သျှမ်းပြည်၊ တောင်ကြီးခရိုင်၊ ညောင်ရွှေမြို့နယ်အနီး၌ လက်နက်များ တင်ဆောင်လာသည့် ကားတစ်စီးကို အာဏာသိမ်း စစ်ကောင်စီ တပ်ဖွဲ့ နှင့် ၎င်း၏ လက်အောက်ခံ ပူးပေါင်းတပ်ဖွဲ့ PNA တို့က စစ်ဆေးဖမ်းဆီးရမိကြောင်း စုံစမ်းသိရသည်။

ပြီးခဲ့သည့် ရက်ပိုင်းအတွင်းတွင် အာဏာသိမ်း စစ်ကောင်စီ နှင့် ပအိုဝ်းပြည်သူ့စစ် PNA တို့ စောင့်ကြပ်စစ်ဆေးနေသည့် ညောင်ရွှေမြို့နယ်၊ မှော်ဘီကျေးရွာတောင်ဘက်ရှိ စစ်ဆေးရေးဂိတ်၌ လက်နက်များကို စစ်ဆေးဖမ်းဆီးရမိခြင်းဖြစ်ကြောင်း သိရသည်။

“ငှက်ပျောသီး ပင်နဲ့ အဖီးတွေကို အပေါ်ကနေတင်ပြီး လက်နက်တွေကို အောက်မှာ ဝှက်ပြီးသယ်လာတဲ့ ကားပေါ့နော်။ အဲ့ဒီမှာ စကစ နဲ့ PNA တွေက စစ်ဆေးပြီး တွေ့မိသွားတာ။ ကားပေါ်မှာ ပါတဲ့ အမျိုးသား (၃) ဦးလည်း အဖမ်းခံရတယ်” ဟု ဖြစ်စဥိကို သိရှိသည့် အမည်မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

ယင်းကဲ့သို့ လက်နက်စစ်ဆေး ဖမ်းဆီးရမိပြီးသည့်နောက်ပိုင်းတွင် အဆိုပါ လမ်းကြောင်းလည်း ပိတ်ထားပြီး လမ်းသွားလမ်းလာနှင့် ဈေးသည်များ အားလုံးကို စစ်ကောင်စီတို့ဘက်မှ တင်းကြပ်သည့် စစ်ဆေးမှု ပြုလုပ်ခဲ့ကြောင်းလည်း သိရသည်။

အဆိုပါ လမ်းကြောင်းသည် မှော်ဘီကျေးရွာ တောင်ဖက် လွိုင်ကော်သွားလမ်း၊ အနောက်ဖက် ပင်လောင်းလမ်း ၊မြှောက်ဖက်တောင်ကြီးလမ်းနှင့်အရှေ့ဖက် ဆီဆိုင်မြို့သွားလမ်း ဆုံသည့် နေရာဖြစ်ကြောင်းလည်း သိရသည်။

“ကားလမ်းကတော့ တစ်ရက်ပဲ ပိတ်ပြီး ပြန်ဖွင့်ပေးတယ်။ မဖွင့်ပေးလည်း အဆင်မပြေဘူးလေ။ ဈေးသည်တွေ က အစ ဒီလမ်းကိုပဲ အသုံးပြုနေရတာ။ ဒါပေမဲ့ ဖမ်းဆီးခံရတဲ့ (၃) ယောက်ရဲ့ အခြေအနေကိုတော့ မသိရသေးဘူး” ဟု အထက်ပါ ပုဂ္ဂိုလ်က သျှမ်းသံဝောာ်ဆင့်ကို ဆက်ပြောသည်။

ညောင်ရွှေမြို့နယ်၊ မှော်ဘီကျေးရွာ အနီး၌ လက်ရှိ လက်နက်စစ်ဆေးဖမ်းမိသည့် စစ်ဆေးရေးဂိတ် အပါအဝင် စစ်ကောင်စီ၏ စစ်ရေးဂိတ် နှစ်နေရာ ရှိနေပြီး ငွေကြေးကောက်ခံ တောင်းယူမှုနှင့် စစ်ဆေးမှု တင်းကြပ်မှု ရှိနေသည့် အတွက် ဒေသခံများက ခက်ခဲနေကြောင်းလည်း သိရသည်။

လက်ရှိတွင် လက်နက်နှင့်အတူ စစ်ဆေးဖမ်းမိသည့် ကားပေါ်ပါ အမျိုးသား (၃) နှင့်လည်း အဆက်အသွယ် မရသေးသည့်အပြင် ၎င်းတို့ကို မည်သည့်နေရာသို့ ဖမ်းဆီးခေါ်ဆောင်ထားကြောင်းကိုလည်း မသိရသေးကြောင်း သိရသည်။