သျှမ်းပြည် သိန္နီမြို့နယ်တွင် “၁၀၂၇ စစ်ဆင်ရေး” အတွင်း စစ်ကောင်စီနှင့် ညီနောင်မဟာမိတ်တိုက်ပွဲတို့ကြောင့် နေအိမ် ၆၀၀ ထပ်မနည်း ပျက်စီး၊နေရာထိုင်ခင်း ခက်ခဲနေကြောင်း စုံစမ်းသိရသည်။

ပြီးခဲ့သည့် ၂၀၂၃ အောက်တိုဘာ နောက်ဆုံးပတ်မှ စတင်ခဲ့သည် စစ်ကောင်စီ နှင့် ညီနောင်မဟာမိတ်တို့၏ “၁၀၂၇ စစ်ဆင်ရေး”အတွင်း သိန္နီမြို့ပေါ်နှင့်ကျေးရွာ ၁၀ရွာကျော်မှ ဘာသာ‌ရေးအဆောက်အဦးနှင့် နေအိမ် ၆၀၀ ထပ်မနည်း ပျက်စီးခဲ့ပြီး ဒေသခံများ နေရာအထိုင်ခင်းနှင့် စားဝတ်နေရေး အခက်အခဲရှိနေကြောင်း ဒေသခံအမျိုးသမီးတစ်ဦးက သျှမ်းသံတော်ကို ပြောသည်။

“နေအိမ် ၆၀၀ ကျော်အကူညီလိုနေကြတာပေါ့။ ပြေးလာတာ ၃ လ ၄ လ ဘာမှမလုပ်ရဘူးလေ၊ပြန်‌တော့လည်း ဘာအလုပ်မှလုပ်လို့မရတော့ဘူး။အိမ်တွေပြန်ပြင်ဖို့အတွက်မပြောနဲ့ စားဖို့သောက်ဖို့တောင်ခက်နေတာ။နေရပ် ပြန်သွားတဲ့ဟာတွေကလည်း ပျက်စီးနေတဲ့အိမ်မှာပဲနေနေကြတာ။ တချို့တွေက ပြင်ဖို့မရှိတော့ မိုးကာလေးနဲ့ သဲထိုးပြီး နေရတာတွေရှိတာပေါ့။”ဟု အမျိုးသမီးတစ်ဦးက ပြောသည်။

ထိုတိုက်ပွဲပြင်းထန်မှုကြောင့် ပျက်စီးသွားသော နေအိမ်များသည် မီးလောင်ခြင်း၊လက်နက်ကြီး၊ငယ်နှင့် လေယာဉ် ဖြင့် ဗုံးကြဲတိုက်ခိုက် မှုများကြောင့် ပျက်စီးသွားခဲ့ရပြီး ပြည်သူများအတွက် မည်သည့် တပ်ဖွဲ့၊ တာဝန်ရှိ အဖွဲ့အစည်းမှ ကူညီဆောင်ရွက်မှုမရှိသေးကြောင်း ၎င်းက ဒေသခံအမျိုးသမီးက ဆက်ပြောသည်။

ထို့ပြင် “၁၀၂၇ စစ်ဆင်ရေး”အစပိုင်းတွင် ဖျက်ဆီးခံလိုက်ရသည့် သိန္နီမြို့အဝင် နမ္မတူတံတားကို ကိုးကန့်တပ်ဖွဲ့ MNDAA က ဖေဖော်ဝါရီလ ၃ ရက်‌နေ့မှ စတင်ကာ ၈ ရက်နေ့အထိ ပြန်လည် တည်ဆောက်ပေးခဲ့ပြီး တန် ၈၀ ခံနိုင်မည့် သံမဏိ သံဘောင်တံတား အမျိုးအစားဖြစ်ကြောင်း သိရသည်။