သျှမ်းပြည် လားရှိုးမြို့ မှ အရှေ့မြောက်ဖက်ကို စစ်ကောင်စီက လက်နက်ကြီးများဖြင့် ပစ်ခတ်နေကြောင်း စုံစမ်းသိရသည်။

သျှမ်းပြည် လားရှိုးမြို့တွင် ယမန်နေ့ မတ်လ ၂၇ ရက် နေ့လည် ၁၂ နာရီဝန်းကျင်တွင် စစ်ကောင်စီတပ်က မြို့တွင်း မှ အရှေ့မြောက်ဖက် ကို ပိန်းခန်ရွာအနီးကို လက်နက်ကြီးများဖြင့် ပစ်ခတ်ခဲ့ကြောင်း လားရှိုးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“လားရှို ကနေ ပန်ဟူး – ပိန်းခန်ဘက်ကို ပစ်တာ။ အဲ့ရွာဘက်မှာက စစ်ကောင်စီကော ညီနောင်အဖွဲ့တွေ လည်းရှိတယ်။ စစ်ကောင်စီက အဲ့ဘက်တက်သွားတော့ ပိန်းခန်ရွာထဲကို ရောက်တော့ တိုက်ပွဲဖြစ်သွားတာ။ အဲ့ကြောင့် လားရှိုးမှာရှိတဲ့ တပ် ၅၀၇၊ ၄၁ ကနေလည်း ပစ်ကူတာပေါ့။”ဟု လားရှိုးမြို့ဒေသခံအမျိုးသားတစ်ဦက ပြောသည်။

လားရှိုးမြို့၏ အရှေ့တိုင်းစစ်ဌာနချုပ် ခြေလျင်တပ်ရင်း (ခလရ) ၄၁၊ ခြေမြန်တပ်ရင်း (ခမရ) ၅၀၇ တို့မှ လက်နက်ကြီးများဖြင့် တိုက်ပွဲဖြစ်ပွားသည့် နေရာကို ပစ်ကူခဲ့ကြောင်း သိရသည်။

လားရှိုးမြို့‌ဒေသခံ များကလည်း တိုက်ပွဲများ ပြန်လည်ဖြစ်ပွားလာမည်ကို စိုးရိမ်ကြကြောင်း သိရသည်။

လားရှိုးမြို့နယ်တွင် စစ်ကောင်စီတပ်ဖွဲ့အပြင် ပြည်သူ့စစ်အဖွဲ့၊ တိုင်းရင်းသားလက်နက်ကိုင်များ ဖြစ်ကြသည့် SSPP/SSA၊ TNLA ၊ MNDAAစသည့်ဖြင့် လက်နက်ကိုင်တပ်ဖွဲ့များ လှုပ်ရှားနေသည်။

မတ်လဆန်းမှစတင်၍ လားရှိုးမြို့နယ်ရှိ ညီနောင်မဟာမိတ် ၃ ဖွဲ့က သိမ်းပိုက်ထိန်းချုပ်ထားသည့် မိုင်းကျက်ကျေးရွာအုပ်စုတွင် ‘ဝ’တပ်ဖွဲ့ UWSA က ပြန်လည်ထူထောင်ရေးလုပ်ငန်းများ စတင်လုပ်ဆောင်ရန် သံလွင်မြစ်မှ မိုင်းကျက်ကျေးရွာအထိ ၄၈ ပေ အကျယ်ရှိသည့် လမ်းကို ဖောက်လုပ်လာကြောင်း သိရသည်။

လားရှိုးမြို့နယ် အရှေ့မြောက်ဘက်ရှိ မိုင်းကျက်ကျေးရွာအုပ်စုသည် သံလွင်မြစ် အနောက်ဘက်ခြမ်းရှိ လားရှိုး၊ သိန္နီနှင့် အရှေ့ဘက်ခြမ်းရှိ ကွမ်းလုံမြို့နယ်တို့ဆုံရာ နယ်စပ်ဖြစ်ပြီး ‘ဝ’တပ်ဖွဲ့က သံလွင်မြစ် အနောက်ခြမ်းတွင် ခြေကုပ်ရယူရန် ဖြစ်နိုင်ကြောင်း ဒေသခံများက သုံးသပ်ပြောဆိုသည်။