သျှမ်းပြည် မူဆယ်မြို့ M2 ဟိုတယ်ရှေ့တွင် လင်မယားနှစ်ဦးကို ဆိုင်ကယ်မောင်းနှင်လာသည့် အမည်မသိ သေနတ်ကိုင်ဆောင်သူများမှ သေနတ်ပစ်ခတ်သွားကြောင်း စုံစမ်းသိရသည်။
ယမန်နေ့ (ဖေဖော်ဝါရီလ ၁၇ ရက်) မွန်းလွဲ ၂ နာရီခန့်တွင် မူဆယ်မြို့ ဈေးရပ်ကွက်ရှိ M2 ဟိုတယ်ရှေ့တွင် လင်မယားနှစ်ဦးကို ဆိုင်ကယ်မောင်းနှင်လာသည့် အမည်မသိ သေနတ်ကိုင်ဆောင်သူနှစ်ဦးမှ သေနတ်ပစ်ခတ်သွားခြင်းကြောင့် အမျိုးသား သေဆုံးပြီး အမျိုးသမီးမှာ ဒဏ်ရာပြင်းထန်ကြောင်း မူဆယ်ဒေသခံများက ပြောသည်။
“ဧည့်သည်နှစ်ယောက်က ဟိုတယ်မှာတည်းဖို့ ကားနဲ့လာတာ။ နောက်ကနေ ဆိုင်ကယ်နဲ့ လူနှစ်ယောက်က ပစ္စတိုသေနတ်နဲ့ လာပစ်သွားတယ်။ လင်မယားနှစ်ယောက်က တရုတ်လူမျိုးဖြစ်မယ်၊ ယောကျ်ားကတော့ သေနတ်ဒဏ်ရာနဲ့ ဆုံးသွားပြီ”ဟု မူဆယ်မြို့မှ ဖြစ်စဉ်သိရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိအချိန်ထိ ပြစ်မှုကျူးလွန်သူများကို ဖမ်းဆီးရမိခြင်း မရှိသေးဘဲ ထွက်ပြေးလွတ်မြောက်နေဆဲဖြစ်ကြောင်း သိရသည်။
မူဆယ်မြို့သည် မြန်မာ – တရုတ် နယ်စပ်ကုန်သွယ်ရေးမြို့ ဖြစ်သည့်အပြင် လက်နက်ကိုင် အဖွဲ့အစည်းများ နှင့် တရားမဝင် လုပ်ငန်းများ စုံလင်ပေါများသည့် ဒေသဖြစ်သည့်အတွက် သေနတ်ပစ်ခတ်မှု၊ ဓားပြတိုက်မှုနှင့် ပြန်ပေးဆွဲမှုများလည်း မကြာခဏ ဖြစ်ပွားလေ့ရှိသည်။
“အခု မြို့ထဲနေတာတောင် မလုံခြုံတော့ဘူးလို့ ခံစားရတယ်။ ဘယ်အဖွဲ့ကမှန်း မသိရတဲ့ လူတွေလည်း သေနတ်ကိုင်ပြီး ခြိမ်းခြောက်ပြန်ပေးဆွဲတာ မကြာခန လာလုပ်နေတယ်။ အခုလဲ ပစ်သွားတော့ သေပြီလေ။ အဖွဲ့အစည်း ပေါင်းစုံက ဆက်ကြေးပဲ လာကောက်တတ်တာ”ဟု မူဆယ်မြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် ဖေဖော်ဝါရီလ ၆ ရက်နေ့ကလည်း မူဆယ်မြို့ ဈေးရပ်ကွက်နေ စစ်ကောင်စီလက်အောက်ခံ မြို့နယ်စီမံအုပ်ချုပ်ရေး အဖွဲ့ဝင်နှင့် ပြည်သူ့စစ်အဖွဲ့ဝင်တစ်ဦး၏ နေအိမ်သို့ အမျိုးသား ၄ ဦးမှ လက်နက်ကိုယ်စီ ကိုင်ဆောင်ပြီး ဝင်ရောက်ဓားပြတိုက်ခဲ့ကြောင်း မူဆယ်ဒေသခံများထံမှ သိရသည်။
လက်ရှိတွင် တရုတ်နှစ်သစ်ကူးပြီးနောက် မူဆယ်မြို့နယ်အတွင်း ညီနောင်မဟာမိတ် ပူးပေါင်းတပ်ဖွဲ့နှင့် အာဏာသိမ်း စစ်ကောင်စီ တို့အကြား စစ်ရေးတင်းမာမှုများလည်း ရှိနေသေးသည့်အတွက် ပြည်သူများက စစ်ရေး၊ လုံခြုံရေးအတွက် စိုးရိမ်ကြောက်လန့်နေရကြောင်း သိရသည်။
Leave a Comments