သျှမ်းပြည် မိုးမိတ်မြို့တွင် စစ်ကောင်စီတပ်က ပြန်လည်ထိန်းချုပ်ပြီးနောက် နေအိမ်၊ ဆိုင်ခန်းရှိ ဒေသခံပစ္စည်းများကို ခိုးယူပြီး ပြန်လည်ရောင်းစားနေကြောင်း စုံစမ်းသိရသည်။
မိုးမိတ်မြို့ကို ဇန်နဝါရီလ ၂၇ ရက်တွင် စစ်ကောင်စီတပ်က ပြန်လည်ထိန်းချုပ်ပြီး ဒေသခံများ ဝင်ရောက် နေထိုင်ခွင့် မပြုသေးကြောင်းသိရသည်။
ထို့နောက် စစ်ကောင်စီ၏ ခြေလျင်တပ်ရင်း ၂၇၆ တပ်ရင်းမှ မိုးမိတ်မြို့ နေအိမ်နှင့် ဈေးဆိုင်ခန်းထဲရှိ ပစ္စည်းများကို လည်းကောင်း၊ ကျေးရွာမှ ဒေသခံပစ္စည်းများကိုလည်းကောင်း စစ်ကောင်စီ၏ ခြေလျင်တပ်ရင်း ခလရ ၂၇၆ တပ်ရင်းမှ တပ်သားများက ဖောက်ထွင်းခိုးယူခဲ့ကြောင်း ဖြစ်စဥ်ကိုသိသည့် စစ်ရေး သတင်းရင်းမြစ်တစ်ဦးက သျှမ်းသံတော်ဆင့်ကိုပြောသည်။
လက်ရှိတွင် ခိုးယူထားသည့် ဒေသခံပစ္စည်းများကို ၎င်းတို့အသုံးစာရိတ်အတွက် ပြန်လည်ရောင်းချနေကြောင်း သိရသည်။
“တစ်နေ့ကို ၁၀ ခါလောက်ရှိတယ် ခိုးခဲ့တာ။ ခိုးခဲ့တုန်းကတော့ ပြည်သူတွေ၊ ဒေသခံတွေ မြို့ထဲကိုဝင်လာလို့ မရသေးတဲ့အချိန်တုန်းကပေါ့။ ကားတွေနဲ့သယ်ထုတ်ခဲ့တာ။ ဖုန်းတွေ၊ ဆိုင်ကယ်တွေ ရှိသမျှအကုန်ပဲ ခိုးယူတာ။ အခုကပြန်ပြီးတော့ မြို့အောက်ပိုင်းက လက်ခုပ်ပင်၊ မန်ကျည်းပင်ဘက်ခြမ်းမှာ အဆက်စပ် တွေနဲ့ထုတ် ရောင်းနေတာ။ ဆိုင်ကယ်ဆိုလည်း အသစ်ကော၊ အဟောင်းကောပဲ” ဟု ၎င်းက ပြောသည်။
စစ်ကောင်စီတပ်ဖွဲ့မှ ခိုးယူသွားသည့် ဒေသခံဆိုင်ကယ်များမှာ အဟောင်းဖြစ်လျှင် တစ်စီးကို အနည်းဆုံး မြန်မာကျပ်ငွေ ၆ သိန်း တန်ဖိုးရှိပြီး အသစ်ဖြစ်ပါက တစ်စီးလျှင် အနည်းဆုံး မြန်မာကျပ်ငွေ ၁၀ သိန်းကျော် အထိရှိရာ စစ်ကောင်စီတပ်ဖွဲ့က ရသလောက်ဈေးနှုန်းဖြင့် ပြန်လည်ရောင်းချနေကြောင်း သိရသည်။
အလားတူ ဇန်နဝါရီလ ၂၇ ရက်တွင် မိုးမိတ်မြို့လယ်လမ်းတွင် ဖွင့်လှစ်ထားသည့် ဆိုင်ကယ်အရောင်း ဆိုင်များမှ ကျပ်သိန်း ၂၀၀၀ ကျော် တန်ဖိုးရှိ ဆိုင်ကယ်အများအပြားကိုလည်း မိုးမိတ်စစ်ကောင်စီတပ် ခလရ-၂၇၆ မှ ကားကြီးများဖြင့် သယ်ဆောင်သွားခဲ့ပြီး အပြစ်မဲ့ အရပ်သားပြည်သူများကို ဖမ်းဆီးစစ်ဆေးမှုများ ရှိနေကြောင်း မျက်မြင်တွေ့ရှိခဲ့သည့် မိုးမိတ်ဒေသခံများက သျှမ်းသံတော်ဆင့်ကို ပြောသည်။
