သျှမ်းပြည် ဆီဆိုင်မြို့သို့ ပစ္စည်းပြန်သယ်ယူသည့် လူငယ် ၄ ဦးသည် အဆက်အသွယ် ပြတ်တောက်ပြီး ပျောက်ဆုံးသွားသဖြင့် မိသားစုဝင်များက စိုးရိမ်နေကြသည်။
ဖြစ်စဉ်မှာ ဆီဆိုင်မြို့တိုက်ပွဲကြောင့် ဘန်းယဉ်ကျေးရွာသို့ ထွက်ပြေးတိမ်းရှောင်လာသည့် လူငယ် ၃ ဦးသည် စောင်နှင့်အဝတ်အထည်များ ပြန်ယူရန် နေအိမ်ရှိ ဆီဆိုင်မြို့သို့ ပြန်နေစဉ် (ဖေဖော်ဝါရီလ ၁၄ ရက်) တွင် လမ်း၌ပျောက်ဆုံးသွားခဲ့ခြင်း ဖြစ်သည်။
ထိုချိန်မှစပြီး လက်ရှိအချိန်ထိ ၆ ရက်ကြာပြီးဖြစ်သော်လည်း မည်သည့် သတင်းအချက်မှ မရသေးသောကြောင့် မိသားစုဝင်များက စိုးရိမ်နေကြောင်း ပျောက်ဆုံးသူလူတစ်ဦး၏ မိသားစုဝင်က သျှမ်းသံတော်ဆင့်ကို ပြောသည်။
“ကျမတို့ထွက်ပြေးလာတုန်းက ဘာမှမပါလာခဲ့ဘူးလေ။ အဲ့နဲ့သားက စောင်ပြန်ယူမယ်ဆိုပြီး သူ့သူငယ်ချင်း ၂ ယောက်နဲ့ ဆိုင်ကယ်နဲ့ ပြန်သွားတာ။ အိမ်ရောက်လား၊ မရောက်လားမသိဘူး။ အဲ့ဘက်လည်း ဖုန်းလိုင်း အဆက်သွယ်ပြတ်တော့ သတင်းအစအနလည်းမသိရဘူး။ အခုက ဆီဆိုင်မြို့ထဲဝင်လို့လည်းအဆင်မပြေ။ ဒီကစိတ်တွေပူ၊ ဘာလုပ်ရမှန်း မသိဘူး။ တစ်ရက်လောက် မတွေ့ရရင်မနေနိုင်ဘူး။ ရက်တွေများတော့လည်း ပိုဆိုးတာပေါ့” ဟု ပြောသည်။
ပျောက်ဆုံးနေသည့် လူငယ်များမှာ အသက် ၁၉ နှစ်အရွယ် မောင်အောင်မြတ်ကျော်၊ အသက် ၂၀ နှစ်ကျော် မောင်အောင်ပြည့်စုံနှင့် မောင်ဇာနည်သူ စုစုပေါင်း လူငယ် ၃ ယောက်ဖြစ်သည်။
အလားတူ ဆီဆိုင်မြို့နယ် ဆိုက်ခေါင်ကျေးရွာသို့ ပြောင်းတင်ရန် သွားသည့် အသက် ၄၃ ကျော်အရွယ် ကိုဇော်မြင့်ဦးလည်း (ဖေဖော်ဝါရီ ၁၇ ရက်) ညနေပိုင်းတွင် လမ်း၌ ပျောက်ဆုံးသွားခဲ့ကြောင်း ၎င်း၏ဇနီးဖြစ်သူ ပြောသည်။
“သူကပြောင်းသွားသယ်တာ။ ကားနှစ်စီးနဲ့သွားတာ။ သူကသယ်ပြီးပြန်လာတဲ့အချိန်မှာ သူ့သူငယ်ချင်းရဲ့ ကားက ဘီးပေါက်လို့ ဆိုက်ခေါက်လမ်းခွဲအထွက်မှာ လာကူဦးဆိုပြီး သူကသွားပြန်ကူတာ။ ကက္ကူနဲ့ကနေ ဆိုင်ကယ်လမ်းကြုံနဲ့ လိုက်သွားပြီး ကားတယာတွေဘာတွေဝယ်ပြီး သူငယ်ချင်းကို လမ်းမှာစောင့် နေခဲ့တယ်ပြောတယ်။ ဖြစ်ချင်တော့ အဲ့ချိန်ကားတွေပေးမဖြတ်တော့ သူ့သူငယ်ချင်းနဲ့ မတွေ့လိုက်ရဘူး။ ဖုန်းလိုင်းလည်း ပိတ်သွားတယ်ပြောတယ်။ နောက်မနက်သူ့သူငယ်ချင်းက သူရောက်တဲ့ နေရာကိုလာချတော့ မတွေ့တော့ဘူး။ ပျောက်သွားတယ်” ဟု ၎င်း၏ ဇနီးဖြစ်သူက ပြောသည်။
ဆီဆိုင်မြို့နယ်အတွင်း တိုက်ပွဲပြင်းထန်နေသောကြောင့် ဆိုက်ခေါင်မှ ဆီဆိုင်မြို့သို့ ဆက်သွယ်သည့် ပြည်ထောင်စုလမ်းမကြီး၊ ကျေးရွာလမ်းငယ်များ နှင့် မွေတော်က္ကူမှ ဆီဆိုင်မြို့သို့ ဆက်သွယ်သည့် တောလမ်းများအား အသုံးပြုသွားလာခြင်း မပြုကြသေးရန် ပအိုဝ်းအမျိုးသားလွတ်မြောက်ရေး တပ်မတော် PNLA က ဖေဖော်ဝါရီလ ၁၀ ရက်တွင် ထုတ်ပြန်ထားသည်။
တစ်ဖက်တွင်လည်း စစ်ကောင်စီတပ်ဖွဲ့မှ နိုင်ငံသားတိုင်း စစ်မှုမထမ်းမနေရ စစ်မှုထမ်းဉပဒေကို စတင်အသက် သွင်းလာပြီးနောက် တိုင်းနှင့်ပြည်နယ် အသီးသီးတွင် ဒေသခံလူငယ်များ ပေါ်တာဆွဲခံရခြင်း ဖြစ်စဉ်များ ရှိနေသည်။
ထို့အပြင်း ပအိုဝ်းပြည်သူ့စစ် PNO က ၎င်းထိန်းချုပ်ရာဒေသအတွင်း တစ်ရွာလျှင် အမျိုးသား ၅ ဦး စစ်မှုထမ်းရန် အမိန့်ထုတ်ထားပြီး စစ်သင်တန်းပေးကာ လက်နက်တပ်ဆင်ပေးနေလျက်ရှိသည်။
Leave a Comments