ရန်ကုန်မြို့၊ သုဝဏ္ဏ အားကစားရုံ၌ ရွှေနဂါးတရုတ်နှစ်သစ်ကူး ပွဲတော်ကို ယမန်နေ့ (ဖေဖော်ဝါရီလ ၁၈ ရက်) က ကျင်းပရာ စစ်ခေါင်းဆောင် မင်းအောင်လှိုင် အကြီးအကျယ် တက်ရောက် ဆင်နွှဲ ခဲ့သည်ဟု စစ်ကောင်စီက ယနေ့ ထုတ်ပြန်သည်။

အဆိုပါ အခမ်းအနားသို့ စစ်ခေါင်းဆောင်နှင့် အတူ တရုတ်နိုင်ငံ ဆိုင်ရာ မြန်မာ သံအမတ်လည်း တက်ရောက်ခဲ့ပြီး ‘ပန်းတိုင်းပွင့်ပါစေ’ သီချင်း သံပြိုင် သီဆို ဆင်နွှဲခဲ့သည်ဟု ဆိုသည်။

အခမ်းအနားတွင် ပျူခေတ်ချစ်ကြည်ရေး ကိုယ်စားလှယ်အဖွဲ့ တစ်ဖွဲ့ တရုတ်နိုင်ငံသို့ သွားရောက်ခဲ့ကြောင်း၊ အဆိုပါ အချက်ကြောင့် ပျူခေတ် မတိုင်မီကတည်းက တရုတ်-မြန်မာ ဆက်ဆံရေး ခိုင်မာခဲ့ကြောင်း စစ်ခေါင်းဆောင်က ပြောသည်။

ထို့အပြင် နိုင်ငံတကာ စာမျက်နှာ၌ တရုတ်နိုင်ငံ၏ ကူညီရပ်တည်မှုများ အတွက် အမွှန်းတင် ပြောဆိုလိုက်ပြီး အွန်လိုင်း ငွေလိမ်ဂိုဏ်းများ အပါအဝင် နယ်စပ်ဖြတ်ကျော် တရားမဝင် လုပ်ငန်းများ နှိမ်နင်းရေး တရုတ်နှင့်တက်ကြွစွာ ပူးပေါင်းနေကြောင်း ထည့်သွင်းပြောဆိုသည်။

တရုတ် သမ္မတ ရှီကျင့်ဖျင်၏ ကမ္ဘာလုံးဆိုင်ရာ လုံခြုံရေး အစီအမံ (Global Security Initiative– GSI) အောင်မြင်စွာ အကောင်အထည် ဖော်နိုင်မှုများကို မြန်မာနိုင်ငံက အစောဆုံး ထောက်ခံပေးခဲ့ကြောင်း၊ ရံဖန်ရံခါ တွေ့ကြုံရသည့် ပဋိပက္ခအချို့ကို နှစ်နိုင်ငံ ငြိမ်းချမ်းစွာ ဖြေရှင်းခဲ့ကြောင်း စစ်ခေါင်းဆောင်က ဆိုသည်။

တရုတ်နှစ်သစ်ကူးကာလ တရုတ်နိုင်ငံ၌ ပြည်သူများ စိတ်အေးချမ်းသာစွာ ပျော်ရွှင်နေသည်ကို မြင်တွေ့ရ၍ ဝမ်းသာကြည်နူးမိပါကြောင်း၊ မြန်မာနိုင်ငံ တည်ငြိမ်အေးချမ်းရေး အကူအညီ ပေးရန်လည်း ၄င်းက တောင်းဆိုခဲ့သည်။

ပြီးခဲ့လပိုင်းက စစ်တပ် ထောက်ခံသူများ ပြည်တွင်းရေး ဝင်မစွက်ရန် ရန်ကုန် တရုတ်သံရုံးရှေ့တွင် ဆန္ဒပြခဲ့သေးသည်။