သျှမ်းပြည် လောက်ကိုင်မြို့မှ နေရပ်ပြန်လာစဉ် ကိုးကန့်တပ်ဖွဲ့ MNDAA ၏ စစ်မှုထမ်းရန် အတင်းအဓမ္မ ဖမ်းဆီးခံထားရသည့် လူငယ်များကို ပြန်လွှတ်ပေးရန် တအာင်း(ပလောင်) အရပ်ဘက်အဖွဲ့များ က တောင်းဆိုလိုက်သည်။

တအာင်း(ပလောင်) အရပ်ဘက်အဖွဲ့များ ဖြစ်ကြသည့် တအာင်းအမျိုးသမီးအဖွဲ့ (TWO)၊ တအာင်းကျောင်းသားနှင့် လူငယ်အဖွဲ့ (TSYU) နှင့် တအာင်း ဥပဒေအထောက်အကူပြုအဖွဲ့တို့ ပူးပေါင်းပြီး ကိုးကန့်တပ် MNDAA ထံသို့ ဖမ်းဆီးခံထားရသည့် လူငယ်များကို ပြန်လွှတ်ပေးရန် ဇန်နဝါရီလ ၃၁ ရက်တွင် အိတ်ပိတ်စာ ပေးပို့ခဲ့သော်လည်း ယနေ့အချိန်ထိ တစုံတရာ ပြန်လည်တုံ့ပြန်ခြင်း မရှိသေးကြောင်း သိရသည်။

ပြီးခဲ့သည့် ၂၀၂၃ ‌အောက်တိုဘာလ နောက်ဆုံးပတ်တွင် စတင်ခဲ့သည့် “၁၀၂၇ စစ်ဆင်ရေး” ကာလအတွင်း လောက်ကိုင်၊ ချင်းရွှေဟော် စသည့် ကိုးကန့်ဒေသတွင် အလုပ်လုပ်နေသော လူငယ်များသည် နေရပ်သို့ ပြန်လာစဉ် ကိုးကန့်တပ်ဖွဲ့ဝင်များ၏ ဖမ်းဆီးခြင်း ခံခဲ့ရပြီး တအာင်း(ပလောင်) အရပ်ဘက်အဖွဲ့အစည်းများထံ တိုင်ကြားခဲ့ကြောင်း ဆိုထားသည်။

၂၀၂၄ ဇန်နဝါရီလအထိ ၎င်းတို့ထံ အကူအညီ တောင်းခံလာသည့် အချက်အလက်များအရ ကိုးကန့်ဒေသရှိ ဆယ်တန်၊ ချင်းရွှေဟော်၊ တုံချိန်၊ ပါစင်ကျော်နှင့် နမ့်တစ် စသည့် MNDAA စစ်ဆေးရေးဂိတ်များတွင် တအာင်း(ပလောင်) လူမျိုးနှင့် အခြားလူမျိုး အပါအဝင် အမျိုးသား (၁၂၆) ဦးနှင့် အမျိုးသမီး (၂၇) ဦး၊ စုစုပေါင်း (၁၅၄)ဦး ဖမ်းဆီးခံထားရကြောင်း ရေးသားထားသည်။

တိုက်ပွဲပြင်းထန်နေစဉ် ကာလအတွင်း လောက်ကိုင်မြို့မှ နေရပ်ပြန်လာစဉ် ကိုးကန့်တပ် MNDAA ၏ အတင်းအဓမ္မ စစ်မှုထမ်းဆောင်ရန် လမ်းခုလတ်တွင် ဖမ်းဆီးခံထားသူများမှာ မူဆယ်၊ တန့်ယန်း၊ နမ့်ခမ်း၊ နမ့်ဆန်၊ မန်တုံ၊ ကွတ်ခိုင်၊ ကျောက်မဲနှင့် လားရှိုးမြို့နယ်တို့မှ လူငယ်များဖြစ်ပြီး ၎င်းတို့ကို ပြန်လည်စိစစ်၍ လွှတ်ပေးရန်လည်း တအာင်း(ပလောင်) အရပ်ဘက်အဖွဲ့အစည်းများက တောင်းဆိုထားသည်။

ယခုကဲ့သို့ ကိုးကန့်တပ် MNDAA က ဖမ်းဆီးထားသည့် အခြားလူမျိုးနှင့် တအာင်း(ပလောင်) လူငယ်များကို ပြန်လွှတ်ပေးရန် တအာင်း(ပလောင်) အရပ်ဘက်အဖွဲ့အစည်းများက စာပေးပို့ တောင်းဆိုခြင်းနှင့် ပတ်သက်ပြီး တအာင်းအမျိုးသမီးအဖွဲ့ (TWO)ထံ သျှမ်းသံတော်ဆင့်မှ အကြိမ်ကြိမ် ဆက်သွယ်ခဲ့သော်လည်း ဖုန်းစက်ပိတ်ထားသည်။

အလားတူ ၂၀၂၃ နိုဝင်ဘာလ ၂၄ ရက်က လောက်ကိုင်မြို့မှ နေရပ်ပြန်လာသည့် သျှမ်းကျောင်းသားသမဂ္ဂ၏ အလုပ်အမှုဆောင် အဖွဲ့ဝင်ဖြစ်သူ နမ္မတူဒေသခံ စိုင်းညွန့်နှင့် အခြားလူငယ် ၄ ဦးတို့ကိုလည်း ကိုးကန့်တပ်ဖွဲ့ MNDAA က အတင်းအဓမ္မ တပ်သားစုဆောင်းထားကြောင်း သျှမ်းကျောင်းသားသမဂ္ဂ(TSU)မှ ‌ ဖေဖော်ဝါရီလ ၁၇ ရက်တွင် ထုတ်ပြန်ထားသည်။

ကိုးကန့်တပ်ဖွဲ့ MNDAA အနေဖြင့် အထူးဒေသ (၁) အဖြစ် သတ်မှတ်ထားသည့် ကိုးကန့်ခရိုင်၊ ကွတ်ခိုင်ခရိုင်၊ သိန္နီခရိုင်နဲ့ မုံးကိုးခရိုင်တို့တွင် နေထိုင်သည့် မည်သူမဆို အမျိုးသမီး၊ အမျိုးသား စသဖြင့် လူမျိုးဘာသာ မခွဲခြားဘဲ အသက် ၁၆ နှစ်မှစပြီး တပ်သားအဖြစ် စုဆောင်းဖို့ရှိကြောင်း ကိုးကန့်တပ်ဖွဲ့ ပြောရေးဆိုခွင့်ရှိသူ လီကျားဝင်းက သျှမ်းသံတော်ဆင့်ကို ဒီဇင်ဘာလအတွင်းက ပြောဆိုခဲ့ဖူးသည်။