သျှမ်းပြည် ဆီဆိုင်မြို့နယ်၊ ဟိုပုံးမြို့နယ်နှင့် လွိုင်လင်မြို့နယ် တိုက်ပွဲကြားအတွင်း နှစ်ဘက် ပအိုဝ်းလက်နက်ကိုင်တပ်ဖွဲ့မှ ဖမ်းဆီးထားသည့် အရပ်သား ၁၆ဦး သည် ယနေ့ထိ ပြန်မလွှတ်မြောက် သေးကြောင်း စုံစမ်းသိရသည်။

အဆိုပါ ဖမ်းဆီးခံရသည့် အရပ်သား ၂၀ ဦးထဲတွင် ပအိုဝ်းအမျိုးသားလွတ်မြောက်ရေးတပ်မတော် PNLA ဘက်မှ အရပ်သား ၈ ဦးကို ဖမ်းဆီးထိန်းသိမ်းထားပြီး၊ စစ်ကောင်စီနှင့်လက်အောက်ခံ ပြည်သူ့စစ် PNA ဘက်မှ အရပ်သား ၁၂ ဦးကို ဖမ်းဆီးထိန်းသိမ်းခဲ့ရာ PNA ဘက်က ၄ဦးပြန်လည်လွတ်ပေးခဲ့ကြောင်း ပအိုဝ်းလူငယ်အစည်းအရုံးထံမှ သိရသည်။

“ဆီဆိုင်၊ ဟိုပုံး၊ လွိုင်လင်တိုက်ပွဲကြားမှာ ဖမ်းဆီးခံရတဲ့သူ (၂၀)ဦး ရှိတယ်။ အဲထဲမှာ (၄)ဦး ပြန်လည် လွတ်မြောက်လာတယ်။ ဖမ်းဆီးထိန်းသိမ်းခံရဆဲ သူတွေရဲ့ အခြေအနေများကို ကျမတို့ ဆက်လက်စုံစမ်းနေတယ်။ တချို့က လုံးဝ သတင်းအစအန လိုက်လို့မရတာတွေလည်း ရှိတယ်” ဟု ပအိုဝ်းလူငယ်အစည်းအရုံးမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

ထိုဖမ်းဆီးခံရသူများသည် ဖေဖော်ဝါရီလ နှင့် မတ်လ အတွင်းဖမ်းဆီးခံရသူများဖြစ်သည်။

ယင်းကဲ့သို့ အရပ်သားဖမ်းဆီးမှုနှင့် ပတ်သက်၍ သျှမ်းသံတော်ဆင့်မှ ပအိုဝ်းအမျိုးသား လွတ်မြောက်ရေး တပ်မတော် PNLA၏ ပြန်ကြားရေး တစ်ဦးကို ဆက်သွယ်မေးမြန်းခဲ့ရာတွင် “ ပြည်သူတွေ ဖမ်းခံရတာတော့ ကျနော်တို့ နယ်ထဲမှာအနည်းစုရှိတယ်” ဟု ပြန်လည်ဖြေကြားခဲ့သည်။

သို့သော် ဖမ်းဆီးထားသူ မည်သူမည်ဝါ ဖြစ်ကြောင်းနှင့် ဘယ်နှစ်ဦးကို ဖမ်းဆီးထားကြောင်း အသေးစိတ်ကို မသိရှိရသေးကြောင်း PNLA ပြန်ကြားရေး တစ်ဦးက ဆိုပြန်သည်။

အလားတူ ဖေဖော်ဝါရီလ ၁၄ ရက်တွင်လည်း ဘန်းယဉ်ကျေးရွာမှ ဆီဆိုင်မြိုသို့ နေရပ်ပြန်ပြီး ပစ္စည်းသယ်ယူသည့် အသက် ၁၉ နှစ်အရွယ် မောင်အောင်မြတ်ကျော်၊ အသက် ၂၀ နှစ်ကျော် မောင်အောင်ပြည့်စုံနှင့် မောင်ဇာနည်သူ စုစုပေါင်း လူငယ် ၃ ဦးသည်လည်း ၁ လနီးပါးကြာ အဆက်အသွယ်ပြတ်တောက်ပြီး ပျောက်ဆုံးနေ လျှက်ရှိသည်။

“ပျောက်သွားတဲ့ကနေ ဒီနေ့ထိပြန်မတွေ့သေးဘူး။ တချို့ပြန်တွေ့တယ်လို့လည်း ဖုန်းဆက်အကြောင်း ကြားလာတာလည်းမရှိဘူး။ ဘာသတင်းမှမကြားဘူး။ ဖုန်းဆက်လို့လည်း မရဘူး။ ဒီကစိတ်ပူနေတယ်” ဟု မောင်အောင်မြတ်ကျောက်၏ မိခင်ဖြစ်သူက ပြောသည်။

ဆီဆိုင်မြို့နယ်အတွင်း တိုက်ပွဲသည် ၁ လကျော်ကြာပြီဖြစ်သော်လည်း လက်ရှိအချိန်ထိ တိုက်ပွဲငြိမ်းစဲ သွားခြင်းမရှိဘဲ တိုက်ပွဲဆက်လက်ဖြစ်ပွားနေသကဲ့သို့ စစ်ကောင်စီဘက်မှ လက်နက်ကြီး၊ ဒရုန်းနှင့် လေကြောင်း ဗုံးကြဲတိုက်ခိုက်နေလျှက်ရှိသည်။

ထို့အပြင် ဖေဖော်ဝါရီလအတွင်း ဆီဆိုင်မြို့သို့ ပစ္စည်းသယ်ယူရန် ပြန်လာကြသည့် အသက် ၁၈ နှစ်မှ ၄၅ နှစ်အရွယ် အမျိုးသမီးအပါအဝင် အမျိုးသား စုစုပေါင်း ၁၀ ဦးခန့် လမ်းတစ်ဝက်မှာပျောက်ဆုံးနေသည်။