စစ်ကောင်စီ အသက်သွင်းထားသည့် ပြည်သူ့စစ်မှုထမ်း ဥပဒေအရ အသက်ကျော်လွန် အကျုံးမဝင်တော့သည့် အမျိုးသားများအား သက်ဆိုင်ရာ မြို့နယ်၊ ရပ်ကွက်/ကျေးရွာများတွင် ပြည်သူ့စစ်အဖြစ် ပစ်မှတ်ထား ဦးစားပေး စုဆောင်းရန် စစ်ကောင်စီက ညွှန်ကြားထားကြောင်း စစ်ရေး သတင်းရင်းမြစ်က ယနေ့ (ဖေဖော်ဝါရီ ၂၉ ရက်) တွင် ပြောသည်။

“ပြည်သူ့စစ်မှုထမ်း ဥပဒေက စစ်တပ်မှာ တာဝန်ထမ်းဆောင်ရမှာ။ ပြည်သူ့စစ်၊ အရပ်အခေါ် ပျူစောထီးပေါ့၊ သူကတော့ ရပ်ရွာ လုံခြုံရေး ခေါင်းစဥ်နဲ့သွားတာ မတူဘူး။ ပြည်သူစစ်က အသက်အရွယ် ကန့်သတ်တာ တိတိကျကျ မရှိဘူး။ ကျန်းမာရေး ကောင်းတယ်ဆို ဆွဲထည့်လို့ ရတယ်ပေါ့” ဟု စစ်ရေး သင်းရင်းမြစ်က ရှင်းပြသည်။

လက်ရှိ နိုင်ငံတ၀ှမ်း စစ်ကောင်စီက ဒေသအလိုက် ပြည်သူ့စစ်များ အလျင်စလို ဖွဲ့စည်းပြီး လက်နက် တပ်ဆင်နေရာ စစ်မှုထမ်းရန် အကြုံးမဝင်သည့် အမျိုးသားများ ဦးစားပေး ရွေးချယ် တာဝန်ပေးရန် ညွှန်ကြားထားခြင်း ဖြစ်ကြောင်း ၄င်းကဆက်ပြောသည်။

စစ်တပ်အာဏာသိမ်းပြီးနောက်ပိုင်း နိုင်ငံအနှံ့ ပြည်သူ့ကာကွယ်တပ်မတော် (PDF) ၏ တိုက်ခိုက်မှုများကို တန်ပြန်ရန် ၂၀၂၂ ခုအတွင်းက စတင်ပြီး ဒေသအလိုက် ပြည်သူ့စစ်များ စတင်ဖွဲ့စည်းလာပြီး စစ်ကောင်စီက စစ်သင်တန်း ပေးနေသည်မှာ ယနေ့တိုင် ဖြစ်သည်။

လက်ရှိ တိုက်ပွဲ ပြင်းထန်နေသည့် ဒေသများရှိ ပြည်သူစစ်များကို စစ်ကောင်စီက လက်နက်များ ထုတ်ပေးနေရာ ယခုလအတွင် သျှမ်းတောင် အခြေစိုက် ပအိုဝ်းပြည်သူ့စစ် (PNO/PNA) ကို စစ်တပ်က လက်နက် အများအပြား ထုတ်ပေးခဲ့သည်။

ပြည်သူ့စစ် မဟာဗျူဟာ ဆိုသည်မှာ စစ်တပ်၊ အုပ်ချုပ်ရေးယဣ္တရား၊ ဌာနဆိုင်ရာများ၊ ပရဟိတ အပါအဝင် အသင်းအဖွဲ့များ၊ နိုင်ငံရေးပါတီများ စသည်ဖြင့် နိုင်ငံအတွင်းရှိ အဖွဲ့စုံ ကွန်ရက် သဖွယ်ချိတ်ဆက်၍ သတင်းစုဆောင်းကာ ဘက်ပေါင်းစုံမှ ဝိုင်းဝန်းချေမှုန်းသည့် မဟာဗျူဟာဟု စစ်ရေး သတင်းရင်းမြစ်က ရှင်းပြသည်။

သို့သော် ပြည်သူ့စစ် မဟာဗျူဟာသည် ပြည်ပ ကျူးကျော်မှုကို ရင်ဆိုင်ရချိန် တစ်နိုင်ငံလုံး အမျိုးသားရေး စိတ်ဓါတ် တက်ကြွစွာ ပါဝင်နိုင်သည့် အခြေအနေ အတွက် ရေးဆွဲထားသည့် ဗျူဟာဖြစ်ပြီး ယခုလို ပြည်သူ တစ်ရပ်လုံး စစ်ကောင်စီတပ်ကို မုန်းတီးနေစဥ် အောင်မြင်မှု မရနိုင်ဟု လေ့လာသူများက သုံးသပ်ထားသည်။

ပြည်သူ့စစ်မှုထမ်း ဥပဒေကို စစ်ခေါင်းဆောင်ဟောင်း ဗိုလ်ချုပ်မှူးကြီးသန်းရွှေ ၂၀၁၀ ခုနှစ်က ပြဋ္ဌာန်းခဲ့ပြီး လက်ရှိ စစ်ကောင်စီက ဖေဖော်ဝါရီ ၁၀ ရက်တွင် စတင်အသက်သွင်းခြင်း ဖြစ်ကာ ယင်းဥပဒေအရ အသက် ၁၈ နှစ်မှ ၃၅ နှစ်အတွင်း အမျိုးသားများနှင့် ၁၈ နှစ်မှ ၂၇ နှစ်အတွင်း အမျိုးသမီးများ စစ်မှုထမ်းရမည် ဖြစ်သည်။

ပညာရှင်ဟု သတ်မှတ်ခံရသည့် အမျိုးသားများ အနေဖြင့် အသက် ၁၈ နှစ်မှ ၄၅ နှစ်၊ အမျိုးသမီးများ အနေဖြင့် အသက် ၁၈ နှစ်မှ ၃၅ နှစ်အတွင်း စစ်မှုထမ်းရန် တာဝန်ရှိမည် ဖြစ်သည်။

သို့သော် စစ်မှုထမ်းရန် အတွက် အမျိုးသမီးများအား ခေါ်ယူရန် လတ်တလော အစီအစဥ် မရှိသေးဟု စစ်ကောင်စီက ပြင်ဆင် ကြေညာခဲ့သည်။

လာမည့် ဧပြီလတွင် စတင် ခေါ်ယူမည့် ပထမအကြိမ် အတွက် စစ်မှုထမ်းရန် လူငယ် အမျိုးသား ငါးသောင်း ဝန်းကျင် ခေါ်ယူမည်ဟု စစ်ကောင်စီ ပြောခွင့်ရ ဗိုလ်ချုပ် ဇော်မင်းထွန်းက ပြောဆိုထားသည်။

လက်ရှိ နိုင်ငံတဝှမ်း လူငယ်လူရွယ်များကို အကြောင်းအမျိုးမျိုးပြကာ စစ်ကောင်စီက ဖမ်းဆီးနေပြီး အတင်းအကျပ် စစ်သား စုဆောင်းနေသည်ဆိုသည့် သတင်းများလည်း ကျယ်ကျယ်ပြန့်ပြန့် ထွက်ပေါ်နေသည်။