သျှမ်းပြည် တာချီလိတ်မြို့ တွင် ယနေ့ (မတ် ၈)ရက် နံနက် ၇နာရီဝန်းကျင်တွင် ဗုံးပေါက်ကွဲမှုဖြစ်ပွားပြီး အမျိုးသမီး တစ်ဦး ဒဏ်ရာရရှိကြောင်း စုံစမ်းသိရသည်။
သျှမ်းပြည် တာချီလိတ်မြို့ ရန်အောင်မြေရပ်ကွက်နှင့် ဝိန်းကျောက်ရပ်ကွက်အကြားတွင် အာခါဈေးလမ်းဘက်ရှိ ခြံဝန်းတစ်ခုတွင် ယနေ့ (မတ်လ ၈) ရက် နံနက်၇ နာရီဝန်းကျင်၌ ဗုံးပေါက်ကွဲမှု ဖြစ်ပွားခဲ့ပြီး အမျိုးသမီးတစ်ဦး ဒဏ်ရာရရှိသွားကာ စိုးရိမ်ရကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။
“ရန်အောင်မြေနဲ့ဝိန်းကျောက်မှာ ဗုံးပေါက်ကွဲတာ။ အမျိုးသမီးတစ်ယောက် အမှိုက်ပစ်ဖို့ တွန်းလှည်းနဲ့ သွားလာတဲ့အချိန် ခြံစည်းရိုးတံခါးနားမှာ ချိတ်ထားတဲ့အရာကို သွားဆွဲလိုက်တော့ ပေါက်ကွဲသွားတာပါ။ သေတာတော့ မသေဘူး။ ဒဏ်ရာအများကြီးရတာပေါ့” ဟု တာချီလိတ်ဒေသခံ အမျိုးသားတစ်ဦးက ဆိုသည်။
တာချီလိတ်မြို့တွင် သူခိုး၊ ဓားပြများကို သက်ဆိုင်ရာ အာဏာပိုင်များက အရေးယူဆောင်ရွက်ခြင်း ဖမ်းဆီးဆောင်ရွက်ပေးခြင်း မရှိသည့်အတွက် ပြည်သူများ လုံခြုံရေးကင်းမဲ့နေပြီး စိုးရိမ်နေရကြောင်း ဒေသခံများက သျှမ်းသံတော်ဆင့်ကိုပြောသည်။
ထိုင်း-မြန်မာ နယ်စပ် တာချီလိတ်မြို့တွင် စစ်အာဏာသိမ်းပြီးနောက် အွန်လိုင်း လောင်းကစားများ၊ ကျားဖြန့်များ ပေါများလာသည်။
ပြီးခဲ့သည့် ဇန်နဝါရီလ ၁၂ ရက်က စစ်ကောင်စီ ဥက္ကဋ္ဌနှင့် ထိုင်းတပ်မတော် ကာကွယ်ရေးဦးစီးတို့သည် ထိုင်း-မြန်မာနယ်စပ်တလျောက် အွန်လိုင်းငွေလိမ်ဂိုဏ်း (ကျားဖြန့်လုပ်ငန်း)များကို ပူးပေါင်းနှိမ်နှင်း သွားမည်ဟု သဘောတူညီခဲ့ပြီးနောက် စစ်ကောင်စီဘက်မှ ဖမ်းဆီးမှုများ ဆက်တိုက် လုပ်ဆောင်လာ လျက်ရှိသည်။
တရုတ်နိုင်ငံ အစိုးရ၏ ဖိအားပေးမှုကြောင့် စစ်ကောင်စီသည် နယ်စပ်တလျှောက်နှင့် မြန်မာနိုင်ငံအတွင်းရှိ အွန်လိုင်းငွေလိမ်ဂိုဏ်း (ကျားဖြန့်လုပ်ငန်း) များကို လိုက်လံဖမ်းပြီး သက်ဆိုင်ရာနိုင်ငံသို့ ပြန်လည်လွှဲပြောင်းပေးအပ်ခဲ့ရာ ၂၀၂၃ အောက်တိုဘာလ ၅ ရက်မှ ၂၀၂၄ မတ်လ ၅ ရက်အထိ တရုတ်နိုင်ငံသား ၅၀,၇၇၂ ဦးအပါအဝင် နိုင်ငံခြားသား စုစုပေါင်း ၅၂,၈၂၀ ဦးကို လွှဲပြောင်းပေးနိုင်ခဲ့ကြောင်း စစ်ကောင်စီက မတ်လ ၆ ရက်၌ ထုတ်ပြန်ထားသည်။
