သျှမ်းပြည် ဆီဆိုင်မြို့နယ် အနောက်ဖက်တွင် စစ်ကောင်စီနှင့် ပအိုဝ်းအမျိုးသားလွတ်မြောက်ရေးတပ်မတော် (PNLA) တို့တိုက်ပွဲပြင်ထန်ခဲ့ပြီး စစ်ကောင်စီဘက်မှ အရာရှိနှစ်ဦး အပါအဝင် ၁၁ ဦး ဒဏ်ရာရရှိခဲ့ကြောင်း သိရသည်။
ဆီဆိုင်မြို့နယ်တွင် အနောက်ဖက် မဲနယ်တောင်ဒေသ ကျောက္ကဆျားကျေးရွာအနီးမှာ ပြီးခဲ့သည် မတ်လ ၁၃ ရက်တွင် စစ်ကောင်စီမှ MI 35 တိုက်ခိုက်ရေးရဟတ်ယာဉ်များ ဖြင့်လာရောက်ပစ်ခတ်ခဲ့ပြီး တိုက်ပွဲကို ၁နာရီ ခန့်ဖြစ်ပွားခဲ့သည်။
ထိုတိုက်ပွဲကြောင့် စစ်ကောင်စီဘက်မှ အရာရှိနှစ်ဦး အပါအဝင် ၁၁ ဦး ဒဏ်ရာရရှိခဲ့ကြောင်း PNLA မှ ယမန်နေ့ (မတ် ၁၄)ရက်တွင် ထုတ်ပြန်ခဲ့သည်။
ထိုအပြင် စစ်ကောင်စီမှ ဆီဆိုင်မြို့နယ်အတွင်းကိုလည်း သံချပ်ကာကားများ တင့်ကားများအသုံးပြုပြီး စစ်ကြောင်း ထိုးလာသဖြင့် မြို့မြောက်ဘက်တွင် တိုက်ပွဲများဆက်လက်ပြင်းထန်ခဲ့ကာ လက်နက်ကြီးများ ဖြင့်လည်း မဲနယ်တောင် ဒေသကို အကြိမ် ၆၀ ကျော် ပစ်ခတ်တိုက်ခိုက်ခဲ့ကြောင်း ထုတ်ပြန်ချက်တွင် ရေးသားဖော်ပြထားသည်။
ဆီဆိုင်မြို့ကို စစ်ကောင်စီတပ်က တင့်ကား၊ သံချပ်ကာ ကားများ အပါအဝင် စစ်အင်အား အလုံးအရင်း အသုံးပြု ထိုးစစ်ဆင်ရန် ပြင်ဆင်နေကြောင်း ကို စစ်ရေးသတင်းရင်းမြစ်က ဖေဖော်ဝါရီ ၂၀ ရက် တွင် သျှမ်းသံတော်ဆင့်ကို ပြောဆိုခဲ့ဖူးသည်။
“ စစ်ရေးကတော့ နေ့တိုင်းနီးပါးပါပဲ။ ကျနော်တို့လည်း ပြေးနေရတယ်လေ။ စားဖို့လည်း ဘယ်သူမှ မကူညီဘူး။ ရိက္ခာကုန်ရင်တော့ အချင်းချင်း ချေးငှားစားနေရတာပေါ့။ အလုပ်လည်းမလုပ်နိုင်ဘူး” ဟု ဆီဆိုင်မြို့နယ် မှ အသက် ၃၀အရွယ် အမျိုးသားတစ်ဦးက သျှမ်းသံတော်ဆင့်ကိုပြောသည်။
လက်ရှိ ဆီဆိုင်မြို့နယ် အတွင်းဖြစ်ပွားလာသည့် တိုက်ပွဲသည် ရက်ရှည်လာသည့်အမျှ စစ်ရှောင်ပြည်သူများသည် စားနပ်ရိက္ခာ ပြတ်လပ်လုနီးပါးဖြစ်နေပြီး၊ ကျန်းမာရေး ကူညီစောင့်ရှောက်မှု မရရှိကြကြောင်းလည်း ၎င်းကဆိုသည်။
ထို့အပြင် စစ်ကောင်စီသည် ကျေးရွာအတွင်းရှိ ဘာသာရေးအဆောက်အဦးများ၊ ဆေးရုံများတွင် တပ်စွဲကာ မြို့တွင်းသို့ လက်နက်ကြီး၊ ဒရုန်းများဖြင့် ပစ်ခတ်ဖျက်ဆီးနေပြီး၊မွေတော်ဘုရား အနီးရှိ ပြည်သူနေအိမ်များကိုလည်း မီးရှို့ဖျက်ဆီးခဲ့ကြောင်း သိရသည်။
ထိုပြင် ပြီးခဲ့သည့် (မတ်လ ၁၃)ရက်တွင် ဟိုပုံးမြို့နယ် မဲနယ်တောင်ဒေသ နမ့်ဟူးကျေးရွာကို စစ်ကောင်စီဖက်မှ ပြာကျသည့်အထိ မီးရှို့ဖျက်ဆီးလိုက်ကြောင်း သိရသည်။
