သျှမ်းပြည် ပင်လောင်းမြို့နယ် နန်းတုတ်ကျေးရွာတွင် တိုက်ပွဲဖြစ်ပွားခြင်းမရှိဘဲ စစ်ကောင်စီတပ်က လေကြောင်းဖြင့် မီးလောင်ဗုံးကြဲချသွားကြောင်း စုံစမ်းသိရသည်။

ယမန်နေ့ (မတ်လ ၂၇) ရက်၌ကျရောက်သာ တပ်မတော်နေ့တွင် မွန်းလွှဲ ၂ နာရီဝန်းကျင်မှစပြီး စစ်ကောင်စီက နန်းတုတ်ကျေးရွာ မြောက်ဘက်ရှိ သင်္ချိုင်းကို လေကြောင်းဖြင့် မီးလောင်ဗုံး ၁ လုံးကြဲချကာ အနီးတဝိုက်မှ ပြောင်းတင်လေဆိပ်ကိုလည်း လေကြောင်းဖြင့် ၂ ကြိမ် ပစ်ခတ်ခဲ့ကြောင်း သိရသည်။

“ဟုတ်တယ်။ မနေ့က ကျနော်တို့ရွာကို စစ်ကောင်စီက လေယာဉ်ဖြင့် ထပ်လာကြဲတယ်။ ဒါသူတို့က ပြည်သူတွေကို မငဲ့ညာတော့ဘူး။ လူကောင်း၊ လူဆိုး မခွဲတော့ဘူး။ အဲ့လိုပဲ လိုက်ကြဲနေတယ်။ လူတွေလည်း ထွက်ပြေးကုန်ပြီ၊ အခုလည်း တစ်ရွာလုံးဒုက္ခရောက်ကုန်ပြီ” ဟု နန်းတုတ်ကျေးရွာဒေသခံ အမျိုးသားတစ်ဦးက ပြောသည်။

ယင်းကဲ့သို့ ပစ်ခတ်မှုကြောင့် ပြောင်းတင်လှေဆိပ်တွင် ရပ်ထားသည့် ကားတစ်စီး ပျက်စီးသွားခဲ့ကြောင်း သိရသည်။

အလားတူ ညောင်ရွှေမြို့နယ် ရေပူရွာကိုလည်း စစ်ကောင်စီတပ်က လက်နက်ကြီးဖြင့် ၈ ကြိမ်ခန့် ပစ်ခတ်ခဲ့သဖြင့် ဒေသခံနေအိမ် ၁ လုံး ပျက်စီးခဲ့သေးကြောင်း သိရသည်။

နန်းတုတ်ကျေးရွာကို ဖေဖော်ဝါရီလ ၂၂ ရက်ကတည်းက စစ်ကောင်စီသည် ဖယ်ခုံမြို့အခြေစိုက် ခြေမြန်တပ်ရင်း ခမရ ၃၃၆ မှ လက်နက်ကြီးဖြင့်ပစ်ခတ်ခဲ့ပြီး မတ်လ ၂၂ ရက်တွင်လည်း စစ်ကောင်စီက အဆိုပါနန်းတုတ် ကျေးရွာအား တိုက်လေယာဉ်ဖြင့် ၂ ကြိမ် လာရောက်ဗုံးကြခဲ့သည်။

ယင်းကဲ့သို့ စစ်ကောင်စီမှ လက်နက်ကြီး၊ လေယာဉ်ဖြင့် မကြာခဏဗုံးကြဲ၊ ပစ်ခတ်ခဲ့သောကြောင့် ဒေသခံများ ရွာလုံးကျွတ်ထွက်ပြေးတိမ်းရှောင်နေရပြီး ရောက်ရာအရပ်ဒေသ၌ မိသားစုစားဝတ်နေရေးအတွက်ကို ရရာအလုပ်လုပ်ကိုင်နေရကြောင်း ထွက်ပြေးနေရသည့် နန်းတုတ်ရွာခံတစ်ဦးကပြောသည်။

“အခုကျနော်တို့ တခြားရွာတွေဘက်မှာ အိမ်ငှားနေရတယ်။ တစ်လကို အနည်းဆုံးကျပ် ၅ သောင်းလောက်တော့ ပေးရတယ်။ မိသားစုလည်းများတော့ သူများနဲ့နေရတာအဆင်မပြေဘူး။ အခုကျပ် ၅ သောင်းဆိုလည်း ရှာရတာ ခက်သွားပြီ။ ဒီဘက်မှာ ငါးဖမ်းပြီးရောင်းရင်လည်း ရောင်းစရာနေမရှိ သွားလာလို့အဆင်မပြေတော့ဘူး။ ရှိတဲ့အလုပ်ကိုပဲ ရှာလုပ်နေရတယ်” ဟု ၎င်းကပြောသည်။

ဖယ်ခုံမြို့နှင် အခြားတစ်ဖက်ကမ်းရှိ နန်းတုတ်ကျေးရွာတွင် စစ်ဘေးရှောင်အပါအဝင် အင်းသား၊ ပအိုဝ်း နှင့် သျှမ်းလူမျိုးပေါင်းစုံများစု ပေါင်းနေထိုင်ကြပြီး နန်းတုတ်တောင်ရွာ၊ မြောက်ရွာ၊ အရှေ့ရွာဟူ၍ ရှိသည်။

လက်ရှိတွင် စစ်ကောင်စီ၏ လေကြောင်းတိုက်ခိုက်မှု၊ လက်နက်ကြီးဖြင့် ပစ်ခတ်မှုများကြောင့် စစ်ဘေးရှောင် အပါအဝင် ဒေသခံဦးရေ ခန့်မှန်ခြေ ၃ထောင်ခန့်က ရွာလုံးကျွတ်ထွက်ပြေးတိမ်းရှောင်နေလျက်ရှိသည်။