သျှမ်းပြည် နောင်ချိုမြို့နယ်တွင် စစ်မှုထမ်းရန် မဲစာရင်းပေါက်သည့် လူငယ်များကို ပြင်ဦးလွင်သို့ စစ်သင်တန်းတက်ရန် ပို့ဆောင်နေကြောင်း စုံစမ်းသိရသည်။
မတ်လ တတိယပတ်မှ စတင်ပြီး နောင်ချိုမြို့နယ်ရှိ ရပ်ကွက်နှင့် ကျေးရွာအုပ်စု အုပ်ချုပ်ရေးမှူးများထံ အထွေထွေအုပ်ချုပ်ရေးနှင့် လူဝင်မှုကြီးကြပ်ရေး လဝက တို့မှ စစ်မှုထမ်းရန် အသက်ပြည့်မီသည်ဟု ဆိုသော (၁၈)နှစ်အထက် လူငယ်စာရင်းများဖြင့် ဆင့်ခေါ်လာပြီး ၎င်းတို့အထဲမှ မဲပေါက်သူများကို စစ်သင်တန်းတက်ရန် ပြင်ဦးလွင်သို့ ပို့ဆောင်နေကြောင်း နောင်ချိုဒေသခံများက ပြောသည်။
“ကျေးရွာအုပ်စုတစ်ခုကို ၂၀ ယောက် အနည်းဆုံး ကောက်နေတယ်။ ရွာများတဲ့ အုပ်စုဆိုရင်တော့ ရွာလူဦးရေအတိုင်း တစ်ရွာကို ၅ ယောက် အဲ့လိုသွားရတာ။ ကျနော်တို့ဆီမှာ မဲနှိုက်လို့ ပေါက်တာနဲ့ တခါတည်း လူခေါ်သွားတာ။ စစ်မှုထမ်းရမယ့်လူဆိုရင် ပြီးခဲ့တဲ့ ၂ ရက် ၃ ရက်ကတည်းက မေမြို့မှာ စစ်သင်တန်းတက်ဖို့ သွားရပြီ၊ မသွားလို့ မရဘူးလေ”ဟု နောင်ချိုမြို့မှ အမည်မဖော်လိုသည့် ဒေသခံတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် နောင်ချိုမြို့နယ်အတွင်းရှိ နားခေါ့၊ ကုန်းသာ၊ ဆမ္မဆယ်၊ အုမ္မခါး၊ ဘန့်ဘွေး စသည့် ကျေးရွာအုပ်စုများမှ အသက်(၁၈)နှစ်မှ (၃၅)နှစ်အတွင်းရှိ စစ်မှုထမ်းရန် မဲပေါက်သူများအား ပြင်ဦးလွင်မြို့ရှိ စစ်တက္ကသိုလ်တွင် နည်းပြများကိုယ်တိုင် သင်ကြားပေးမည်ဟုဆိုကာ ပို့ဆောင်နေကြောင်း နောင်ချိုဒေသခံများက ပြောသည်။
“စစ်တက္ကသိုလ်မှာပဲ နည်းပြတွေနဲ့ သင်တန်းဖွင့်ထားတယ်လို့ ပြောတယ်။ ဘယ်နှရက် တက်ရမှာလဲ မပြောဘူး။ နောင်ချိုက ပြင်ဦးလွင်တပ်နယ်ထဲပါလို့ အဲ့မှာသွားတက်ရတာလို့ ပြောတာ။ ၂၀ ရက်နေ့ နောက်ပိုင်းက စစ်မှုထမ်းဖို့ စကောက်နေတော့ အခု ရွာဘက်ကလူတွေ တအားကြောက်နေကြပြီ။ တခြားရွာတွေကတော့ လူရဖို့ အတင်းကောက်ခိုင်းနေတယ်”ဟု နောင်ချိုမြို့မှ ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။
စစ်ကောင်စီက စစ်မှုထမ်းရန် ဆင့်ခေါ်ခြင်းနှင့် လူသစ်စုဆောင်းမှုကို သင်္ကြန်ကာလ ရုံးပိတ်ရက်အပြီး ဧပြီလအတွင်း စတင်မည်ဟု စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ပြောဆိုထားသည်။
သို့သော် စစ်တက္ကသိုလ်ရှိရာ ပြင်ဦးလွင်မြို့နှင့် ၃၅ မိုင်ခန့်သာ ကွာဝေးသည့် နောင်ချိုမြို့နယ်မှ စစ်မှုထမ်း မဲပေါက်သူများသည် သင်္ကြန်မတိုင်မီ စစ်သင်တန်းတက်ရောက်ရန် စတင်သွားရောက်နေရခြင်းကြောင့် စိုးရိမ်ပူပန်မှုရှိနေကြောင်း နောင်ချိုဒေသခံများက ပြောသည်။
“ရေရှည်ဆိုရင်တော့ ရွာပျက်ဖြစ်တော့မှာ။ တချို့လည်း ထွက်ပြေးကြတာ ဘယ်လိုမှ ပြောလို့မရတော့ဘူး။ သုံးဆယ်ရွာလို အိမ်ခြေ ၆၀၀ ကျော်ရှိတာတောင်မှ ရွာလုံးကျွတ် ထွက်ပြေးရတာမျိုးကျတော့ ဘယ်လိုမှ လူကောက်ပေးလို့ မရတော့ဘူး။ လူစားထိုးလို့လည်း မရဘူးလေ။ အဲ့လိုဆိုတော့ မိဘမောင်နှမတွေလည်း စိတ်ပူရတယ်”ဟု နောင်ချိုမြို့နယ်မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
နောင်ချိုမြို့နယ်တွင် လက်ရှိအချိန်ထိ ညီနောင်မဟာမိတ်၊ PDF ပူးပေါင်းတပ်ဖွဲ့များနှင့် စစ်ကောင်စီတပ်တို့ စစ်ရေးတင်းမာနေလျက် ရှိပြီး အုမ္မသီးကျေးရွာ လမ်းခွဲတွင် တပ်စွဲထားသည့် စစ်ကောင်စီတပ်မှ ဟိုခို၊ သုံးဆယ်နှင့် ဆမ္မဆယ် ကျေးရွာများဘက်သို့ နေ့စဉ်နီးပါး လက်နက်ကြီး ပစ်ခတ်နေခြင်းကြောင့် ရွာသားများမှာ ထွက်ပြေးတိမ်းရှောင်နေရကြောင်း သိရသည်။
ထို့အပြင် နောင်ချိုစစ်ကောင်စီတပ်ကလည်း စစ်မှုထမ်းရန် အသက်(၁၈)နှစ်မှ (၃၅)နှစ်အတွင်းရှိ အမျိုးသားများကို အတင်းအကျပ် စုဆောင်းလာခြင်းကြောင့် စစ်ဘေးရှောင်များနှင့် ဒေသခံပြည်သူများမှာ ထပ်မံထွက်ပြေးနေရကြောင်း နောင်ချိုဒေသခံများက ပြောသည်။
Leave a Comments