သျှမ်းပြည် ဆီဆိုင်မြို့သို့ အတွင်း တိုက်ပွဲကြားပိတ်မိနေသည့် အရပ်သားများနေ့စဥ်နှင့် အမျှ ကျည်ထိမှန်ကြောင်း စုံစမ်းသိရသည်။ 

ယနေ့ (ဖေဖော်ဝါရီလ ၂၂ ရက်) နံနက်ပိုင်းမှစပြီး ဆီဆိုင်မြို့မှ ထွက်ပြေးလာကြသော စစ်ဘေးရှောင် ကလေးငယ်အပါအဝင် အမျိုးသား ၂ ဦးစစ်ကောင်စီမှ ပစ်လိုက်သည့် လက်နက်ကြီးထိမှန်ခဲ့သည်။

ထို့ပြင် စစ်ဘေးရှောင် ၂၀ ကျော်သည် ကား၊ ဆိုင်ကယ်မရှိသဖြင့် လမ်းတစ်ဝက်မှာပိတ်မိနေကြောင်း သွားရောက်ကူညီသည့်ဒေသခံ တစ်ဦးက သျှမ်းသံတော်ဆင့်ကို ပြောသည်။ 

“အဓိကတော့ လက်နက်ကြီးနဲ့ ဒရုန်းကြောင့် ထိခိုက်ဒဏ်ရာရတာပါ။ ဆီဆိုင်မြို့မှာက အခုဘယ်နားမှာ နေစရာမရှိဘူး။ ဘယ်နားပဲ ဖြစ်ဖြစ် အဲ့လိုမျိုးတွေ ဖြစ်နေတာ။ ကလေ တစ်ယောက်လည်း ပါသေး တယ်။ ပြီးတော့ကားမရှိ၊ ဆိုင်ကယ်မရှိလို့ ထွက်လာလို့မရတဲ့ လူတွေလည်း အခုထိသွားကယ် ထုတ်ဖို့လုပ်နေတယ်” ဟု ၎င်းဒေသခံတစ်ဦးက ပြောသည်။ 

အလားတူ ယမန်နေ့ (ဖေဖော်ဝါရီလ ၂၁ ရက်) တွင် ဆီဆိုင်မြို့မှ ထွက်ပြေးလာသည့် မိသားစု ၅ ဦးသည်လည်း လက်နက်ထိမှန်ပြီး အမျိုသမီး ၂ ဦး ပြင်းပြင်းထန်ထန် ဒဏ်ရာရကာ အမျိုးသား ၃ ဦးသည်လည်း ထိခိုက်ဒဏ်ရာ အနည်းငယ် ရရှိခဲ့ကြောင်း ဆိုသည်။ 

ဇန်နဝါရီလနောက်ဆုံးပတ်မှစပြီး ဆီဆိုင်မြို့ကို ပအိုဝ်းအမျိုးသားလွတ်မြောက်ရေးတပ်မတော် PNLA နှင့် ပူးပေါင်းမဟာမိတ် တော်လှန်ရေး အင်အားစုအဖွဲ့များတို့ ထိန်းချုပ်လာပြီးနောက် စစ်ကောင်စီသည် ပြန်လည် ထိန်းချုပ်နိုင်ရေးအတွက် တန်ပြန်ထိုးစစ်နေခြင်း ဖြစ်သည်။ 

ယင်းကဲ့သို့ ပြန်လည်ထိန်းချုပ်နိုင်ရေး ကြိုးပမ်းရာမှ စစ်ကောင်စီသည် လက်နက်ကြီး၊ ဒရုန်းဖြင့် ဦးတည်ရာမဲ့ ပစ်ခတ်မှုများကြောင့် ဆီဆိုင်မြို့သို့ ပစ္စည်းပြန်သယ်ယူသည့် စစ်ဘေးရှောင်များ (ဖေဖော်ဝါရီလ ၁၉ ရက်) ၌ လက်နက်ကြီးထိမှန်ပြီး ၇ ဦးသေဆုံးကာ ၆ ဦးပြင်းပြင်းထန်ဒဏ်ရာရှိခဲ့သည်။

အဆိုပါ စစ်ကောင်စီမှ လက်နက်ကြီး၊ လေကြောင်းဖြင့် အရပ်သားကို ပစ်မှတ်တိုက်ခိုက်သည့်အပေါ် ပအိုဝ်းလူငယ်အစည်းအရုံး Pa-o Youth Organization မှ ခွန်ဦးက သျှမ်းသံတော်ဆင့်ကို ပြောသည်။

“ဒီအပြစ်မဲ့ အရပ်သားပြည်သူတွေကို စစ်ကောင်စီဘက်က ပစ်မှတ်ထားပြီး တိုက်ခိုက်တာ လူသားမဆန်တဲ့ ကိစ္စရပ်တစ်ခုဖြစ်တယ်။ ဒါစစ်ရာဇဝတ်မြောက် သလိုမျိုး၊ ကြီးလေးတဲ့ လူ့အခွင့်အရေး ချိုးဖောက်မှုလည်း ဖြစ်တယ်။ ဒါတွေကို ဒီတိုင်းထားလို့တော့ မရဘူး။ ဒါကို စေခိုင်းတဲ့သူ၊ ကျူးလွန်တဲ့သူက ပြန်ပြီးတော့မှာဘဲ တာဝန်ခံဖို့လိုအပ်ပါတယ်။ တာဝန်ခံပေးရမှာ ဖြစ်ပါတယ်” ဟု ၎င်းကပြောသည်။ 

ပြီးခဲ့သည့် ဇန်နဝါရီလ ၂၁ ရက်မှစပြီး သျှမ်းပြည်တောင်ပိုင်းအတွင်း တိုက်ပွဲဖြစ်ပွားလာပြီးနောက် ၁ လကြာ တိုက်ပွဲကြား အရပ်သား ၃၀ ကျော်သေဆုံးပြီး ၅၀ ခန့်ထိခိုက်ဒဏ်ရာရှိခဲ့သည်။