Saturday, July 13, 2024

သဘာဝဓာတ်ငွေ့ရောင်းရငွေ သုံးစွဲခွင့်မရသော်လည်း စီးပွားရေး တိုးတက်ဟု မင်းအောင်လှိုင် ကြုံးဝါး

Must read

နိုင်ငံရေးအရ အနောက်နိုင်ငံများမှ စီးပွားရေး၊ ကုန်သွယ်ရေး၊ ဘဏ္ဍာရေးဆိုင်ရာ ကန့်သတ်မှုများစွာ ပြုလုပ်ခဲ့ သဖြင့် တရုတ်နှင့် ထိုင်းနိုင်ငံသို့ တင်ပို့ခဲ့သည့် ရေနံနှင့် သဘာဝဓာတ်ငွေ့ ရောင်းရငွေများ သုံးစွဲ၍ မရသော်လည်း နိုင်ငံ့စီးပွားရေး တိုးတက်အောင် လုပ်နိုင်ခဲ့သည်ဟု စစ်ခေါင်းဆောင် မင်းအောင်လှိုင်က ပြောဆိုလိုက်သည်။

မင်းအောင်လှိုင်

အခက်အခဲများကြားမှ စီးပွားရေး တိုးတက်အောင် ဆောင်ရွက်နိုင်ခဲ့ကြောင်း၊ ၃ နှစ်တာ ကာလအတွင်း ပြည်ပကြွေးမြီ အမေရိကန်ဒေါ်လာ ၂ ဒသမ ၂ ဘီလီယံ ပြန်ဆပ်နိုင်ခဲ့ကြောင်း ယမန်နေ့ (မတ် ၂၉ ရက်) က နေပြည်တော်၌ ပြုလုပ်သည့် စစ်ကောင်စီ အစည်းအဝေး၌ မင်းအောင်လှိုင်က ပြောဆိုသည်။

လက်ရှိ အမေရိကန် တစ်ဒေါ်လာ ၄၀၀၀ ကျပ် ဝန်းကျင်နှင့် အခေါက်ရွှေ တစ်ကျပ်သား ၄၅ သိန်း နီးပါးအထိ ရောက်ရှိနေပြီး ကျပ်ငွေ တန်ဖိုး ဇောက်ထိုး ကျဆင်းနေချိန် နေပြည်တော်၌ နိုင်ငံ့စီးပွားရေး တိုးတက်နေကြောင်း စစ်ခေါင်းဆောင်က ကြုံးဝါးလိုက်ခြင်း ဖြစ်သည်။

ပြီးခဲ့သည့် ဘဏ္ဍာ ရေးနှစ်အတွင်း GDP တိုးတက်မှုရှိခဲ့ကြောင်း၊ ၂၀၁၈ ခုနှစ်ခန့်မှစ၍ နိုင်ငံ့စီးပွားရေးကျဆင်း ခဲ့သော်လည်း စစ်တပ်အာဏာသိမ်းချိန်မှစ၍ ယခင်အနုတ်ပြခဲ့သည့် စီးပွားရေးမှ အပေါင်းလက္ခဏာသို့ တိုးတက်ခဲ့ကြောင်း စစ်ခေါင်းဆောင်က ရှင်းပြသည်။

လက်ရှိ နိုင်ငံတဝှမ်း စစ်မီးတောက်လောင်နေပြီး အဓိက နယ်စပ်ကုန်သွယ်ရေး လမ်းကြောင်းများအား တော်လှန်ရေးတပ်များက ထိန်းချုပ်ထားရာ နယ်စပ် ကုန်သွယ်မှု လုံးဝနီးပါး ရပ်ဆိုင်းနေပြီး ရန်ကုန်ဆိပ်ကမ်း အခြေပြု ပင်လယ်ရေကြောင်း ကုန်သွယ်ရေးကိုသာ အားထားနေရသဖြင့် ပို့ကုန် သွင်းကုန် အကြီးအကျယ် ကျဆင်းနေကြောင်း ကုန်သည်များက ဆိုသည်။

“နယ်စပ်လိုင်းက လုံးဝနီးပါး ရပ်သလောက် ဖြစ်နေပြီ။ ရေကြောင်းကလည်း လိုင်စင်က မချပေးတော့ လုပ်ရကိုင်ရခက်တယ်။ အခုတောင် အခြေခံစားသောက်ကုန်ကအစ ပစ္စည်း တော်တော်များများ ပြတ်လာပြီ။ စီးပွားရေး တိုးတက်နေတယ် ဆိုတာ ဘာကိုကြည့်ပြောနေတာလဲ လိုက်မမီတော့ဘူး” ဟု ပို့ကုန် သွင်းကုန် လုပ်ငန်းရှင် တစ်ဦးက ဝေဖန်ပြောဆိုသည်။

စစ်တပ် အာဏာသိမ်းပြီးနောက် စစ်ခေါင်းဆောင်က စိုက်ပျိုးရေးနှင့် မွေးမြူရေး ထုတ်ကုန်များ တိုးချဲ့ ထုတ်လုပ်ရန် စီမံကိန်းချ လုပ်နေကြောင်း မကြာခဏ ပြောဆိုသော်လည်း ယနေ့ ဆန်ကြမ်း တပြည် ကျပ် ၆၀၀၀ ကျော်၊ ကြက်ဥ တစ်လုံး ၂၅၀ ကျပ်အထိ အဆမတန် မြင့်တက်နေသည်။

ထို့အပြင် ရွေးကောက်ပွဲ အတွက် ကြိုတင်ပြင်ဆင်နေပြီး မဖြစ်မနေလုပ်မည်ဖြစ်ပြီး မဲစာရင်း မှန်ကန်ရေး သန်းခေါင်စာရင်း ကောက်ယူနေကြောင်း၊ ဒီမိုကရေစီလမ်းကြောင်း လျှောက်လှမ်းရာတွင် လက်နက်ကိုင် နည်းလမ်းဖြင့် ဆောင်ရွက်၍ မရကြောင်း မင်းအောင်လှိုင်က ပြောသည်။

သို့သော် မည်သည့်အချိန်တွင် ရွေးကောက်ပွဲ ပြုလုပ်မည်ကို ထည့်သွင်း ပြောဆိုခြင်း မရှိပေ။

လက်ရှိ သျှမ်းမြောက်တွင် စစ်ရပ်စဲထားသော်လည်း သျှမ်းတောင်၊ ကရင်ပြည်နယ်၊ ကချင်ပြည်နယ်၊ ကရင်နီပြည်၊ နှင့် ပဲခူးတိုင်း အပါအဝင် နိုင်ငံ့အနှံ့အပြား တိုက်ပွဲများ ဖြစ်ပွားနေသဖြင့် သန်းနှင့်ချီသည့် ပြည်သူများ ထွက်ပြေး တိမ်းရှောင်နေရပြီး ထောင်ပေါင်းများစွာသော အိုးအိမ်များ ပျက်စီးနေဆဲ ဖြစ်သည်။

Leave a Comments

- Advertisement -spot_img

Latest article