သျှမ်းပြည် လောက်ကိုင်မြို့ ဆုံဖုန်းထ အပိုင်းရှိ ဈေးဟောင်းတွင် မီးလောင်ခဲ့ခြင်းကြောင့် တရုတ်ယွမ်ငွေ ၁၀ သန်းခန့် ပျက်စီးဆုံးရှုံးခဲ့ရကြောင်း သတင်းသိရသည်။
ဖေဖော်ဝါရီလ ၁၈ ရက် နေ့လယ်ပိုင်းတွင် လောက်ကိုင်မြို့ ရပ်ကွက်(၃) ဆုံဖုန်းထ အပိုင်းရှိ ဈေးဟောင်းတွင် မီးလောင်ကျွမ်းခဲ့ခြင်းကြောင့် ကုန်စုံဆိုင်၊ အဝတ်အထည်ဆိုင် အပါအဝင် ဆိုင်ခန်း ၁၆ ခန်းထက်မနည်း မီးလောင်ပျက်စီးခဲ့ပြီး ပျက်စီးဆုံးရှုံးမှု တန်ဖိုးသည် တရုတ်ယွမ်ငွေ ၁၀ သန်းခန့် (မြန်မာကျပ်ငွေ ကာလပေါက်ဈေး သိန်း ၅ သောင်းနီးပါး) ရှိကြောင်း ကိုးကန့် မီဒီယာမှ ဖေဖော်ဝါရီ ၁၉ ရက်တွင် ထုတ်ပြန်လာသည်။
လောက်ကိုင်ဈေးတွင် မီးစတင်လောင်ကျွမ်းသည့် အကြောင်းရင်းကို မသိရှိရသေးဘဲ ဆိုင်ခန်းများတွင် ရောင်းချသည့် မီးရှူးမီးပန်းနှင့် ဗျောက်အိုးများလည်း လွှင့်စင်ပေါက်ကွဲခြင်းကြောင့် MNDAA ၏ မီးသတ်တပ်ဖွဲ့မှ ၅ နာရီအကြာတွင်မှ မီးငြိမ်းသတ်နိုင်ခဲ့ကြောင်း ထုတ်ပြန်ချက်တွင် ဆိုထားသည်။
မီးလောင်ကျွမ်းခဲ့သည့် လောက်ကိုင်ဈေးဟောင်း အနီးတဝိုက်တွင် လူနေအိမ်ခြေ သိပ်သည်းသော်လည်း လူထိခိုက်မှု မရှိကြောင်း လောက်ကိုင်မြို့ ဒေသခံများထံမှ သိရသည်။
အလားတူ ဖေဖော်ဝါရီလ ၂ ရက်နေ့ကလည်း ပန်ဆိုင်း(ကြူကုတ်)ရှိ မြို့မဈေးအတွင်း လျှပ်စစ်မီးဝါယာရှောခ့်ကြောင့် ဈေးဆိုင်ခန်း ၈၀ နီးပါး မီးလောင်ပြာကျခဲ့ပြီး ပျက်စီးဆုံးရှုံးမှုတန်ဖိုးမှာ တရုတ်ယွမ်ငွေ ၂,၃၇၉,၄၀၀ (မြန်မာကျပ်ငွေ သိန်း ၁၀၀၀၀ ကျော်) ရှိကြောင်း ကိုးကန့်မီဒီယာမှ ဖေဖော်ဝါရီလ ၆ ရက်နေ့တွင် ထုတ်ပြန်ထားသည်။
ကိုးကန့်တပ်ဖွဲ့ MNDAA ၏ ထိန်းချုပ်မှုအောက်ရှိ လောက်ကိုင်မြို့တွင် အုပ်ချုပ်ရေး၊ ပညာရေးနှင့် ပြန်လည်တည်ဆောက်ရေး လုပ်ငန်းများ ဆောင်ရွက်နေကြောင်း ကိုးကန့်အထူးဒေသ(၁) စစ်ရေးအုပ်ချုပ်မှုကော်မတီက ကြေညာထားသည်။
တရုတ်နှစ်သစ်ကူးပြီးနောက် ပိတ်ထားခဲ့သည့် လောက်ကိုင်မြို့ရှိ စာသင်ကျောင်းများကိုလည်း ဖေဖော်ဝါရီ ၁၇/၁၈ ရက်တို့တွင် မူလတန်း၊ အလယ်တန်းများအတွက် ကျောင်းအပ်လက်ခံခဲ့ပြီး ဖေဖော်ဝါရီ ၁၉ ရက်တွင် ပြန်လည်ဖွင့်လှစ်ခဲ့သည်။
လောက်ကိုင်မြို့တွင် ပြန်လည်ဖွင့်လှစ်သည့် ကောင်းတုံအထက်တန်းကျောင်းတွင်လည်း ယခင် ပညာသင်နှစ် လက်ကျန်အတန်းများကို ဆက်လက်သင်ကြားပေးနေပြီး ကိုးကန့်တပ်ဖွဲ့၏ ပညာရေးနှင့် ယဉ်ကျေးမှုဌာန သတ်မှတ်ချက် ကိုက်ညီသည့် မြန်မာလူမျိုး ဆရာ/မ ၃ ဦးသာ ရှိကြောင်း ဖေဖော်ဝါရီ ၁၈ ရက် ထုတ်ပြန်ချက်အရ သိရသည်။
လက်ရှိ လောက်ကိုင်မြို့နယ်တွင် ပြန်လည်တည်ဆောက်ရေး လုပ်ငန်းများအတွက် အလုပ်သမားများ ပြန်လည်ခေါ်ယူနေသော်လည်း ၎င်းတို့အထဲတွင် ရန်သူ့သူလျှို ပါလာလျှင် ကုမ္ပဏီနှင့် အလုပ်ရှင်များကို အရေးယူသွားမည်ဟု ကိုးကန့်တပ်ဖွဲ့ MNDAA က ပြောသည်။
