သျှမ်းတောင်တိုက်ပွဲကြောင့် ထွက်ပြေးတိမ်းရှောင်နေရသည့် စစ်ဘေးရှောင်အချို့သည် တောတောင်းအတွင်းသို့ ရောက်ရှိနေပြီး အဆက်သွယ်ပြတ်ကာ အကူညီမဲ့နေကြောင်း စုံစမ်းသိရသည်။

ဆီဆိုင်မြို့တိုက်ပွဲကြောင့် ထွက်ပြေးနေရသည့် စစ်ဘေးရှောင်အများစုသည် မြို့အနီးတဝိုက် ကျေးရွာနှင့် တခြားမြို့ဖြစ်သည့် တောင်ကြီး၊ ဟိုပုံး စသည့်ဖြင့် တိမ်းရှောင်သွားနိုင်ကြသော်လည်း အချို့ သည်တောတောင်အတွင်း ရောက်ရှိသွားပြီး အဆက်သွယ်ပြတ်ကာ အကူညီမဲ့နေကြောင်း ပအိုဝ်းအမျိုးသမီးသမဂ္ဂ Pa-O Women’s Union ကတာဝန်ရှိသူတဦး ပြောသည်။

“စစ်ဘေးရှောင်တွေက များတော့အားဖြင့် ကြပ်တည်းမှုကတော့ တူညီကြပါတယ်။ ဒါပေမယ့် မြို့၊ ရွာနဲ့ နည်းနည်းအလှမ်းဝေးတဲ့ နေရာမျိုးဆိုရင်တော့ ပိုပြီးစားဝတ်နေရေး ပိုခက်ခဲတာတွေရှိတယ်။ ဆေးဝါး၊ စားဝတ်နေရေးတွေက သူတို့ဟာနဲ့သူတို့ပဲ စစ်ဘေးမရှောင်ခင်မှာ ဆန်၊ ဆီ၊ ဆေး၊ ဆားကို သူတို့အိမ်ကနေပြီး သယ်သွားရတာ။ ပြီးတော့ တောတောင်နေရာမှာ ပုန်းရှောင်နေတဲ့သူတွေကျတော့ ဘယ်တောတောင်လဲဆိုတာ ဘယ်သူမှမသိဘူး” ဟု ၎င်းကပြောသည်။

ယင်းကဲ့သို့ တောတောင်အတွင်း ထွက်ပြေးခိုလှုံနေရသောကြောင့် လူမှုကူညီရေးအဖွဲ့အနေဖြင့် သွားရောက်ကူညီရန် ခက်ခဲသလို ဆက်သွယ်မေးမြန်ရန်အတွက်လည်း ခက်ခဲကြောင်းဆိုသည်။

ထို့အပြင် ၎င်းတို့ဘက်က အဆက်သွယ်ဖုန်းလိုင်းမရကြသဖြင့် မြေပြင်မှာဖြစ်နေသည့် သတင်းအချက်လက် များလည်းမရှိကြကြောင်း၊ အဆိုပါသတင်းအချက်အလက်များမရရှိကြသဖြင့် မြို့တွင်းသို့ ရုတ်တရက် ဝင်ရောက်ပြီး ပစ္စည်းသယ်ကာ လက်နက်ကြီးထိမှန်ခြင်း၊ ဖမ်းဆီးခံရခြင်းများ ကြုံတွေ့နေလျက်ရှိသည်။

မတ်လဒုတိယပတ်အတွင်း ဆီဆိုင်မြို့အတွင်းသို့ ဝင်ရောက်ပစ္စည်းယူသည့် ဒေသခံလူငယ် ၂ ဦးလည်း ဖမ်းဆီးရိုက်နှိက်ခံလိုက်ရကြောင်း ဆီဆိုင်မြို့ခံတစ်ဦးက သျှမ်းသံတော်ဆင့်က ပြောသည်။

“တစ်လောက်ကမြို့ထဲကိုပြန်ပြီး ပစ္စည်းယူတဲ့လူနှစ်ယောက်ဖမ်းဆီးရိုက်နှိက်ခံရတယ်။ တစ်ယောက်က သူ့ဖုန်းထဲမှာ မိန်းမဖြစ်သူရဲ့ဖုန်းနံပါတ်ကို ဗိုလ်မှူးလို့မှတ်ထားလို့ စစ်သားတွေက ဗိုလ်မှူးတွေနဲ့ ဆက်သွယ်တယ် ဆိုပြီးရိုက်တာ။ တစ်ယောက်ကလည်း ခါးပတ်မှာ စစ်ခါးပတ်ပါတယ်ဆိုပြီး သံသယဖြစ်တာ ရိုက်လွတ်လိုက်တာ။ နှစ်ယောက်လုံး မသေတာကံကောင်းတယ်။ ရွာသူကြီးနဲ့ အာမခံနဲ့ပြန်လွတ်လာတာ” ဟု ဆီဆိုင်မြို့ခံတစ်ဦးက ပြောသည်။

ပြီးခဲ့သည့် ဖေဖော်ဝါရီလ ၁၉ ရက်တွင် ဆီဆိုင်မြို့ကို နေရပ်သွားသည့် စစ်ဘေးရှောင်များ ပြန်ပြီးပစ္စည်းယူနေစဉ်
မွေတော်ဘုရားအရှေ့ဘက်ရှိ ဝါးတောရွာမြောက်ဘက်မှာ စစ်ကောင်စီ လက်နက်ကြီး ထိမှန်၍ ဒေသခံ ၇ ဦး သေဆုံးသွားခဲ့သည်။

SHANBurmese

Shannews

သျှမ်းသံတော်ဆင့်

သျှမ်းတောင်စစ်ရှောင် #