သျှမ်းပြည် မူဆယ်မြို့နယ်ရှိ ၁၀၅ မိုင် နယ်စပ်ကုန်သွယ်ရေးဇုန်တွင် ရက္ခိုင်တပ်တော် AA က မြို့ရွာသန့်ရှင်းရေးလုပ်ငန်းများကို ဆောင်ရွက်ခဲ့ကြောင်း သတင်းသိရသည်။
ဖေဖော်ဝါရီ လဆန်းပိုင်းမှ စတင်၍ မြန်မာ-တရုတ်နယ်စပ်ရှိ မူဆယ်မြို့နယ် ၁၀၅ မိုင် နယ်စပ်ကုန်သွယ်ရေးဇုန်တွင် ကားကြီးကွင်းနှင့် လမ်းမကြီးနံဘေး ဝဲယာတစ်လျှောက်၌ မြို့ရွာသန့်ရှင်းရေးလုပ်ငန်းများကို ရက္ခိုင့်တပ်တော် AA တပ်ဖွဲ့ဝင်များက ဆောင်ရွက်ခဲ့ကြောင်း AA Info Desk မှ ယနေ့ (ဖေဖော်ဝါရီ ၁၅ ရက်)တွင် ထုတ်ပြန်လာသည်။
သျှမ်းမြောက်တွင် စစ်ဒဏ်ကြောင့် ပျက်စီးခဲ့ရသည့် အများပြည်သူနှင့် သက်ဆိုင်သော နေရာများ၊ အဆောက်အအုံများကို သန့်ရှင်းရေးပြုလုပ်ရာတွင် တစ်ဖွဲ့ချင်းအပြင် ညီနောင်မဟာမိတ်များနှင့် အတူတကွ ဆောင်ရွက်လျက်ရှိကြောင်း ထုတ်ပြန်ချက်တွင် ဆိုထားသည်။
ရက္ခိုင့်တပ်တော် AA အနေဖြင့် ရောက်ရှိရာဒေသများတွင် လူမျိုးမရွေး၊ ဘာသာမရွေး ခွဲခြားစိတ်မရှိဘဲ ဒေသခံပြည်သူလူထုနှင့် အတူလက်တွဲပြီး ဆောင်ရွက်လျက်ရှိကြောင်း ဆိုထားသည်။
ပြီးခဲ့သည့် ဇန်နဝါရီလ ၁၆ ရက်ကလည်း မူဆယ်မြို့နယ် ၁၀၅ မိုင် ကုန်သွယ်ရေးဇုန် အနီးတဝိုက်ရှိ စစ်ဘေးရှောင်ပြည်သူများကို ကူညီပံ့ပိုးမှုအဖြစ် ညီနောင်မဟာမိတ် (၃)ဖွဲ့၏ တပ်ဖွဲ့ဝင် ရက္ခိုင့်တပ်တော် AA က ဆန်ပေးဝေခဲ့ကြောင်း မူဆယ်ဒေသခံများက ပြောသည်။
ညီနောင်မဟာမိတ် ၃ ဖွဲ့မှ မြန်မာ-တရုတ် နယ်စပ် မူဆယ်မြို့နယ်ရှိ စစ်ကောင်စီလက်အောက်ခံ ၁၀၅ မိုင် စစ်ဗျူဟာကုန်းကို ၂၀၂၃ ဒီဇင်ဘာလ ၁၅ ရက်နေ့က တိုက်ခိုက်သိမ်းပိုက်ခဲ့ပြီး လက်ရှိတွင် ၁၀၅ မိုင် နယ်စပ်ကုန်သွယ်ရေးဇုန်ကို ညီနောင်မဟာမိတ် ၃ ဖွဲ့စလုံးက ပူးတွဲထိန်းချုပ်ထားကြောင်း သိရသည်။
စစ်ကောင်စီနှင့် ညီနောင်မဟာမိတ် ၃ ဖွဲ့တို့သည် တရုတ်နိုင်ငံ၏ ကြားဝင်စေ့စပ်ပေးမှုဖြင့် တတိယအကြိမ် တွေ့ဆုံဆွေးနွေးမှု ရလဒ်အဖြစ် “ဟိုင်ဂင်သဘောတူညီချက်”ရရှိခဲ့ပြီး သျှမ်းမြောက်တွင် ယာယီအပစ်ရပ်ထားသော်လည်း ရခိုင်ပြည်နယ်တွင် စစ်ကောင်စီနှင့် ရက္ခိုင့်တပ်တော် AA တို့ တိုက်ပွဲဆက်လက်ပြင်းထန်နေသည်။
လက်ရှိတွင် ရက္ခိုင့်တပ်တော် AA မှ ရခိုင်ပြည်နယ် မြောက်ပိုင်းရှိ ကျောက်တော်၊ မင်းပြား၊ မြောက်ဦး၊ ပေါက်တောနှင့် ချင်းပြည်နယ် ပလက်ဝ မြို့နယ်တို့ကို ကုန်းကြောင်း ရေကြောင်းဖြင့် အလုံးစုံ တိုက်ခိုက်သိမ်းပိုက်ထားနိုင်ပြီး ရခိုင်ပြည်ရှိ စစ်ကောင်စီတပ်စခန်း တစ်ခုမကျန် တိုက်ခိုက်မည်ဟုလည်း ရာဇသံပေးထားကြောင်း သိရသည်။