သျှမ်းပြည်မြောက်ပိုင်း လားရှိုးမြို့သို့ ဦးတည်၍ စစ်ကောင်စီတပ်မှ စစ်သည်အင်အား အများအပြားကို ကုန်းလမ်းဖြင့် ဖြည့်တင်းနေကြောင်း စုံစမ်းသိရသည်။

ယနေ့ (ဖေဖော်ဝါရီလ ၁၄ ရက်) နေ့လယ်ပိုင်းတွင် အပစ်ရပ်ထားသည့် သျှမ်းမြောက် လားရှိုးမြို့သို့ ဦးတည်နေသည့် စစ်ကောင်စီတပ် ထောက်ပို့ယာဉ် ၂၅ စီးပါ ယာဉ်တန်းရှည်သည် သျှမ်းပြည်တောင်ပိုင်း ကျေးသီးမြို့နယ်ကို ဖြတ်သန်း၍ မောင်းနှင်သွားကြောင်း ကိုယ်တိုင်မြင်တွေ့ခဲ့သည့် ဒေသခံများက ပြောသည်။

“သျှမ်းတောင်ဘက်က လာတဲ့ စစ်ကောင်စီယာဉ်တန်း ၂၅ စီးလောက်က လားရှိုး၊ မိုင်းရယ်ဘက် ဦးတည်ပြီး မောင်းသွားတယ်။ ကားတွေအကုန်လုံးက မိုးကာတွေ အုပ်ထားတယ်၊ တချို့ကားလည်း စစ်သားပါတယ်။ တော်တော်များတယ်”ဟု စစ်ကောင်စီတပ် အင်အားဖြည့်တင်းနေသည်ကို ကိုယ်တိုင်မြင်တွေ့ခဲ့သည့် ဒေသခံတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် သျှမ်းမြောက်ရှိ ဒေသခံပြည်သူများမှာ ယာယီအပစ်ရပ်ကာလအတွင်း တရုတ်နှစ်သစ်ကူးပြီးနောက် နှစ်ဘက်တပ်ဖွဲ့များ၏ အနီးကပ် လှုပ်ရှားမှုများကြောင့် တိုက်ပွဲအပြင်းအထန် ပြန်လည်ဖြစ်ပွားမည်ကို စိုးရိမ်ထိတ်လန့်နေရကြောင်း ဒေသခံများထံမှ သိရသည်။

“အခုတောင် ပြည်သူတွေက တိုက်ပွဲပြန်စမှာကို စိုးရိမ်နေကြတယ်။ တခြားမြို့မှာ စစ်ရှုံးပြီးတော့ လားရှိုးကို ရောက်လာတဲ့ စစ်ကောင်စီတပ်သားတွေလည်း တရုတ်နှစ်သစ်ကူးပြီးတော့ လှုပ်လှုပ်ရှားရှား ဖြစ်လာတယ်။ သူတို့က တခြားမြို့ကို ပြန်တိုက်မယ်ဆိုလဲ နောက်တန်းက အသိမ်းခံရမယ့် အခြေအနေမျိုး ရှိတာပေါ့”ဟု လားရှိုးမြို့မှ စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“၁၀၂၇ စစ်ဆင်ရေး”ဆင်နွှဲနေသည့် ညီနောင်မဟာမိတ် ၃ ဖွဲ့နှင့် စစ်ကောင်စီတို့သည် တရုတ်နိုင်ငံ၏ ကြားဝင်စေ့စပ်ပေးမှုဖြင့် ဇန်နဝါရီလ ၁၀/၁၁ ရက်တို့တွင် ကူမင်းမြို့၌ တတိယအကြိမ် တွေ့ဆုံဆွေးနွေးခဲ့ပြီးနောက် သျှမ်းမြောက်တွင် ယာယီအပစ်အခတ် ရပ်စဲရန် “ဟိုင်ဂင် သဘောတူညီမှု”ကို ရရှိခဲ့သည်ဟု နှစ်ဘက်စလုံးက တရားဝင်ထုတ်ပြန်ထားသည်။

အဆိုပါ “ဟိုင်ဂင် သဘောတူညီမှု”တွင် နှစ်ဖက်တပ်ဖွဲ့ဝင် အချင်းချင်းကြား ပစ်ခတ်တိုက်ခိုက်မှုနှင့် ထိတွေ့မှုမရှိစေရေး၊ အငြင်းပွားဖွယ်ရာများနှင့် ပစ်ခတ်မှုများ ဖြစ်ပေါ်လာပါက တွေ့ဆုံဆွေးနွေးမှု လမ်းစဉ်ဖြင့် ဖြေရှင်းရေး စသည့် အချက်များအပေါ် သဘောတူညီမှု ရရှိခဲ့သည်ဟု ညီနောင်မဟာမိတ် ၃ ဖွဲ့က ဇန်နဝါရီ ၁၂ ရက်တွင် ထုတ်ပြန်ထားသည်။

သျှမ်းမြောက်ဒေသတွင် ၎င်းယာယီအပစ်ရပ်ကာလအတွင်း မြေပြင်တွင် တိုက်ပွဲများ အမှန်တကယ် ရပ်တန့်ခြင်း မရှိဘဲ စစ်ကောင်စီတပ်မှ အပစ်အခတ်ရပ်စဲရေး လက်မှတ်ကို ပေါ်ပေါ်တင်တင် ချိုးဖောက်ကာ တစ်ဖက်သတ် ပစ်ခတ်မှုများ ဆက်ရှိနေခဲ့ကြောင်း ညီနောင်မဟာမိတ်တပ်များက ပြောသည်။

“၁၀၂၇ စစ်ဆင်ရေး” သုံးလကျော်အတွင်း ညီနောင်မဟာမိတ်တပ်များသည် သျှမ်းမြောက်ရှိ စစ်ကောင်စီတပ်စခန်းပေါင်း ၄၀၀ ကျော်အထိ တိုက်ခိုက်သိမ်းပိုက်ခဲ့ပြီး မြို့ပေါင်း ၂၀ မြို့ကို ထိန်းချုပ်ထားသည်။

စစ်ရေးအဖက်ဖက် ရှုံးနိမ့်နေသည့် စစ်ကောင်စီသည် လူအင်အား နည်းပါးလာသည့်အတွက် အသက်ပြည့်ပြီး နိုင်ငံသားတိုင်း မဖြစ်မနေ စစ်မှုထမ်းရမည့် ပြည်သူ့စစ်မှုထမ်းဥပဒေကို စတင်အသက်သွင်းလာပြီး ပြည်သူများကို ရွေးချယ်ခေါ်ယူမည့် ပြည်သူ့စစ်မှုထမ်းဗဟိုအဖွဲ့ကို ဖေဖော်ဝါရီလ ၁၃ ရက်တွင် စစ်ကောင်စီ ကာကွယ်ရေးဝန်ကြီး ဦးဆောင်သည့် ၁၈ ဦးဖြင့် ဖွဲ့စည်းလိုက်ပြီဖြစ်သည်။