သျှမ်းပြည် တာချီလိတ်မြို့၌ ကားတစ်စီးမှ ပေါက်ကွဲမှု ဖြစ်ပွားခဲ့ပြီး ကားအတွင်း ရှိနေသည့် အမျိုးသား တစ်ဦးမှ ထိခိုက်ဒဏ်ရာများ ရရှိသွားကြောင်း စုံစမ်းသိရသည်။
ယမန်နေ့ ဖေဖော်ဝါရီလ ၂၀ ရက်နေ့ ည ၁၀ နာရီဝန်းကျင် အချိန်၌ တာချီလိတ်မြို့ ဝန်းကျာက်ရပ်ကွက် ၊ ဗိုလ်ချုပ်အောင်ဆန်း လမ်းမကြီး၊ ရွှေလင်းယုန် ဂေါက်ဂွင်းအနီး၌ ကားတစ်စီးမှ ပေါက်ကွဲမှု ဖြစ်ပွားခဲ့ကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ကားကနေ ပေါက်ကွဲမှုဖြစ်တာလို့ပဲ သိရတယ်။ ဘယ်လိုကြောင့် ပေါက်ကွဲမှု ဖြစ်စေလဲဆိုတာကိုတော့ မသိရသေးဘူး။ တာဝန်ရှိသူတွေကတော့ စုံစမ်း စစ်ဆေးနေတုန်းပဲလို့ ပြောတယ်။ ကားထဲမှာ ယာဥ်မောင်း တစ်ယောက်ပဲပါတယ်” ဟု လုံခြုံရေး အရ အမည်မဖော်လိုသည့် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ပေါက်ကွဲမှုကြောင့် အသက် (၄၀) ဝန်းကျင် အမျိုးသား၏ ဝမ်းဗိုက်၊ မျက်နှာ၊ လက်မောင်း နှင့် ဆီးခုံတို့၌ ထိခိုက်ဒဏ်ရာ ပြင်းထန်စွာ ရရှိသွားပြီး တာချီလိတ်မြို့ ပြည်သူ့ဆေးရုံ၌ ဆေးကုသမှု ခံယူနေလျက်ရှိကြောင်း လည်း သိရသည်။
ယင်းပေါက်ကွဲနှင့်ပတ်သက်ပြီး စီးပွားရေး ပြဿနာကြောင့် လုပ်ကြံခံရမှု ဖြစ်နိုင်ကြောင်းလည်း အထက်ပါ ဒေသခံက ပြောဆိုသုံးသပ်ထားသည်။
“ထင်သလောက်တော့ စီးပွားရေး ပြဿနာ တစ်ခုခု ရှိလို့ လုပ်ကြံခံရတာ ဖြစ်နိုင်တယ်။ သူ့ကားပေါ် တက်ပြီး စက်နိုးတာနဲ့ ပေါက်ကွဲမှုဖြစ်တာလို့ ပတ်ဝန်းကျင်မှာ နေတဲ့သူတွေကပြောတယ်။” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ဆက်ပြောသည်။
တာချီလိတ်မြို့သည် မြန်မာ – ထိုင်းနယ်စပ် ကုန်သွယ်ရေးမြို့ ဖြစ်သည့် အလျှောက် လူဝင် လူထွက် များပြားနေလျက်ရှိပြီး တရားမဝင်လုပ်ငန်းများ၊ လောင်းကစားဝိုင်းများပေါများလျက်ရှိပြီး ပစ်ခတ်သတ်ဖြတ်မှုများလည်း မကြာခဏ ဖြစ်ပွားလျက်ရှိသည်။
စစ်တပ်မှ နိုင်ငံတော် အာဏာသိမ်းယူပြီး နောက်ပိုင်း တာချီလိတ်မြို့အတွင်း ပေါက်ကွဲမှုများ၊ ပစ်ခတ်မှုများ၊ ခိုးယူ လုယက်မှုများ မကြာခဏ ဖြစ်ပွားလေ့ရှိသည့်အတွက် ညအချိန် အပြင်ထွက် သွားလာခြင်းများ နည်းပါးကြောင်း သိရသည်။
