သျှမ်းပြည် ဆီဆိုင်တိုက်ပွဲကြောင့် ကျောက်တစ်လုံးကြီးမြို့နယ် ကက္ကူဒေသ သို့ရောက်ရှိလာသော နေရပ်စွန့်ခွာ စစ်ရှောင်လာသူ (၃၀၀၀)ကျော်ရှိသဖြင့် နေရာခွဲပြီး ပြောင်းရွှေ့ခိုင်းကြောင်း စုံစမ်းသိရသည်။

ထိုစစ်ရှောင် လူဦးရေများပြားသဖြင့် ရောဂါများ ကူးစက်ပျံ့နှံမူမြန်စေခြင်း၊ မြေကြီးပေါ်မှာ အိပ်ရခြင်းနှင့် အမိုးကာတွေ မလုံလောက်တာကြောင့် ၄င်းစစ်ရှောင်များကို အနီးနားရှိကျေးရွာများက အလှည့်ကျ ခွဲတမ်းနှင့် လက်ခံပေးမည်ဖြစ်ပြီး ပိုမိုလုံခြုံမှုရှိစေရန် ပြောင်းရွှေ့ရခြင်းဖြစ်သည်။

ထိုသို့ ပြောင်းရွှေ့ပေးရခြင်းမှာ စစ်ရှောင်ပြည်သူများ၏ ကျန်းမာရေးကို ရှေ့ရှု့ကာ ပြောင်းပေးခြင်းဖြစ်ပြီး ရေရှည်ကာလမှာ အဆင်ပြေစေရန်ဖြစ်တယ်လို့ ဆိုပါတယ်။

“ဒီလိုသာဆက်နေရင် ရောဂါတွေလဲ ကူးစက်မယ်။ ကျန်းမာရေးတွေ ချို့ယွင်းလာနိုင်တယ်။ရေတိုကာလအတွက်ပဲ အဆင်ပြေတယ်။ ရေရှည်ဆိုသူတို့က ပိုပြီး ကျန်းမာရေးထိခိုက်နိုင်လို့ ပြောင်းပေးလိုက်တာ” ဟု ပြောင်းရွှေ့ပေးသူ တစ်ဦးက ပြောပါသည်။

ခွဲတမ်းအလှည့်ကျ လက်ခံပေးမည့် ကျေးရွာများမှာ ပင်တွန် ၊နောင်ခဲ ၊ဆောင်းဖိုး၊ကက်ကူ ၊နားဟီး၊ အသုံးတော် နှင့်နောင်ကား ကျေးရွာတို့ဖြစ်ကြောင်းစုံစမ်းသိရှိရပါသည်။

” သူတို့ကိုတော့ အခု ၁၃ ရက်မှာစပြီး သွားနေလို့ရပြီ။ သူတို့ကိုလုံခြုံအောင်ထားပေးတာပေါ့လေ။ သူတို့ကို မနှင်ထုတ်ဘူး။ ပြီးတော့ သူတို့ကို စားသောက်ဖို့နဲ့ နေရာထိုင်ခင်းတွေကိုလဲ စနစ်တကျစီစဥ်ပေးထားတယ်။” ဟုတာဝန်ခံတစ်ဦးက ပြောသည်။

ထိုကဲ့သို့ စီစဥ်ဆောင်ရွက်ပေးသူတွေမှာ ဒေသခံမိဘပြည်သူတွေနှင့် ကျေးရွာခေါင်းဆောင်များ သံဃာတော်များဖြစ်ပြီး ထိုသို့ ပြောင်းရွှေ့ပေးပြီး ကက္ကူကျေးရွာတွင် စစ်ရှောင် (၉၀၀) ကျော်ကျန်ရှိနေသေးကြောင်း သိရသည်။