမ်းသံတော်ဆင့်အနေဖြင့် သီးခြားအတည်ပြုနိုင်ရန် ဆက်လက်စုံစမ်းနေသည်။
လက်ရှိတွင် စစ်ကောင်စီထံသို့ လိုင်းကြေးပေးသွင်းပြီး ဖွင့်လှစ်သည့် ကျားဖြန့်လောင်းကစားဝိုင်းများလည်း ဖမ်းဆီးခံရခြင်းကြောင့် နေရာပြောင်းလဲ ဖွင့်လှစ်ပြီး လည်ပတ်နိုင်ရန် လုပ်ဆောင်နေကြကြောင်း မူဆယ်ဒေသခံများထံမှ သိရသည်။
Leave a Comments