သျှမ်းပြည် တန့်ယန်းမြို့တွင် စစ်ကောင်စီတပ်ဖွဲ့မှ ဦးဆောင်ပြီး ရပ်ကွက်နှင့် ကျေးရွာအုပ်စုများကို စစ်မှုထမ်းဆင့်ခေါ်ရန် အစည်းအဝေး ပြုလုပ်ခဲ့ကြောင်း စုံစမ်းသိရသည်။
ယမန်နေ့ (မတ်လ ၁၄ ရက်) နံနက် ၉ နာရီမှ စတင်ပြီး တန့်ယန်းမြို့ အခြေစိုက် စစ်ကောင်စီတပ်မှ ဦးဆောင်ပြီး ရဲတပ်ဖွဲ့နှင့် ထွေအုပ်ဝန်ထမ်းများမှ ရပ်ကွက်နှင့် ကျေးရွာအုပ်စု အုပ်ချုပ်ရေးမှူးများကို တန့်ယန်းမြို့တော်ခန်းမတွင် စစ်မှုထမ်းစာရင်း ကောက်ယူရန် အစည်းအဝေး ခေါ်ယူခဲ့ကြောင်း တန့်ယန်းဒေသခံများက ပြောသည်။
“အခု ပထမသုတ်မှာ တစ်ရပ်ကွက်ကို ၂ ယောက် အရင်ခေါ်မယ်၊ ကျား/မ မရွေး အသက် ၁၈ ကနေ ၃၅ နှစ်အထိ ယူမယ်။ ပြီးရင် တန့်ယန်းတပ်ထဲမှာ တစ်လ စစ်သင်တန်း ပေးမယ်လို့ ပြောတာ။ အဲ့လိုပုံစံနဲ့ တစ်သုတ်ပြီးတစ်သုတ် ခေါ်သွားမယ်လို့တော့ ပြောတာပဲ။ ဘယ်အချိန် စစ်သင်တန်း ခေါ်ပေးမလဲတော့ မသိသေးဘူး”ဟု တန့်ယန်းမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
တန့်ယန်းအခြေစိုက် စစ်ကောင်စီတပ်က မြို့ပေါ်ရပ်ကွက် (၁၀)ခုနှင့် ကျေးရွာအုပ်စု အားလုံးသို့ စစ်မှုထမ်းရန် အရပ်သား ၂ ဦးစီ ဆင့်ခေါ်ထားပြီး မတ်လ ၁၇ ရက် နောက်ဆုံးထား၍ စာရင်းပေးပို့ရန် ညွှန်ကြားခဲ့ကြောင်း တန့်ယန်းမြို့ ဒေသခံများထံမှ သိရသည်။
သျှမ်းမြောက်တွင် စစ်ရေးအဘက်ဘက်က ရှုံးနိမ့်ခဲ့သည့် စစ်ကောင်စီတပ်သည် တပ်သားအင်အား နည်းပါးလာခြင်းကြောင့် ဖေဖော်ဝါရီလ (၁၀)ရက်နေ့တွင် ပြည်သူ့စစ်မှုထမ်းဥပဒေကို အသက်သွင်းပြီးနောက် သျှမ်းပြည်အတွင်းရှိ မြို့နယ်များတွင်လည်း အသက်ပြည့်ပြီးသူများကို စစ်မှုထမ်းနှင့် ပြည်သူ့စစ်လုပ်ရန် ဆင့်ခေါ်လာခြင်း ဖြစ်ကြောင်း ဒေသခံများက ပြောသည်။
တန့်ယန်းမြို့နယ်တွင် စစ်ကောင်စီတပ်၏ အခြေချ စစ်ဗျူဟာတပ်ရင်း (စဗခ-တန့်ယန်း)၊ ခမရ-၃၂၆၊ ခမရ-၅၂၃ နှင့် အမြောက်တပ်-၃၅၁ တို့ အခြေစိုက်ထားပြီး SSPP တပ်ဖွဲ့၏ ဝမ်ဟိုင်းဌာနချုပ်နှင့် မျက်နှာချင်းဆိုင် တည်ရှိနေသလို “ဝ”တပ်ဖွဲ့ UWSA နှင့်လည်း သံလွင်မြစ်သာ ခြားပြီး သိပ်မဝေးကြောင်း သိရသည်။
အလားတူ မတ်လ ၁၃ ရက်ကလည်း ကျေးသီးမြို့အခြေစိုက် ခလရ-၁၃၁ တပ်မှ ဗိုလ်ကြီး အာကာကိုကို ဦးဆောင်ပြီး ကျေးသီးမြို့ပေါ်ရပ်ကွက်နှင့် ကျေးရွာအုပ်ချုပ်ရေးမှူးများကို တပ်တွင်းသို့ ခေါ်ယူ၍ စစ်မှုထမ်း စာရင်းကောက်ယူရန် ညွှန်ကြားခဲ့ကြောင်း ကျေးသီးဒေသခံများက ပြောသည်။
ထို့အပြင် စစ်ကောင်စီလက်အောက်ခံ ကျေးသီးမြို့နယ် အုပ်ချုပ်ရေးမှူး ဦးထူးထက် ကလည်း ရပ်ကျေးစာရေးများမှတဆင့် ကျေးရွာအုပ်စု အုပ်ချုပ်ရေးမှူးများသို့ ပြည်သူ့စစ်လုပ်ရန် ဆင့်ခေါ်ခိုင်းခဲ့ရာ ကျေးရွာအုပ်စု တစ်ခုလျှင် လူဦးရေ (၁၅၀)မှ (၂၀၀)ကြားအထိ ကောက်ခံခိုင်းပြီး စစ်မှုမထမ်းလျှင် မှတ်ပုံတင်စာရင်း ဖျက်ပစ်မည်ဟု ခြိမ်းခြောက်ခဲ့ကြောင်း ကျေးသီးဒေသခံများထံမှ သိရသည်။
Leave a Comments