သျှမ်းပြည် ညောင်ရွှေမြို့နယ် အင်းလေးဒေသတွင် စစ်မှုထမ်းသူများအတွက် ထောက်ပံ့ကြေးဆိုကာ အုပ်ချုပ်အုပ်ချုပ်ရေးမှူးများမှ ပိုက်ဆံကောက်ယူနေကြောင်း စုံစမ်းသိရသည်။

ညောင်ရွှေမြို့ပေါ်ရှိ ရပ်ကွက် ၈ ခုအပါအဝင် အင်းလေးဒေသ ကျေးရွာပေါင်း ၃၃၇ ရှိသည့်အနက် တစ်ရွာလျှင် ၂ ဦး စစ်မှုထမ်းရမည်ဆိုကာ သက်ဆိုင်ရာ ကျေးရွာနှင့် ရပ်ကွက်အုပ်ချုပ်ရေးမှူးများက မဲနှိုက်ခိုင်းစေခဲ့ပြီး သင်္ကြန်ကာလအပြီး ခေါ်ယူသွားမည်ဖြစ်ကြောင်း ဒေသခံများထံမှ သိရသည်။

ယင်းကဲ့သို့ စစ်မှုထမ်းရန် လူအခက်ခဲရှိသည့်ကျေးရွာများအတွက် ကျေးရွာသူကြီးက တစ်အိမ်လျှင် ကျပ် ၂ သောင်း စစ်မှုထမ်းများ၏ ထောက်ပံ့ကြေးအဖြစ် ကောက်ခံသွားမည်ဖြစ်ကြောင်း အင်းပေါ်ခုန်ဒေသခံ အမျိုးသမီးတစ်ဦးကပြောသည်။

“အခုစစ်မှုထမ်းဖို့ မဲနှိုက်ခိုင်းတယ်။ တချို့ရွာတွေလည်း မဲနှိုက်ပြီးပြီ၊ သင်္ကြန်ပြီးရင် သွားရမယ်လို့ပြောတယ်။ မသွားနိုင်တဲ့ရွာတွေကိုတော့ ပိုက်ဆံကောက်မယ်။ အဲ့ပိုက်ဆံတွေက စစ်မှူထမ်းတဲ့သူတွေအတွက် ထောက်ပံ့ ကြေးပေးမယ်တော့ပြောတယ်။ တစ်အိမ်ကို ကျပ် ၂ သောင်းကောက်မှာ” ဟု ၎င်းကပြောသည်။

အင်းလေးဒေသ အင်းပေါ်ခုန်တွင် အိမ်ခြေပေါင်း ၂၀၀ ခန့်ရှိရာ တစ်အိမ်လျှင် ကျပ် ၂ သောင်းကောက်ခံပါက စုစုပေါင်း ကျပ်သိန်း ၄၀ ရှိကြောင်းသိရသည်။

ပြည်သူ့စစ်မှုထမ်းဥပဒေအရ စစ်မှုထမ်းရန် ရွေးချယ်ခံရသူများအတွက် စစ်မှုထမ်းမရှိသည့် အိမ်ထောင်စုများက ထောက်ပံ့ကြေးပေးရမည်ဟု စစ်ကောင်စီက ရပ်ကျေးအာဏာပိုင်များကို ညွှန်ကြားထားကြောင်း၊ စစ်မှုထမ်းမည့်သူများသည် ခံစားခွင့်ရမည့်လစာနှင့် ရှားပါးစရိတ် ထောက်ပံ့ကြေးများအတွက်ကိုမှု နိုင်ငံမှ ထောက်ပံ့မည်ဟု စစ်ကောင်စီက မတ်လ ၂၂ ရက်မှာ VOA သတင်းဌာနထံသို့ ပြောဆိုထားသည်။

တစ်ဖက်တွင်လည်း စစ်မှုထမ်းဥပဒေအရ လူငယ်များကို ဖိအားပေးခြိမ်းခြောက်ကာ အတင်းအဓမ္မ စစ်မှုထမ်းခိုင်းပါက တော်လှန်ရေးအင်အားစုများ၏ မူဝါဒအရ ထိထိရောက်ရောက် အရေးယူသွားမည်ဟု JMC-Innlay က မတ်လ ၂၅ ရက်တွင် ထုတ်ပြန်ထားသည်။