ရန်ကုန်မြို့ရှိ ထိုင်းသံရုံးတွင် ဗီဇာလျှောက်ထားခြင်းများနှင့် ပတ်သက်၍ အွန်လိုင်းတိုကင်စနစ်ဖြင့် ပြောင်းလဲသွားမည်ဖြစ်ကြောင်း သတင်းသိရသည်။
ယမန်နေ့ (ဖေဖော်ဝါရီလ ၂၀ ရက်)တွင် ရန်ကုန်မြို့ရှိ မြန်မာနိုင်ငံဆိုင်ရာ ထိုင်းသံရုံးမှ ဗီဇာလျှောက်ထားခြင်းနှင့် ပတ်သတ်၍ သံရုံးရှေ့တွင် လူကိုယ်တိုင် တန်းစီစနစ်အား ဖျက်သိမ်းပြီး ဖေဖော်ဝါရီလ ၂၂ ရက်မှ စတင်၍ အွန်လိုင်းမှတဆင့် တစ်ရက်လျှင် တိုကင်အခု ၄၀၀ နှုန်းဖြင့် လျှောက်ထားနိုင်ကြောင်း ကြေငြာချက်ထုတ်ပြန်ခဲ့သည်။
ထိုင်းသံရုံး ဝက်ဘ်ဆိုဒ်မှ အွန်လိုင်းစနစ်ဖြင့် ဗီဇာလျှောက်ထားရန် ရက်ချိန်းယူသည့်အခါ လျှောက်ထားသူသည် အီးမေးလ်လိပ်စာ၊ နိုင်ငံကူးလက်မှတ်တွင် ပါရှိသည့်အတိုင်း လူအမည်နှင့် ပတ်စပို့နံပါတ် တူညီပြီး မှန်ကန်ရမည်ဟု ဆိုထားသည်။
အွန်လိုင်းစနစ်ဖြင့် ဗီဇာလျှောက်ထားရန် ပက်စပို့နံပါတ် တစ်ခုအတွက် တစ်ကြိမ်သာ လျှောက်ထားနိုင်ပြီး တခြားသူထံသို့ လွှဲပြောင်းအသုံးပြုခြင်း ပြုလုပ်နိုင်မည်မဟုတ်ကြောင်း သိရသည်။
ထို့အပြင် ထိုင်းနိုင်ငံသို့ တရားမဝင် လာရောက်ပါက အရေးယူခံရမည်ဟုလည်း ထိုင်းဝန်ကြီးချုပ် ဆေထာ ထဝီဆင်က သတိပေးလိုက်ကြောင်း ဘန်ကောက်ပို့စ် သတင်းတွင် ဖေဖော်ဝါရီလ ၁၉ ရက်တွင် ရေးသားထားသည်။
“ထိုင်းနိုင်ငံကို တရားဝင်လမ်းကြောင်းကနေ လာရင်တော့ ကြိုဆိုပါတယ်။ ဒါပေမဲ့ တရားမဝင် လာရောက်ရင်တော့ ဥပဒေအရ အရေးယူခံရမှာပါ။ ဒါတွေကို လုံခြုံရေးတပ်ဖွဲ့တွေနဲ့ ဆွေးနွေးထားပြီး ဖြစ်ပါတယ်”ဟု ထိုင်းဝန်ကြီးချုပ်က ဘန်ကောက်ပို့စ် သတင်းကို ပြောသည်။
စစ်ကောင်စီက ဖေဖော်ဝါရီလ ၁၀ ရက်တွင် နိုင်ငံသားတိုင်း စစ်မှုမထမ်းမနေရ ပြည်သူ့စစ်မှုထမ်းဥပဒေကို အသက်သွင်းပြီးနောက် ထိုင်းနိုင်ငံသို့ တရားဝင် သွားရောက်ရန် ထိုင်းသံရုံးသို့ ဗီဇာလျှောက်ထားသည့် မြန်မာနိုင်ငံသား အရေအတွက်သည် အလွန်များပြားလျက်ရှိကြောင်း ဗီဇာလျှောက်ထားသူများထံမှ သိရသည်။
အခြားတစ်ဘက်တွင် စစ်ကောင်စီတပ်နှင့်အပြိုင် သျှမ်းပြည်အတွင်းရှိ တိုင်းရင်းသားလက်နက်ကိုင်တပ်ဖွဲ့ အသီးသီးတို့မှ တပ်သားသစ် စုဆောင်းမှုများလည်း ရှိလာခြင်းကြောင့် လူငယ်များမှာ ထိုင်းနိုင်ငံသို့ နည်းလမ်းမျိုးစုံဖြင့် သွားရောက်ရန် ပြင်ဆင်နေကြောင်း ဒေသခံများက ပြောသည်။
ထိုင်းနိုင်ငံ သွားမည့်သူများကို ဖေဖော်ဝါရီ ဒုတိယပတ်မှ စတင်၍ SSPP တပ်ဖွဲ့မှ ပိတ်ပင်ဖမ်းဆီးလျက်ရှိကာ မိသားစုလိုက် နိုင်ငံခြားသို့ ထွက်ပြေးတိမ်းရှောင်သူများ၏ နေအိမ်ဥစ္စာများကို သိမ်းဆည်းမည်ဟုလည်း RCSS တပ်ဖွဲ့က ဖေဖော်ဝါရီ ၁၉ ရက်တွင် ထုတ်ပြန်လာသည်။
စစ်ကောင်စီဘက်မှလည်း နိုင်ငံခြားတွင် ကျောင်းတက်နေသူများ၊ အလုပ်လုပ်ကိုင် နေသူများအနေဖြင့် စစ်မှုထမ်းဆောင်ခွင့်ကို ယာယီရွှေ့ဆိုင်းနိုင်သော်လည်း ပညာသင်ကြားမှု ပြီးဆုံးချိန်နှင့် လုပ်ငန်းဆောင်ရွက်ပြီးချိန်တွင် သတ်မှတ်ကာလ ပြီးဆုံးသည့်အထိ စစ်မှုထမ်းရမည်ဖြစ်ကြောင်း စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက မီဒီယာများသို့ ဖြေကြားထားသည်။
