သျှမ်းပြည် ဆီဆိုင်မြို့နယ် ဘန်းယဉ်ကျေးရွာအုပ်စုအတွင်း ဖေဖော်ဝါရီလ ၁၇ ရက် ညပိုင်း ၈ နာရီဝန်းကျင်မှစပြီး စစ်ကောင်စီဘက်မှ လက်နက်ကြီး၊ လက်နက်ငယ် ပစ်ခတ်နေကြောင်း စုံစမ်းသိရသည်။
ယမန် (ဖေဖော်ဝါရီလ ၁၇ ရက်) ညပိုင်း ၈ နာရီဝန်းကျင်မှစပြီး ဘန်းယဉ်ကျေးရွာအခြေစိုက် ခမရ ၄၂၅၊ ၄၂၆ အနီးတွင် လက်နက်ကြီးပစ်ခတ်သံ ၂ ချက်ကြားရပြီးနောက် သေနတ်ပစ်ခတ်သံများ ဆက်တိုက်ထွက်ပေါ်လာကြောင်း ဘန်းယဉ်ကျေးရွာဒေသခံတစ်ဦးက သျှမ်းသံတော်ဆင့်ကို ပြောသည်။
“မနေ့က ည ၈ နာရီလောက်စပြီးတော့ လက်နက်ကြီးသံ ဒုန်းဒုန်း ၂ ချက် ကြားရတာပဲ။ ခဏငြိမ်းသွားပြီး ၉ နာရီလောက်ပြန်စပြီး သေနတ်သံတွေ ဆက်တိုက်ထွက် လာတော့တာပဲ။ အခုကြားရတာက စစ်တပ်စခန်းဘက်ကကြားရတာ။ ထင်ကတော့ အဲ့ကနေအရှေ့ဘက်ကို ပစ်နေတာ” ဟု ၎င်းကပြောသည်။
ပစ်ခတ်သံများသည် တစ်ဘက်တည်းတွင် ကြားနေရပြီး နှစ်ဖက်တပ်ဖွဲ့ကြား အပြန်အလှန်ပစ်ခတ်ခြင်း တိုက်ပွဲမဟုတ်ကြောင်း ဒေသခံအချို့က ပြောကြသည်။
“ကျနော်တွေ့တာတော့ ဒရုန်း၂စင်းတက်သွားတာတွေ့တယ်။ အဲ့ဒရုန်းကို လက်နက်ငယ်နဲ့ လှမ်းပစ်တာထင်တယ်။ ပစ်တာတော့ တစ်ဖက်ဘဲ ကြားတယ်” ဟု မျက်မြင်တွေ့ရှိသူ ဒေသခံတစ်ဉီးကပြောသည်။
ထိုကဲ့သို့ ပစ်ခတ်သံများထွက်လာသောကြောင့် ဘန်းယဉ်ကျေးရွာရှိ ဒေသခံများသည် ကြိုတင် ပြင်ဆင်နိုင်ခြင်းမရှိဘဲ အရေးပေါ် ထွက်ပြေးနေရကြောင်း ဆိုသည်။
“ရုတ်တရက်ကြီးဖြစ်လာတော့ ကားစီးပြီး ပြေးတဲ့သူကပြေး၊ ဆိုင်ကယ်စီးပြီး ပြေးတဲ့သူကပြေးနဲ့ ပြေးနေကြတာပဲ။ ဘယ်သူမှကြိုတင်မပြင်ဆင်ထားတော့ ရရာဆွဲပြီး ပြေးကြတာ” ဟု ဘန်းယဉ်ကျေးရွာဒေသခံတစ်ဦးက ပြောသည်။
စစ်ကောင်စီသည် ဖေဖော်ဝါရီလ ၅ ရက်ကတည်းက ဆီဆိုင်မြို့ထဲသို့ တန်ပြန်ထိုး စစ်ဆင်ဖို့အတွက် ပြည်ထောင်စုလမ်းမပေါ်ရှိ ဆိုက်ခေါင်-ဘန်းယဉ်-နောင်မွန်-ဟိုပုံး တို့တွင် စစ်အင်အားဖြည့်တင်းနေပြီး ယင်းကျေးရွာများ၏ အရှေ့ဘက်ရှိ ပအိုဝ်းအမျိုးသားလွတ်မြောက်ရေးတပ်မတော် PNLAနှင့် စစ်ရေးတင်းမာနေလျက်ရှိသည်။
Leave a Comments