သျှမ်းပြည် ဆီဆိုင်မြို့နယ် ဆိုက်ခေါင်ကျေးရွာအတွင်းသို့ အင်အားဖြည့်တင်းနေသည့် စစ်ကောင်စီတပ် နှင့် ပအိုဝ်းအမျိုးသားလွတ်မြောက်ရေးတပ်မတော် PNLA တပ်တို့သည် နှစ်ဖက်စစ်ရေးတင်းမာနေကြောင်း ဆိုက်ခေါင်ဒေသခံများထံမှ သိရသည်။

စစ်ကောင်စီလက်အောက်ခံတပ်များသည် ဖေဖော်ဝါရီလ ၅ ရက်ကတည်းက ဆိုက်ခေါင်ကျေးရွာ၏ အရှေ့ဘက်သို့ အမြှောက်တပ်များ လာရောက်တပ်စွဲထားသကဲ့သို့ ဇောတိကရာမကျောင်းတိုက်အတွင်း အင်အား ၃၀၀ ခန့်ရှိသည့် စစ်ကောင်စီလက်အောက်ခံတပ်သားများ တပ်စွဲကာ စစ်အင်အားဖြည့်တင်းနေခြင်း ဖြစ်ကြောင်း ဆိုက်ခေါင်ဒေသခံအချို့က ပြောသည်။

ယင်းအပြင် ဆီဆိုင်၊ ဆိုက်ခေါင်၊ ဘန်းယဉ် ကျေးရွာတို့၏အရှေ့ဘက်မှ တွေးပူး၊ ပြင်သာယာ၊ လွယ်ပွတ်၊ ဗန်းကန်၊ ဗန်းနောင်ကား၊ ကောင်းဗန်တန်း၊ ဆောဆား၊ ဗန်းဗလန်၊ ထီဗွာ စသည့် ကျေးရွာပေါင်း ၁၃ ရွာခန့်တွင် ပအိုဝ်းတပ်ဖွဲ့ PNLA တပ်ဖွဲ့များ ရောက်ရှိနေပြီး နှစ်ဖက်စစ်ရေးတင်းမာနေကြောင်း ဆိုက်ခေါင်ကျေးရွာ ဒေသခံတစ်ဦးကပြောသည်။

“ဆီဆိုင်၊ ဆိုက်ခေါင်၊ ဘန်းယာဉ်အရှေ့ဘက်မှာ စစ်ဗျူဟာအရ စစ်ရေးအရမ်မးတင်းမလာတယ်။ စစ်တပ်ကလည်း လူအင်အား နေ့ရောညရော ဖြည့်တင်းနေတယ်။ ဟိုဘက်ကလည်း လူအင်အားထောင်ချီ ရောက်နေပြီ။ စစ်တပ်ကလည်းလူအင်အား ၇၀၀ ကျော်ဖြည့်ထားတယ်။ ဆိုင်ခေါင်နားမှာ စုစုပေါင်း အမြောက်တပ် ၃ တပ်နဲ့ တပ်ရင်း ၅ ခုစာအင်းအားဖြည့် စစ်မျက်နှာသာဖွင့်ပြီး စောင့်နေတာ” ဟု ပြောသည်။

ထို့ကဲ့သို့ စစ်ရေးတင်းမာနေသောကြောင့် အချိန်မရွေး စစ်မြေပြင်တိုက်ပွဲဖြစ်ပွားလာနိုင်သဖြင့် ဆီဆိုင်-ဟိုပုံးကြား လမ်းတကြောကျေးရွာနှင့် ပြည်ထောင်စုလမ်းမအရှေ့ဘက်ရှိ ကျေးရွာအချို့မှာ ပြောင်းရွှေ့ထားရပြီးဖြစ်သလို မပြောင်းရွေ့ရသေးသည့် ကျေးရွာများလည်း ကျန်ရှိနေပြီး ဘေးလွတ်ရာကြိုတင်တိမ်းရှောင်ထားရန် ၎င်းကဆက်ပြောသည်။

လက်ရှိတွင် စစ်ရေးအခြေအနေအလွန်ရှုပ်ထွေးနေသည့် တိုက်ပွဲကာလဖြစ်သောကြောင့် ဆိုက်ခေါင်မှ ဆီဆိုင်မြို့သို့ ဆက်သွယ်သည့် ပြည်ထောင်စု ကားလမ်းမကြီးအား ဖေဖော်ဝါရီလ ၁၀ ရက်မှစတင်၍ ဖြတ်သန်းသွားလာခွင့် ယာယီပိတ်ထားမည်ဖြစ်ကြောင်းလည်း PNLAက ထုတ်ပြန်ထားသည်။

ထို့အပြင် ဆိုက်ခေါင်အနီးတဝှိက် ဆီဆိုင်မြို့သို့ ပြည်ထောင်စုလမ်းမကြီး၏ အနောက်ဘက်ခြမ်းတွင် ဆက်သွယ်ထားသည့် ကျေးရွာလမ်းငယ်များ၊ နမ်းတဘက်ချောင်းအနောက်ဘက်ရှိ ကက္ကူမှ ဆီဆိုင်မြို့အနောက်ဘက်ရှိ နမ်းတဘက်ချောင်း အနောက်ဘက်ဒေသများကို ဆက်သွယ်ထားသော တောလမ်များလည်း သွားလာခွင့် ယာယီပိတ်ထားကြောင်း ဆိုသည်။

စစ်ရေးတင်းမာသည်နှင့်အမျှ စစ်ရေးအတွင်း မသက်ဆိုင်သည့် ကျေးရွာနှင့် မြို့များကို စစ်ကောင်စီက လက်နက်ကြီး၊ လေယာဉ်ဖြင့် ဗုံးကြဲမည်ကို စိုးရိမ်နေကြောင်း ဆီဆိုင်မြို့နယ်ဒေသခံတစ်ဦးက ပြောသည်။

“တကယ့်ဖြစ်လာရင် စစ်မြေပြင်လူသက်ကွင်းကြီးဖြစ်မှာ။ စစ်တပ်က အမြောက်နဲ့ပစ်မှာကို လေယာဉ်နဲ့ကျဲမှာကို ကြောက်တာ။ကျနော်တို့ ဒေသခံတွေတော့ ပြေးစရာမရှိတော့ဘူး” ဟု ပြောသည်။

ဆီဆိုင်မြို့နယ်အတွင်း တိုက်ပွဲကြောင့် စစ်ဘေးရှောင်ဦးရေ စုစုပေါင်း ၄ သောင်းကျော် ထွက်ပြေးတိမ်းရှောင် နေရပြီးဖြစ်သည်။