သျှမ်းပြည် ဆီဆိုင်မြို့နယ်တွင် တိုက်ပွဲဖြစ်ပွားပြီးနောက် အောင်ပန်းမြို့သို့ ထွက်ပြေးတိမ်းရှောင်သူများ နေရာထိုင်ခင်း အခက်အခဲကြုံတွေ့ နေရကြောင်း စုံစမ်းသိရသည်။
သျှမ်းပြည် ဆီဆိုင်မြို့နယ်တွင် ပအိုဝ်းအမျိုးသား လွတ်မြောက်ရေးတပ်မတော် PNLA၊ ပူးပေါင်းတပ်ဖွဲ့များနှင့် စစ်ကောင်စီတပ်၊ ပအိုဝ်းပြည်သူ့စစ်အဖွဲ့ PNA တို့အကြား တိုက်ပွဲ ဖြစ်ပွားပြီးနောက် ဇန်နဝါရီလ နောက်ဆုံးပတ် မှ စ၍ အောက်ပန်းသို့ထွက်ပြေးတိမ်းရှောင်လာသူ လူဦးရေ ၂၀၀ ဝန်းကျင်ပြီး နေရာထိုင်ခင်းအခက်အခဲကြုံ တွေ့နေရကြောင်း စစ်ဘေးရှောင်ကူညီသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ဒီနေ့တောင်ထပ်ရောက်လာတာ နှစ်စီးရှိတယ်။နေထိုင်ဖို့က အခက်ခဲရှိနေတယ်။ စစ်ဘေးရှောင်တွေက များနေတော့ အိမ်ငှားတာတွေကလည်းမရှိဘူး။ ဘုန်းကြီးကျောင်းတွေမှာက တည်းဖို့ ၂ ကျောင်းလောက်ပဲရှိတာ။ ကျန်တဲ့ကျောင်းတွေက လက်မခံဘူး။စစ်ဘေးရှောင် ထားဖို့သီးသန့်မှမရှိတာ။ လက်ခံတဲ့ဘုန်းကြီးကျောင်း ကလည်းပြည့်နေပြီလေ။”ဟု စစ်ဘေးရှောင်ကူညီသူ အမျိုးသားတစ်ဦးက ပြောသည်။
၁၁.၁၁ စစ်ဆင်ရေး နှင့် တိုက်ပွဲများကြောင့် သျှမ်း-ကရင်နီ နယ်စပ်တကြော နှင့် ကရင်နီစစ်ဘေးရှောင်များ၊ ဆီဆိုင်မြို့နယ်မှ ထွက်ပြေးသူများသည် အောင်ပန်းမြို့နယ်ရှိ ဘုန်းကြီးကျောင်းများ၊ဆွေမျိုးအိမ်များသို့ လာရောက် စစ်ဘေးရှောင်နေသူလူဦးရေ ၁၆၀၀ ခန့်ရှိသည်။
ဆီဆိုင်မြို့နယ် နေရာ အများအပြား စစ်ကောင်စီတပ် လေယာဉ်ဖြင့် ဗုံးကြဲမှု၊ လက်နက်ကြီး ပစ်ခတ် တိုက်ခိုက်မှုများကြောင့် ဘာသာရေး အဆောက်အအုံ ၇ ခုထက်မနည်း ထိခိုက်ပျက်စီးခဲ့ပြီး နေအိမ် ၅၀ နီးပါး ထိခိုက်ပျက်စီးခဲ့ကြောင်း သိရသည်။
ဆီဆိုင်မြို့နယ်အတွင်း တိုက်ပွဲများကြောင့် အနည်းဆုံး ဒေသခံ ၄ သောင်းကျော် နေရပ်စွန့်ခွာ ထွက်ပြေးတိမ်းရှောင် နေရကြောင်း စစ်ဘေးရှောင် ကူညီပေးနေသူများထံမှ သိရသည်။
