သျှမ်းပြည်နယ် တောင်ပိုင်း၊ ဆီဆိုင်မြို့ကို စစ်ကောင်စီတပ်က တင့်ကား၊ သံချပ်ကာကားများ အပါအဝင် စစ်အင်အား အလုံးအရင်း အသုံးပြု ထိုးစစ်ဆင်ရန် ပြင်ဆင်နေကြောင်း စစ်ရေးသတင်းရင်းမြစ်က ယနေ့ (ဖေဖော်ဝါရီ ၂၀ ရက်) တွင် ပြောသည်။
ပအိုဝ်းအမျိုးသား လွတ်မြောက်ရေး တပ်မတော် (PNLA) ထိန်းချုပ်ထားသည့် ဆီဆိုင်မြို့ ပြန်ရရေး မိုင်းဆတ်မြို့ အခြေစိုက် စကခ (၁၄) လက်အောက်ခံ ခလရ (၄၉) နှင့် ခလရ (၂၇၇) တပ်များ ရွှေညောင်မြို့ရှိ ထောက်ပို့တပ်တွင် စစ်လက်နက် ပစ္စည်းများ ထုတ်ယူပြီး အသင့်စောင့်ဆိုင်းနေသည်ဟု ၄င်းကဆိုသည်။
ထို့အပြင် ဟိုပုံး၊ ဆီဆိုင် ထိုးစစ် အတွက် သျှမ်းတောင်နှင့် သျှမ်းအရှေ့ရှိ ၀မ်ဆင်း ခလရ (၂၈၇)၊ နောင်ဝိုး ခလရ (၂၉၂)၊ တာဆန်း ခလရ (၂၉၄)၊ တာကော် ခလရ (၂၉၆)၊ ကျိုင်းခမ်း ခမရ (၅၁၀)၊ မိုင်းကိုင် ခလရ (၅၁၄) တပ်များ စုဖွဲ့ ပြင်ဆင်နေသည်ဟု ၄င်းကထပ်မံ ပြောဆိုသည်။
“ကစထမှူး ဦးစီးပြီး ယာယီစစ်ဆင်ရေးဗျူဟာ တစ်ခုထိုင်ပြီး တိုက်စစ်ဆင်မယ်လို့ သိရပါတယ်။ ဘန်းယဉ်ဘက်ကို အင်အားဖြည့်မယ်လို့ သိရပါတယ်။ အခု စုဖွဲ့နေတဲ့ တပ်အများစုက တိုင်းစစ်ဌာနချုပ်လက် အောက်ခံတပ်တွေ” ဟု ၄င်းကရှင်းပြသည်။
လက်ရှိ ဆီဆိုင်မြို့ကို ပအိုဝ်းအမျိုးသား လွတ်မြောက်ရေးတပ်မတော် (PNLA) က ထိန်းချုပ်ထားပြီး နေ့စဥ် စစ်ကောင်စီတပ် လေကြောင်း တိုက်ခိုက်မှုနှင့် လက်နက်ကြီး ပစ်ခတ်မှုကြောင့် နေအိမ် အဆောက်အအုံ များစွာ ပျက်စီးခဲ့သည်။
ယမန်နေ့က ဆီဆိုင်မြို့နယ်၊ ဝါးတောရွာအနီး စစ်ကောင်စီတပ် ဒရုန်းဖြင့် ဗုံးကြဲတိုက်ခိုက်ရာ အရပ်သား ပြည်သူ ၇ ဦး ပွဲချင်းပြီး သေဆုံးခဲ့ကြောင်း သိရသည်။
ပြီးခဲ့သည့် ဖေဖော်ဝါရီလ ၁၇ ရက်၊ ည ၉ နာရီကလည်း ထမ်းယံနှင့် ထီတမ် ကျေးရွာတွင် စစ်ကောင်စီတပ် လက်နက်ကြီးကြောင့် နေအိမ်ပျက်စီးကာ ကလေးငယ် အပါအဝင် အရပ်သား ၂ ဦးသေဆုံးပြီး ၇ ဦး ဒဏ်ရာရရှိခဲ့သေးသည်။
မြို့တွင်း တိုက်ပွဲအတွင်း စစ်ကောင်စီတပ်နှင့် PNO ပြည်သူ့စစ် တပ်သား အများအပြား သေဆုံးပြီး အလောင်းအများအပြား ကျန်ခဲ့၍ ကောင်းမွန်စွာ သင်္ဂြိုဟ်ပေးခဲ့ကြောင်း PNLA က ဖေဖော်ဝါရီ ၁၂ ရက်နေ့တွင် ထုတ်ပြန်ထားသည်။
တိုပ်ပွဲများကြောင့် ဆီဆိုင်နှင့် ဟိုပုန်း ဒေသခံ စုစုပေါင်း တစ်သိန်းနီးပါး စစ်ဘေးရှောင်နေရပြီး အကူအညီများစွာ လိုအပ်နေသည်ဟု စစ်ဘေးရှောင်များအား ကူညီပေးနေသည့် တောင်ကြီးနှင့် ရွှေညောင် ဒေသခံများက ပြောသည်။
Leave a Comments