သျှမ်းပြည် တစ်ပတ်ကျော်ကြာ ပိတ်ထားသော မိုင်းပွန် တံတားကို ယနေ့ (မတ်လ ၁) ရက် နံနက်ပိုင်းတွင် ပြန်ဖွင့် လိုက်ကြောင်း သတင်းရရှိသည်။
မိုင်းပွန်မြို့နှင့် ဟိုပုံးမြို့ကြားတွင် တိုက်ပွဲများဖြစ်ပွားနေသော်လည်း လမ်းကို ပြန်လည်ဖွင့်လစ် လိုက်သည့်အတွက် ဒေသခံနှင့် ကားသမားများအတွက်တော့ စိုးရိမ်နေရကြောင်း သိရသည်။
” လက်ရှိမှာ တိုက်ပွဲက ဖြစ်နေဆဲပါ။ ဒီမနက်ထိ လက်နက်ကြီးသံတွေကြားနေရတုန်းပါ။ မိုင်းပွန်တံတားပြန်ဖွင့်ပေမယ့် စိုးရိမ်ရတယ်လေ။ ဒီမှာပိတ်နေတာ တပတ်ကြာပြီဆိုတော့ ပြန်ဖွင့်တာလည်းကောင်းပါတယ်” ဟု ကားသမားတစ်ဦးက သျှမ်းသံတော်ဆင့်ကိုပြောသည်။
လွန်ခဲ့သည့် ဖေဖော်ဝါရီ (၂၁ ) တွင်လည်း ထမ်းစမ်းဂူအနီးတွင် စစ်ကောင်စီ၊ PNA ပူးပေါင်းနှင့် ပအိုဝ်းအမျိုးသားလွတ်မြောက်ရေး တပ်မတော် (PNLA) တို့ တိုက်ပွဲဖြစ်ပွားမှုကြောင့် ကားသမား ၂ဦး လက်နက်ကြီးထိမှန်ခဲ့ကြောင်း သိရသည်။
ထိုတိုက်ပွဲများကြောင့် ဖေဖော်ဝါရီ ၂၁ရက်မှ စတင်ကာ မိုင်းပွန်တံတားကို စတင်ပိတ်ခဲ့သည်။ ထို့ လမ်းကြောင်းပိတ်မှုကြောင့် ပင်လုံ- ဟိုပုံ လမ်းကြောဖြစ်သည့် ကျောက်တန်းလမ်းကို ကားသမားက အသုံးပြုခဲ့ရာ ကားအစီး(၁၅)စီးအထက် တိမ်းမှောက်ကာ သေဆုံးမှုလည်းရှိခဲ့သည်။
ထို့ပြင် တိုက်ပွဲကြောင့် မိုင်းပွန်နှင့် အနီးတဝှိက်ပြည်သူများလည်း ထွက်ပြေးတိမ်းရှောင်ခဲ့သည်။
ဆက်လက်ပြီး ယမန်နေ့ ပအိုဝ်းအမျိုးသားလွတ်မြောက်ရေးအဖွဲ့ချုပ် PNLO ဥက္ကဌ ဗိုလ်ချုပ်ခွန်သူရိန် မှ “စစ်အာဏာရှင်စနစ် အမြစ်ပြတ် မကျဆုံးသရွေ့ တိုက်ပွဲတွေလည်း ပြီးဆုံးမည်မဟုတ်ကြောင်း ” ယမန်နေ့ (ဖေဖော်ဝါရီ ၂၉)ရက်တွင် ပြောဆိုခဲ့သည်။
