သျှမ်းပြည် ကျိုင်းတုံမြို့နယ်အတွင်း၌ ပေါက်ကွဲမှု နှစ်ကြိမ်တိုင် ဖြစ်ပွားခဲ့ပြီး ထိခိုက်ဒဏ်ရာရသူများလည်း ၅ ဦးထက်မနည်း ရှိနေကြောင်း စုံစမ်းသိရသည်။
ယမန်နေ့( ဖေဖော်ဝါရီလ ၁၃) ရက် နံနက်ပိုင်း ၈ နာရီဝန်းကျင် တွင် ကျိုင်းတုံမြို့၊ မိုင်းဇင်းကျေးရွာအုပ်စု၊ နောင်နွန်းကျေးရွာ၌ ပေါက်ကွဲမှု ဖြစ်ပွားခဲ့ပြီး အသက် (၁၆) နှစ်အရွယ် ကလေးငယ် တစ်ဦး ထိခိုက်ဒဏ်ရာရရှိခဲ့ ကြောင်း နီးစပ်သူ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ဖြစ်စဉ်က ဆောင်းဘောက် အားသွင်းရာကနေ ပေါက်ကွဲမှုဖြစ်တာပါ။ အဲ့ဆောင်းဘောက်ကလည်း ဘယ်သူ ဘယ်ဝါပို့ပေးမှန်းလည်း မသိဘူးတဲ့၊ ဖွင့်ကြည့်မို့ အားသွင်းတဲ့ အချိန်မှာ ပေါက်ကွဲမှုဖြစ်တာပါ။ အသက် (၁၆) နှစ်အရွယ် အမျိုးသား တစ်ဦး ဒဏ်ရာရသွားတယ်” ဟု အမည်မဖော်လိုသည့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
အဆိုပါ ပေါက်ကွဲမှုအပြီး ရပ်ကျေးတာတန်ရှိသူများ နှင့် မြို့နယ်ရဲတပ်ဖွဲ့ဝင်များ၊ တပ်ဖက်ဆိုင်ရာ တာဝန်ရှိသူများ က လာရောက်စစ်ဆေးမှု ပြုလုပ်ပြီး ပေါက်ကွဲမှုဖြစ်ပေါ်သည့် ဆောင်းဘောက် အပိုင်းအစများကိုလည်း သိမ်းဆည်း ယူဆောင်သွားကြောင်း သိရသည်။
အလားတူပင် ပြီးခဲ့သည့် ဖေဖော်ဝါရီလ ၁၁ ရက်တွင်လည်း ကျိုင်းတုံမြို့နယ်၊ မိုင်းဇင်းကျေးရွာအုပ်စု၊ ဝမ်ကောင်းကျေးရွာမှ ပြည်သူ့စစ် တစ်ဦး၏ နေအိမ်တွင်လည်း ပေါက်ကွဲမှု ဖြစ်ပွားခဲ့ပြီး အိမ်သား (၄) ဦးထက်မနည်း ထိခိုက်ဒဏ်ရာရရှိသွားခဲ့ကြောင်းလည်း အထက်ပါ အမျိုးသားက သျှမ်းသံတော်ဆင့်ကို ဆက်ပြောသည်။
“အဲ့ပြည်သူ့စစ်အိမ်ကို အမျိုးသားငယ်တစ်ဦးကနေ တြိဂံတိုင်းမှူးက ပို့လိုက်တဲ့ ပါဆယ်ပါတယ်ဆိုပြီးတော့ ဆောင်းဘောက်တစ်လုံးပါတဲ့ ကျပ်ဖာဗူးတစ်ဗူးကိုလာပို့သွားတယ်။ အဲ့တာသူ့အမျိုးသမီးက ဘောက်ကို ဖွင့်ကြည့်မယ်ဆိုပြီး လုပ်တော့ ပေါက်ကွဲမှုဖြစ်တာပဲ၊ သူ့အမျိုးသမီး၊ သူ့သားနဲ့ သမီး စုစုပေါင်း (၄) ဦးဒဏ်ရာ ရသွားတယ်” ဟု အထက်ပါ အမျိုးသားက သျှမ်းသံတော်ဆင့်ကို ဆက်ပြောသည်။
လက်ရှိ အချိန်၌ ပေါက်ကွဲမှုကြောင့် ထိခိုက်ဒဏ်ရာရသူများကို ဆေးရုံ၌တင်ထားကာ ဆေးကုသမှု ခံယူနေလျက် ရှိပြီး ပေါက်ကွဲမှုဖြစ်စဉ် နှင့် ဆက်စပ်ပတ်သက်မှုများကို တာဝန်ရှိသူများမှ ဆက်လက် စုံစမ်းစစ်ဆေးမှု ပြုလုပ်နေကြောင်းလည်း သိရသည်။
ယခုတစ်ကြိမ်ပေါက်ကွဲမှုသည် ရှေ့ဆင့်နောက်ဆင့် ဖြစ်ပွားပြီး ထိခိုက်ဒဏ်ရာရသူများလည်း ရှိနေသည့်အတွက် ဒေသခံပြည်သူများ အကြား စိုးရိမ်ထိတ်လန့်ဖွယ် ဖြစ်နေကြောင်းလည်း သိရသည်။
Leave a Comments