သျှမ်းပြည် လွိုင်လင်ခရိုင် ပင်လုံမြို့တွင် စစ်ကောင်စီတပ်၏ လက်နက်ကြီး ပစ်ခတ်သံကို ညအချိန်၌ စတင်ကြားနေရကြောင်း စုံစမ်းသိရသည်။
ယမန်နေ့ (ဖေဖော်ဝါရီလ ၂၁ ရက်) ညအချိန်က လွိုင်လင်ခရိုင် ပင်လုံမြို့ အနောက်ဘက်တွင် နေထိုင်သည့် ပြည်သူများမှ မိုင်းပွန်မြို့အဝင် တပ်ကုန်းရှိ စစ်ကောင်စီတပ် ခမရ-၅၁၇ က ရမ်းသမ်းပစ်ခတ်သည့် လက်နက်ကြီးသံများကို စတင်ကြားခဲ့ရကြောင်း ပင်လုံမြို့ ဒေသခံများက ပြောသည်။
“ညဆိုတော့ မိုင်းပွန်ဘက်က လက်နက်ကြီးပစ်တဲ့ ပဲ့တင်သံလား မပြောတတ်ဘူး။ မိုင်းပွန်နဲ့ ပင်လုံကြား မြို့အနောက်ဘက်လောက် ဖြစ်မယ်၊ လက်နက်ကြီးသံ ကြားတာပေါ့။ သေနတ်ပစ်သံတော့ မကြားရဘူး။ မိုင်းပွန်မြို့အဝင် တပ်ကတော့ လက်နက်ကြီး ပစ်တယ်လေ”ဟု ပင်လုံမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် မိုင်းပွန်တံတားကို စစ်ကောင်စီတပ်က ဆက်လက်ပိတ်ထားဆဲဖြစ်ပြီး ကားများ ပိတ်မိလျက်ရှိကာ နမ့်စန်မြို့မှ လာသော ကားများလည်း လွိုင်လင်မြို့တွင် ပိတ်မိနေသည်ဟု ဒေသခံများက ပြောသည်။
“တိုက်ပွဲအခြေအနေက ဘယ်လိုလာဦးမလဲ မသိသေးဘူး။ မနေ့က စပြီး လွိုင်လင်-မိုင်းပွန်-ဟိုပုန်းလမ်းက ပိတ်ထားပြီ။ ပင်လုံအနီးတဝိုက်မှာ စစ်ရေးလှုပ်ရှားမှုကတော့ မတွေ့ရသေးဘူး။ အခုတော့ သတင်းနားထောင်နေရတာ။ ပင်လုံဘက်မှာတော့ စစ်ကောင်စီနဲ့ SSPP မတိုက်ရင် ဘယ်သူမှတော့ မရှိဘူး”ဟု ပင်လုံမြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် ၂၀၂၃ နိုဝင်ဘာလ ၁၆ ရက်နေ့က ကရင်နီ အမျိုးသားတိုးတက်ရေးပါတီ KNPP နှင့် PDF တပ်ဖွဲ့များထံ ပို့ဆောင်မည့် အထူးဒေသ တစ်ခုမှ လာသော လက်နက်ခဲယမ်း အမြောက်အများကို ပင်လုံမြို့တွင် ဖမ်းဆီးရမိခဲ့ကြောင်း စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက မီဒီယာများသို့ ဖြေကြားထားသည်။