မိုးမိတ်မြို့သည် သျှမ်းပြည်မြောက်ပိုင်း နှင့် မန္တလေးတိုင်းဒေသ ထိစပ်နေသည့် နယ်နမိတ်တွင် ရှိသည့် အလျှောက် ပြင်ဦးလွင်မှ မိုးကုတ်-မိုးမိတ်-မဘိမ်း-ဗန်းမော်အထိ ဆက်သွယ်ထားသည့် ပြည်ထောင်စုလမ်းကြီး သည်လည်း စစ်ကောင်စီတပ်ဖွဲ့မှ စစ်အင်အားဖြည့်တင်းရန်အတွက် အရေးပါသော လမ်းကြောင်းတစ်ခု ဖြစ်သည်။
ထို့အပြင် သျှမ်းမြောက် “၁၀၂၇ စစ်ဆင်ရေး” အတွင်း ညီနောင်မဟာမိတ်မှ စစ်ကောင်စီထံ သိမ်းဆည်းရမိသည့် လက်နက်ခဲယမ်းများအား စစ်ကိုင်းတိုင်းရှိ PDF တပ်ဖွဲ့များအတွက် ပို့ဆောင်ရန်အတွက်လည်း အရေးပါသည့် လမ်းကြောင်းဖြစ်ကြောင်း စစ်ရေးသတင်းရင်းမြစ်က ပြောသည်။
စစ်ကောင်စီတပ်ဖွဲ့အနေဖြင့် မိုးမိတ်မြို့ကို ၁ လကျော်ကြာ ထိန်းချုပ်ထားပြီးဖြစ်သော်လည်း ဒေသခံအများစုမှာ နေရပ်သို့ပြန်လည်နေထိုင်ခြင်း မရှိပေ။
“ပြန်နေတဲ့သူတွေတော့ ပြန်နေပြီ။ ကျနော်တို့ကတော့ ပြန်လို့မရသေးဘူး။ အိမ်ရှိတဲ့သူတွေကတော့ သန့်ရှင်းရေး လုပ်ပြီး နေကြတယ်။ မရှိတဲ့သူကတော့ ဘုန်းကြီးကျောင်းတွေမှာ နေတယ်။ အခုကပျက်စီးသွားတဲ့ အိမ်တွေ လည်း ပြန်ဆောက်ဖို့ကြတော့ မလွယ်တော့ဘူး။ ကုန်ပစ္စည်းဈေးနှုန်း၊ ကားခတွေနဲ့ ဆိုရင်တော့ မလွယ်ဘူးလေ။ ပိုက်ဆံရှိတဲ့သူတွေတောင် မန္တလေး၊ ပြင်ဦးလွင် စတဲ့မြို့တွေမှာ အခြေချဖို့လုပ်နေကြပြီ။ ကျနော်တို့ကတော့ မသိသေးဘူး” ဟု မိုးမိတ်မြို့ ဒေသခံအမျိုးသားတစ်ဦးက ပြောသည်။
မိုးမိတ်မြို့တွင် စစ်ကောင်စီတပ်ဖွဲ့နှင့် ကချင်လွတ်လပ်ရေးတပ်မတော် KIA၊ PDF ပူးပေါင်းတပ်ဖွဲ့တို့ အကြားတိုက်ပွဲများကြောင့် ဒေသခံနေအိမ်ထိခိုက်ပျက်စီးမှု ၅၀၀ ကျော်ရှိကြောင်း နေရပ်ပြန်သွားသည့် ဒေသခံများထံမှသိရသည်။
ထို့အတူ နေရပ်သို့ပြန်လာသည့် ဒေသခံများကို စစ်ကောင်စီတပ်ဖွဲ့က ဖမ်းဆီးနှိပ်စက်ခြင်း၊ သတ်ဖြတ်ခြင်းများ ပြုလုပ်ခဲ့သောကြောင့် ဒေသခံအများစုမှာ ပြန်နေရန် လုံခြုံရေးစိုးရိမ်နေကြသည်။
