ထိုင်း-မြန်မာနယ်စပ်ဒေသ တာချီလိတ်မြို့တွင် ဖမ်းဆီးထိန်းသိမ်းခံထားသည့် အွန်လိုင်းလောင်းကစားလုပ်ကိုင်သူ မြန်မာနိုင်သား ဦးရေ(၄၀၀) ကျော်ကို အာမခံဖြင့် ပြန်လွှတ်ပေးမည်ဖြစ်ကြောင်း စုံစမ်းသိရသည်။
ပြီးခဲ့သည့် ဖေဖော်ဝါရီလ ၂၃ ရက်က တာချီလိတ်မြို့ 1G1 ဟိုတယ်အနီးတွင် စစ်ကောင်စီ၏ ဝင်ရောက်စီးနင်း မှုကြောင့် ဖမ်းဆီးခံထားရသည့် အွန်လိုင်းလောင်းကစားလုပ်ငန်းလုပ်ကိုင်သူ မြန်မာနိုင်ငံသား ဦးရေ (၅၄၀) အနက် ဦးရေ (၄၀၀) ကျော်ကို အာမခံလူ ၂ ဦးဖြင့် ယနေ့ မတ်လ ၁၈ ရက်မှစ၍ ပြန်လွတ်ပေးမည်ဖြစ်ကြောင်း တာချီလိတ်မြို့ အသက် ၃၀ ကျော် အမျိုးသားတစ်ဦးက သျှမ်းသံတော်ဆင့် ကိုပြောသည်။
“ဒီနေ့ အွန်လိုင်းလောင်ကစား မြန်မာလက်ကျန် ၄၀၀ ကျော်ကို ပြန်လွှတ်ပေးမယ်ပြောတယ်။ မနေ့ကတည်းက ထောက်ခံစာတွေ ယူနေကြတယ်။ ရပ်ကွက်ထောက်ခံစာတွေကော ယူရတယ်။ အာမခံ လူ ၂ ယောက် လက်မှတ် ထိုးရတယ်။ အိမ်ပိုင်ရှိတဲ့လူဖြစ်ရမယ် ” ဟု ၎င်းကပြောသည်။
ပြန်လည်လွတ်ပေးမည့် မြန်နိုင်ငံသား ၄၀၀ ကျော်ကို တစ်ရက်တည်းတွင် ပြန်လွှတ်ပေးမည်မဟုတ်ဘဲ တရားရုံးထုတ်သည့် အချိန်နှင့် ရုံးတွင်းဆန့်သလောက် ဦးရေကိုသာ ယနေ့ (မတ်လ ၁၈) ရက်တွင် ပြန်လွတ်ပေးမည်ဖြစ်ကြောင်း သိရသည်။
ထို့အပြင် ပြန်လွတ်မည့်သူများအနေဖြင့် ဒဏ်ကြေး ပေးဆောင်ရမည်ဟု သိရှိရသော်လည်း အသေးစိတ်ကို မသိရသေးပေ။
“အခုပြန်လွတ်ပေးတာက လူများတာရယ်၊ စဖမ်းကတည်းက တရုတ်အွန်လိုင်းကို အဓိကပစ်မှတ်ထား ဖမ်းတာပါမယ်။ အဲ့ကြောင့် ပြန်လွှတ်ပေးတာ” ဟု အထက်ပါ အမျိုးသားတစ်ဦးက ပြောသည်။
အလားတူ မတ်လ ၈ ရက်တွင်လည်း အသက် ၁၈ နှစ်မပြည့်သေးသည့် အွန်လိုင်းလောင်းကစားလုပ်ကိုင်သူ မြန်မာနိုင်သား ၁၂၀ ခန့်ကို တရားရုံးထုတ်ပြီး ပထမတစ်သုတ်အနေဖြင့် ပြန်လွှတ်ပေးခဲ့သည်။
မြန်မာနိုင်ငံတွင် စစ်တပ်အာဏာသိမ်းပြီးနောက်ပိုင်း စီးပွားရေး၊ လူမှုရေး၊ ပညာရေး အဘက်ဘက် ကျဆင်း လာပြီး အလုပ်အကိုင်အခွင့်အလမ်းများ ရှားပါးခြင်းကြောင့် လူငယ်များသည် ရရာ အလုပ်လမ်းကြောင်း များကို ရှာဖွေရာ အွန်လိုင်းလောင်းကစားလုပ်ငန်းနေရာများ၌ လိမ်လည်ခံရခြင်း၊ ရောင်းစားခံရခြင်းများ ရှိနေသည်။
