သျှမ်းပြည်တဝှမ်းတွင် စစ်ရေးပြင်းထန်နေသည့်ကြားက (၇၇)နှစ်မြောက် သျှမ်းပြည်အမျိုးသားနေ့ကို မြို့နယ်အချို့တွင် ကျင်းပခဲ့ကြောင်း စုံစမ်းသိရသည်။

ယနေ့ (ဖေဖော်ဝါရီ ၇ ရက်)တွင် ကျရောက်သည့် (၇၇)နှစ်မြောက် သျှမ်းပြည်အမျိုးသားနေ့ အထိမ်းအမှတ်အဖြစ် ညီနောင်မဟာမိတ်တပ်များ၏ ဝိုင်းရံပိတ်ဆို့ခြင်း ခံထားရသည့် မူဆယ်မြို့တွင် လူငယ်အဖွဲ့များမှ ဦးဆောင်ပြီး လူငယ်နှင့် ကလေးများအတွက် အားကစားပြိုင်ပွဲများ ကျင်းပပြုလုပ်ပေးခဲ့ကြောင်း မူဆယ်ဒေသခံများထံမှ သိရသည်။

“သျှမ်းအမျိုးသားနေ့ အထိမ်းအမှတ် အနေနဲ့ မူဆယ်မြို့နယ်ထဲက အသက် ၁၂ နှစ်အောက် လူမျိုးဘာသာမရွေး ကလေးငယ်တွေ ပါဝင်တဲ့ အားကစားပြိုင်ပွဲ လုပ်ပေးဖြစ်တာ။ ကလေးတွေအနေနဲ့ ကိုယ်ကာယ ဖွံ့ဖြိုးပြီးတော့ မူးယစ်ဆေးဝါးနဲ့ လောင်းကစား အန္တရာယ်ကနေ ကင်းလွတ်နိုင်အောင် ရည်ရွယ်ပါတယ်”ဟု မူဆယ်မြို့မှ ပြိုင်ပွဲဦးဆောင်ကျင်းပသူ လူငယ်တစ်ဦးက သျှမ်းသံ‌တော်ဆင့်ကို ပြောသည်။

မူဆယ်မြို့တွင် ပြုလုပ်ခဲ့သည့် အားကစားပြိုင်ပွဲတွင် အသက် ၁၂ နှစ်အောက် ကလေးငယ်များအတွက် ဘောလုံးပြိုင်ပွဲနှင့် အသက် ၁၂ နှစ်အထက် လူငယ်များအတွက် ပိုက်ကျော်ခြင်းပြိုင်ပွဲတို့ကို ကျင်းပပေးခဲ့ကြောင်း မူဆယ်မြို့မှ ၎င်းလူငယ်ဒေသခံက ဆက်ပြောသည်။

အလားတူ ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ဌာနချုပ်ရှိရာ ဝမ်ဟိုင်းတွင်လည်း သျှမ်းအမျိုးသားနေ့ အခမ်းအနား ကျင်းပပြုလုပ်ခဲ့ပြီး ဗိုလ်ချုပ်ကြီးဆေထင်က လက်ရှိ နိုင်ငံရေး၊ စစ်ရေးအခြေအနေများနှင့် ပတ်သက်၍ မိန့်ခွန်းပြောကြားခဲ့ကာ တက်ရောက်သူ ၂၀၀၀ နီးပါးရှိကြောင်း သိရသည်။

ထို့အပြင် လားရှိုး၊ တောင်ကြီး၊ လင်းခေးနှင့် တာချီလိတ်မြို့တို့တွင် သျှမ်းအမျိုးသားနေ့ အခမ်းအနားကို အကျဉ်းချုံး ကျင်းပပြုလုပ်ခဲ့ပြီး ကရင်ပြည်နယ် ဖာပွန်မြို့တွင်လည်း အားကစားပြိုင်ပွဲများဖြင့် ကျင်းပခဲ့ကြကြောင်း ‌ဒေသခံများက ပြောသည်။

သျှမ်းပြည်ပြန်လည်ထူထောင်ရေးပါတီ/ သျှမ်းပြည်တပ်မတော် (RCSS/SSA) ဌာနချုပ်ရှိရာ လွိုင်တိုင်းလျန်းတွင် သျှမ်းပြည်အမျိုးသားနေ့ကို နှစ်စဉ်နှစ်တိုင်း ကြီးကျယ်ခမ်းနားစွာ ကျင်းပခဲ့သော်လည်း ယခုနှစ်တွင် ဂုဏ်ပြုညစာစားပွဲ အနေဖြင့်သာ ကျင်းပပြုလုပ်ခဲ့သည်။

သျှမ်းပြည်အမျိုးသားနေ့ အခမ်းအနား မကျင်းပနိုင်သည့် မြို့နယ်အသီးသီးမှ ပြည်သူများကလည်း မိမိနေအိမ်ရှေ့တွင် သျှမ်းပြည်အလံ လွှင့်ထူခြင်းဖြင့်လည်း ပါဝင်ဆင်နွှဲခဲ့ကြကြောင်း သိရသည်။

နှစ်စဉ် ဖေဖေါ်ဝါရီလ ၇ ရက်နေ့တွင် ကျရောက်သည့် သျှမ်းပြည်အမျိုးသားနေ့ကို ၁၉၄၇ ခုနှစ် ပင်လုံညီလာခံတွင် စော်ဘွားကိုယ်စားလှယ် ၇ ပါး ၊ လူထုကိုယ်စားလှယ် ၇ ဉီး တန်းတူထိုင်ပြီး လွတ်လပ်ရေး အတူတကွ ရယူရန် ဖက်ဒရယ်သျှမ်းပြည်ကောင်စီကို သဘောတူ ဖွဲ့စည်းနိုင်ခဲ့သောကြောင့် ထိုနေ့ကို သျှမ်းပြည်အမျိုးသားနေ့အဖြစ် သတ်မှတ်ထားခဲ့သည်။

ထို့အပြင် သျှမ်းပြည်အတွက် အသုံးပြုမည့် ဝါ၊ စိမ်း၊ နီ သုံးရောင်ခြယ် အလယ် လဝန်း ကို ဖက်ဒရယ်သျှမ်းပြည် အလံတော်နှင့် နိုင်ငံတော်သီချင်းအဖြစ် ဖက်ဒရယ်သျှမ်းပြည်ကောင်စီ ဉက္ကဋ္ဌ တောင်ပိုင်စော်ဘွားကြီး စဝ်ခွန်ပန်းစိန် က ၁၉၄၇ ခုနှစ် ဖေဖော်ဝါရီလ ၁၁ ရက်နေ့တွင် လက်မှတ်ရေးထိုး သတ်မှတ်ခဲ့ခြင်းဖြစ်ကြောင်း လေ့လာသိရှိရသည်။