Wednesday, May 22, 2024

နမ့်စန်မြို့ စစ်မှုထမ်းရန် လူဦးရေစာရင်း လိုက်လံ ကောက်ခံနေ ၊ ပိုက်ဆံပါ ပေးဆောင်ရ

Must read

သျှမ်းပြည် လွိုင်လင်ခရိုင်၊ နမ့်စန်မြို့နယ်အတွင်းရှိ အိမ်ထောင်စုစာရင်းများမှ စစ်မှုထမ်းရန် အတွက် လူဦးရေ စာရင်းကို အာဏာသိမ်း စစ်ကောင်စီမှ လိုက်လံ ကောက်ယူနေကြောင်း သတင်းသိရသည်။

ယမန်နေ့ (ဖေဖော်ဝါရီလ ၂၉) ရက်တွင် နမ့်စန်မြို့ အထွေထွေအုပ်ချုပ်ရေးမှူးရုံး ဌာန (ထွေ/အုပ်) မှ တစ်ဆင့် နမ့်စန်မြို့ ရှိ ရပ်ကွက် အုပ်ချုပ်ရေးမှူးများ၊ ကျေးရွာအုပ်ချုပ်ရေးမှူးများကို အစည်း အဝေးခေါ်ယူကာ စစ်မှုထမ်းရန် အတွက် စာရင်းကောက်ယူမည်ဟု ပြောဆို ရှင်းလင်းခဲ့ကြောင်း အသက် (၃၀) ဝန်းကျင် ဒေသခံ အမျိုးသား တစ်ဦးက သျှမ်းသံဝော်ဆင့်ကို ပြောသည်။

“ပထမတစ်ဆင့် အနေနဲ့ အိမ်ထောင်စု ဇယားလိုက်ကောက်မယ်တဲ့၊ ပြီးတော့ စစ်မှုထမ်းဖို့အတွက် အသက်ပြည့်ပြီး တဲ့သူ တစ်ယောက်စာအတွက်ကို ပိုက်ဆံ ၂၀၀၀ ကျပ်လည်း ပေးဆောင်ရမယ်တဲ့။ ထောက်ပံ့စားရိတ်လို့ တော့ပြောတယ်။ နောက်ဆို ပိုတောင်းလာမှာလည်း မသိဘူး” ဟု အသက် (၃၀) ဝန်းကျင် နမ့်စန်မြို့ခံ အမျိုးသား တစ်ဦးက သျှမ်းသံဝောာ်ဆင့်ကို ပြောသည်။

လက်ရှိအချိန်တွင် နမ့်စန်မြို့ရှိ ရပ်ကွက် နှင့် ကျေးရွာများ အချို့၌ စစ်ကောင်စီတပ်မှ အိမ်ထောင်စုစာရင်း လိုက်လံကောက်ယူမှု စတင်လုပ်ဆောင်နေသည့်အတွက် ဒေသခံများက လူအပြင် ပိုက်ဆံပါ ပေးဆောင်ရန် အတွက် ရင်လေးနေကြကြောင်းလည်း သိရသည်။

စစ်ကောင်စီထံ စစ်မှုမထမ်းလိုသည့် နမ့်စန်မြို့မှ ဒေသခံအမျိုးစုသည် ပြည်ပသို့ ထွက်ခွာမှု များပြား နေကြောင်းလည်း ၎င်းအမျိုးသားက သျှမ်းသံဝောာ်ဆင့်ကို ဆက်ပြောသည်။

“လူရော ငွေရော ပေးရမယ်ဆိုတော့ သူတို့ကို အများကြီး ပေးဆောင်ရမှာကို ပြည်သူတွေက ကြောက်နေကြတာ။ သူတို့ထံမှာ စစ်မှုလည်း မထမ်းချင်ကြတော့ လူငယ်အများစုက ပြည်ပ လွတ်ကြတာများတယ်။ အများစုက ထိုင်းဘက်ထွက်ပြေးသွားကြတာပေါ့” ဟု အထက်ပါ နမ့်စန်မြို့ခံ အမျိုးသားက ပြောသည်။

နမ့်စန်မြို့သည် စစ်ကောင်စီ အခြေစိုက် မြို့ဖြစ်သော်လည်း လက်ရှိ နိုင်ငံရေး နှင့် စစ်ရေး အခြေအနေများကြောင့် စစ်မှုထမ်း မဖြစ်ချင်ကြသည့် ပြည်သူအများစုက ပိုင်ဆိုင်မှုများ ထုခွဲရောင်းချကာ ပြည်ပထွက်သူများ၊ နေရာပြောင်းရွှေ့မှုများ ပြုလုပ်နေကြကြောင်းလည်း သိရသည်။

ပြီးခဲ့သည့် ဧပြီလ ၁၀ ရက်နေ့တွင် ထုတ်ပြန်လာသည့် အသက် ၁၈ နှစ်ပြည့် အမျိုးသား နှင့် အမျိုးသမီးများ အသုတ်လိုက် စစ်မှုမထမ်း မနေရသည့် စစ်ကောင်စီ၏ ဥပဒေကြောင့် ပြည်သူအများစု ထိတ်လန့်ကြသလို လူငယ်အများစုက ပြည်ပထွက်ခွာမှုများပြားနေကြခြင်းဖြစ်သည်။

ထို့အပြင် စစ်အာဏာသိမ်းမှု ၃ နှစ်တာ ကာလအတွင်း၌ နမ့်စန်မြို့တွင်း တရားမဝင် လောင်းကစားဝိုင်းများ၊ ဂိမ်းဆိုင်များ ပေါ်တင်ဖွင့်လှစ်မှုများပြားလာပြီး ဒေသအတွင်း ခိုးဆိုးလုယက်မှုလည်း ပေါများလာကြောင်း ဒေသခံများထံမှ သိရသည်။

Leave a Comments

- Advertisement -spot_img

Latest article