သျှမ်းပြည် ဆီဆိုင်မြို့နယ်အတွင်း ပအိုဝ်းအမျိုးသားလွတ်မြောက်ရေးတပ်မတော် PNLA နှင့် စစ်ကောင်စီတပ်တို့ အကြား တိုက်ပွဲဆက်လက်ဖြစ်ပွားနေသေးကြောင်း စုံစမ်းသိရသည်။

ဆီဆိုင်မြို့ကို PNLA တပ်နှင့် ပူးပေါင်းမဟာမိတ် တော်လှန်ရေးတပ်ပေါင်းစု တပ်ဖွဲ့များက တစ်လကျော်ကြာ ထိန်းချုပ်လာပြီးနောက် စစ်ကောင်စီတပ်သည် ပြန်လည်ထိန်းချုပ်နိုင်ရန်အတွက် တန်ပြန်ထိုးစစ်ဆင်မှု များကြောင့် တိုက်ပွဲဆက်လက်ဖြစ်ပွားနေကြောင်း ဒေသခံများထံမှ သိရသည်။

“တိုက်ပွဲကတော့ ဆီဆိုင်မြို့တွင်းမှာ ဖြစ်တာကတော့ ဖြစ်နေတယ်။ ဘာလို့လဲဆိုတော့ ဆီဆိုင်မြို့ကို ပြန်ရဖို့ စစ်ကောင်စီက ထိုးစစ်နေတာ။ မနေ့ညကလည်း ဆိုက်ခေါင်ကနေ လက်နက်ကြီးပစ်နေတာ” ဟု ဆိုက်ခေါက်ကျေးရွာဒေသခံတစ်ဦးက ပြောသည်။

ယမန်နေ့ (မတ်လ ၄ ရက်) နံနက်အစောပိုင်း အချိန်မှစပြီး ဆီဆိုင်မြို့ကို စစ်ကြောင်းထိုးလာသည့် စစ်ကောင်စီတပ်ဖွဲ့ကို PNLA တပ်ဖွဲ့က ပြင်းပြင်းထန်ထန်ပြန်လည်ခုခံတိုက်ခိုက်ခဲ့သဖြင့် မြို့၏မြောက်ဘက်နေရာမှာ တိုက်ပွဲပြင်းထန်စွာ ဖြစ်ပွားခဲ့ကြောင်းလည်း PNLA မှ ယနေ့ (မတ်လ ၅ ရက်)၌ ထုတ်ပြန်ထားသည်။

ယင်းကဲ့သို့ တိုက်ပွဲဖြစ်ပွားပြီးနောက် စစ်ကောင်စီတပ်က မြို့ထဲကို လက်နက်ကြီးဖြင့် အကြိမ် ၄၀ ကျော် ဖတ်ခတ်တိုက်ခဲ့၍ နေအိမ်တချို့လည်း ထိခိုက်ပျက်စီးခဲ့ကြောင်း ရေးသားဖော်ပြထားသည်။

လက်ရှိအချိန်ထိ ဆီဆိုင်မြို့နယ်တွင် တိုက်ပွဲဆက်လက်ဖြစ်ပွားနေသောကြောင့် နေအိမ်များထပ်မံ ပျက်စီးသွားမည်ကို စိုးရိမ်နေကြောင်း ဒေသခံအမျိုးသားတစ်ဦး ပြောသည်။

“အရင်ကမထိတဲ့ အိမ်တော်တော်များ ကျန်သေးတယ်။ ခုတော့တစ်လုံးပြီး တစ်လုံးကျန်နေပြီ။ အိမ်ခြေ ၇၀ ရှိတဲ့ ရပ်ကွက်ဆိုပါတော့ဗျာ၊ ၇ လုံးကျန်ရင် ကံကောင်းပဲ” ဟု ၎င်းဒေသခံတစ်ဦးက ပြောသည်။

တိုက်ပွဲစတင်ဖြစ်ပွားချိန် ဇန်နဝါရီလ ၂၁ ရက်မှစပြီး ဆီဆိုင်မြို့နယ်၊ ဟိုပုံးမြို့နယ်နှင့် လွိုင်လင်မြို့နယ်တွင် စစ်ကောင်စီ၏ လေကြောင်းတိုက်ခိုက်မှုများနှင့် လက်နက်ကြီးပစ်ခတ်မှုများကြောင့် အရပ်သားသေဆုံးမှု ၄၇ ဦးအထိရှိပြီး၊ ကလေးငယ်နှင့် အမျိုးသမီးအပါအဝင် အရပ်သားထိခိုက်မှု ၅၉ ဦး မြင့်တက်လာနေကြောင်း ပအိုဝ်းလူငယ်အစည်းအရုံး Pa-O Youth Organization က မတ်လ ၂ ရက်၌ ထုတ်ပြန်ထားသည်။

ယင်းတိုက်ခိုက်မှု၊ ပစ်ခတ်မှုများကြောင့် တစ်လကျော်ကြာအတွင်း ဒေသခံနေအိမ်၊ အဆောက်အအုံ ထိခိုက်ပျက်စီးမှု ၁၇၅ အထိ မြင့်တက်လာသည်ဟု သိရသည်။

အလားတူ တိုက်ပွဲကြောင့် သျှမ်းတောင် ဆီဆိုင်၊ ဟိုပုံးနှင့် လွိုင်လင် မြို့နယ်တွင် မိမိနေရပ် အိုးအိမ်စွန့်ပစ်ပြီး ထွက်ပြေးတိမ်းရှောင်နေရသည့် စစ်ဘေးရှောင်ဦးရေ စုစုပေါင်း ၁ သိန်းခန့်အထိ မြင့်တက်လာပြီး အများစုမှာ တောင်ကြီး၊ ညောင်ရွှေ၊ အောင်ပန်း စသည့် မြို့နှင့်ကျေးရွာများဘက်သို့ တိမ်းရှောင်သွားကြသည်။

သို့သော် စစ်ဘေးရှောင်တချို့မှာ ဆီဆိုင်မြို့နယ်နှင့် ဟိုပုံးမြို့နယ်အတွင်းရှိ တောတောင်ထဲသို့ စစ်ပြေးခိုလှုံနေကြပြီး အမိုးအကာ၊ ဆေးဝါးနှင့် စားနပ်ရိက္ခာလိုအပ်နေလျက်ရှိကြောင်း စစ်ရှောင်ကူညီသူများထံမှ သိရသည်။