သျှမ်းပြည် မူဆယ်မြို့နယ်တွင် တရုတ်နယ်စပ် ဖြတ်သန်းခွင့်စာအုပ် ပြုလုပ်သူများအတွက် လူဝင်မှုကြီးကြပ်ရေး လဝက အရာရှိများ၏ စီမံခန့်ခွဲမှု ညံ့ဖျင်းခြင်းကြောင့် အခက်အခဲ ကြုံတွေ့နေရကြောင်း စုံစမ်းသိရသည်။
ဖေဖော်ဝါရီလ ဒုတိယပတ်က မူဆယ် ခရိုင်လဝကရုံးမှ တရုတ်နယ်စပ် ဖြတ်သန်းခွင့်လက်မှတ် (စာအုပ်အနီ) ကိုင်ဆောင်ပြီး ဇန်နဝါရီနှင့် ဖေဖော်ဝါရီလကုန်တွင် ၁ နှစ်သက်တမ်း ကုန်ဆုံးမည့် မူဆယ်၊ နမ့်ခမ်း (၂)မြို့နယ်လုံးမှ ဒေသခံများအတွက်က လျှောက်လွှာလက်ခံရက်ကို အသိပေးကြေညာခဲ့ရာ တစ်ရက်တည်းသာ လက်ခံပေးခဲ့ခြင်းကြောင့် အခက်အခဲ ကြုံတွေ့နေရကြောင်း မူဆယ်ဒေသခံများက ပြောသည်။
“အခုပြဿနာတက်နေတာက သက်တမ်းတိုးတဲ့နေရာမှာ ဖြစ်နေတာ။ သူတို့လဝက စီမံခန့်ခွဲမှု ညံ့တယ် ပြောရမှာပေါ့။ နှစ်မြို့နယ်လုံးကို ဇန်နဝါရီ၊ ဖေဖော်ဝါရီ သက်တမ်းကုန်တာ တစ်ရက်ထဲ လက်ခံပေးတယ်ဆိုတော့ စဉ်းစားကြည့်လေ၊ လူထောင်ချီ စုပြုံတိုးကြရတာ။ ကြေညာထားတာက ရှင်းသလိုလိုနဲ့ တကယ်တမ်း လုပ်ပေးနေတဲ့ပုံစံက တော်တော်ဒုက္ခရောက်တယ်”ဟု မူဆယ်မြို့မှ စာအုပ်အနီ ကိုယ်တိုင်ပြုလုပ်နေသူ လူငယ်တစ်ဦးက သျှမ်းသံတော်ဆင့်ကို ပြောသည်။
မူဆယ်နှင့် နမ့်ခမ်းမြို့နယ်မှ နယ်စပ်ဖြတ်သန်းခွင့် စာအုပ်ကိုင်ဆောင်သူများမှာ သောင်းနှင့်ချီ၍ စာရင်းရှိနိုင်သည်ဟု ဒေသခံများက ပြောဆိုသည်။
နမ့်ခမ်းမှ လဝက အရာရှိများလည်း မူဆယ်တွင် စုပေါင်းရောက်ရှိနေပြီး ၎င်းတို့၏ စီမံခန့်ခွဲမှု ညံ့ဖျင်းခြင်းကြောင့် သက်တမ်းတိုးပြုလုပ်ရန် အချိန်ကြန့်ကြာလျက်ရှိကာ စာအုပ်ရရှိရန် တစ်ဦးလျှင် တရုတ်ယွမ် ၁၀၀၀ ကျော် (မြန်မာကျပ်ငွေ ကာလပေါက်ဈေး ၅ သိန်းမှ ၈ သိန်း)အထိ ကုန်ကျကြောင်း မူဆယ်ဒေသခံများက ပြောသည်။
“သူတို့ လဝကနဲ့ မကင်းနိုင်ဘူးဆိုပြီး လုပ်ချင်တိုင်း လုပ်နေတာ၊ ထိန်းမရတော့အောင်ကို ဖြစ်နေတာ။ အခုက လျှောက်လွှာတင်လည်း ပေးရ၊ စာအုပ်ထုတ်လည်း ပေးရဖြစ်နေတယ်။ အဝင်အထွက်တုံး တစ်ခါထုတာ တရုတ်ယွမ် ၁၀၀၊ မြန်မာငွေဆို ငါးသောင်းနီးပါးရှိပြီ။ တကယ်တမ်းဆိုရင် မြန်မာငွေ ၁၀၀၀ ပဲ ကုန်ကျရမှာ”ဟု မူဆယ်မြို့မှ ၎င်းဒေသခံ လူငယ်က သျှမ်းသံတော်ဆင့်ကို ပြောသည်။
လက်ရှိတွင် နယ်စပ်ဖြတ်သန်းခွင့် စာအုပ်သက်တမ်းတိုးရန် လျှောက်လွှာဖြည့်သွင်းသည့် အဆင့်ထိသာ ရောက်ရှိသေးသော်လည်း ခရိုင်လဝကရုံးမှ ရဟတ်ယာဉ်ကွင်းအထိ ဒေသခံ ထောင်နှင့်ချီ၍ အလုအယက် စုပြုံတိုးဝှေ့ကာ တုံကင်နံပါတ် ရရှိရန် ညအိပ်စောင့်ဆိုင်းပြီး ပြုလုပ်နေရကြောင်း မူဆယ်ဒေသခံများထံမှ သိရသည်။
“မူဆယ်မှာ စာအုပ်အနီ လုပ်တဲ့လူတွေ မာရှယ်လောလည်း အကျုံးမဝင်ဘူး။ ရုံးပေါ်ကို ထိုင်ခုံတွေ ပစ်ပေါက်ကြပြီး ဆန္ဒပြ သလိုတောင် ဖြစ်တယ်။ လူများလွန်းတော့ မစားရ မအိပ်ရတဲ့လူတွေ သတိလစ် မူးလဲကြတာ ဆယ်ချီရှိတယ်။ အရင်ည ပြဿနာဖြစ်တာ ပြည်သူ့စစ်တွေ လာပြီးတော့ ထိန်းပေးရတယ်”ဟု မူဆယ်မြို့မှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် မူဆယ်နှင့် နမ့်ခမ်းမြို့နယ်များ၌ တိုက်ပွဲငြိမ်သက်နေသော်လည်း တရုတ်နှစ်သစ်ကူးပြီးနောက် တိုက်ပွဲစိုးရိမ်မှုနှင့် အလုပ်အကိုင် ရှားပါးမှုတို့ကြောင့် တရုတ်နိုင်ငံသို့ သွားရောက်၍ အလုပ် လုပ်ကိုင်နိုင်ရန် ၁ နှစ်သက်တမ်းရှိ နယ်စပ်ဖြတ်သန်းခွင့် စာအုပ်ကို အလုအယက် တိုးဝှေ့လုပ်ဆောင်နေကြခြင်း ဖြစ်နိုင်ကြောင်း မူဆယ်ဒေသခံများက ပြောသည်။
