သျှမ်းပြည် လောက်ကိုင်မြို့တွင် စစ်ပြေးဖမ်းဆီးရန် နယ်ကျွံသွားရောက်ခဲ့သော “ဝ”တပ်ဖွဲ့မှ တပ်ခွဲမှူးအဆင့်ရှိသူတစ်ဦးကို ကိုးကန့်တပ်သားများက ရိုက်နှက်ခြိမ်းခြောက်ခဲ့ကြောင်း စုံစမ်းသိရသည်။
ပြီးခဲ့သည့် မတ်လ ၅ ရက်တွင် လောက်ကိုင်မြို့သို့ စစ်ပြေးလာသူများကို ဖမ်းဆီးရန်အတွက် “ဝ”တပ်ဖွဲ့ UWSA ၏ နမ့်တစ်ဒေသ တပ်ခွဲမှူးအဆင့်ရှိသူက သွားရောက်ခဲ့သည်။
မတ်လ ၆ရက်တွင် အဆိုပါ UWSA မှ တပ်ခွဲမှူး၏ ကားသည် လောက်ကိုင်မြို့မှ ပြန်လာစဉ် ထော်လာဂျီကို ကျော်တက်ပြီး လမ်းပြောင်းပြန် မောင်းနှင်လာသည့် ကိုးကန့်တပ်သား၏ ကားကို မရှောင်နိုင်ဘဲ တိုက်မိခဲ့ရာ ၎င်းကိုးကန့်တပ်သားက အထက်အရာရှိဖြစ်သူ တပ်စုမှူးကို အခင်းဖြစ်နေရာသို့ ဖုန်းဆက်ခေါ်ဆောင်ခဲ့သည်။
ထိုယာဉ်တိုက်မှုဖြစ်ပွားသည့် နေရာသို့ တပ်စုမှူး ရောက်ရှိလာပြီး ကိုးကန့်တပ် ၂၁၁ တပ်မဟာမှူးကို ထပ်မံဖုန်းဆက်ခေါ်ဆောင်ခဲ့ရာ ၎င်းတပ်မဟာမှူးက ယာဉ်တိုက်မှုအတွက် “ဝ”တပ်ဖွဲ့မှ တပ်ခွဲမှူးကို စွပ်စွဲပြီး ပြစ်တင်ကြိမ်းမောင်းခဲ့သည်။
“ဝ”တပ်ဖွဲ့ UWSA တပ်ခွဲမှူးက ယာဉ်တိုက်မှုဖြစ်စဉ်နှင့် ၎င်း၏ အဖွဲ့အစည်း ရာထူးတို့ကို ကိုးကန့်တပ် ၂၁၁ တပ်မဟာမှူးထံ ပြောပြသော်လည်း လက်မခံခဲ့ဘဲ ကိုးကန့်တပ်ဖွဲ့မှ တပ်စုမှူးနှင့် တပ်သားများက “ဝ”တပ်ခွဲမှူးကို ဝိုင်းဝန်းရိုက်နှက်ပြီး ခြိမ်းခြောက်ခဲ့ကြောင်း ထုတ်ပြန်ချက်တွင် ရေးသားထားသည်။
ယာဉ်တိုက်မှုကို လောက်ကိုင်မြို့ရှိ ယာဉ်ထိန်းရုံးသို့ သွားရောက်ဖြေရှင်းခဲ့ရာ ကိုးကန့်တပ်ဖွဲ့မှ ကျူးလွန်သူများက “ဝ”တပ်ခွဲမှူးကို လက်ဆွဲနှုတ်ဆက်ပြီး တောင်းပန်မှုကိုသာ အခြေအနေအရ လက်ခံခဲ့ရ၍ မတ်လ ၇ ရက်တွင် နမ့်တစ်မြို့သို့ ၎င်း“ဝ”တပ်ခွဲမှူး ပြန်ရောက်သောအခါ မကျေနပ်ချက်များကို “ဝ”ခေါင်းဆောင်များထံ ပြန်လည်တိုင်ကြားခဲ့သည်ဟု ဆိုထားသည်။
ထို့ကြောင့် “ဝ”တပ်ခွဲမှူးကို ရိုက်နှက်ရာတွင် ကျူးလွန်ခဲ့သည့် ကိုးကန့်တပ်သားများကို MNDAA တပ်ဖွဲ့မှ စုံစမ်းဖော်ထုတ်ပြီး နမ့်တစ်မြို့သို့ လာရောက်တောင်းပန်ခိုင်းရန်နှင့် မလာရောက်ပါက နမ့်တစ်မြို့ရှိ “ဝ”တာဝန်ရှိသူများမှ လိုအပ်သလို အရေးယူ ဆောင်ရွက်သွားမည်ဟု “ဝ”တပ်ဖွဲ့က မတ်လ (၇)ရက်တွင် စာထုတ်ပြန်ခဲ့သည်။
“ယာဉ်တိုက်မှုနဲ့ ပတ်သက်ပြီး ပြင်ပဆက်ဆံရေးဌာနက ဖြေရှင်းနေပါတယ်။ အခြေအနေ အသေးစိတ်ကို ထွေထွေထူးထူး မသိရသေးပါဘူး”ဟု MNDAA ပြောရေးဆိုခွင့်ရှိသူ လီကျားဝင်းက သျှမ်းသံတော်ဆင့်ကို ပြန်လည်ဖြေကြားသည်။
သို့သော် ယခုဖြစ်စဉ်နှင့်ပတ်သက်ပြီး “ဝ”တပ်ဖွဲ့ UWSA ပြင်ပဆက်ဆံရေးတာဝန်ခံ ဦးညီရမ်း ကို သျှမ်းသံတော်ဆင့် က စာပို့ မေးမြန်းထားသော်လည်း ပြန်လည်တုံ့ပြန်ခြင်း မရှိသေးပေ။
ပြီးခဲ့သည့် ဖေဖော်ဝါရီလ ၁၁ ရက်တွင်လည်း ကိုးကန့်တပ်ဖွဲ့ MNDAA ထိန်းချုပ်ထားသည့် ပန်ဆိုင်း(ကြူကုတ်)မြို့ရှိ ဒေသခံများကို အစည်းအဝေး ခေါ်ယူကာ ရှမ်းပြည်တိုးတက်ရေးပါတီ SSPP/SSA နှင့် ကချင်လွတ်လပ်ရေးတပ် KIA တပ်သားများကို စစ်ဝတ်စုံဖြင့် လက်နက်ကိုင်ဆောင်လာလျှင် မြို့တွင်းသို့ ဝင်ခွင့်မပြုရန် အမိန့်ပေးညွှန်ကြားခဲ့ကြောင်း ပန်ဆိုင်းဒေသခံများက ပြောသည်။