သျှမ်းပြည်မြောက်ပိုင်းရှိ တအာင်းအမျိုးသား လွတ်မြောက်ရေးတပ်မတော် TNLA က သိမ်းပိုက်ထားသည့် မြို့များတွင် ကျင့်သုံးမည့် စစ်မှုထမ်းဆိုင်ရာ မူဝါဒကို ဖေဖော်ဝါရီလ ၄ ရက်နေ့တွင် ထုတ်ပြန်လိုက်သည်။
“၁၀၂၇ စစ်ဆင်ရေး”အတွင်း တအာင်း(ပလောင်)တပ်ဖွဲ့ TNLA က သိမ်းပိုက်ရရှိထားသည့် နယ်မြေများ၌ ကျင့်သုံးမည့် စစ်မှုထမ်းဆိုင်ရာ မူဝါဒတွင် အသက်(၁၆)နှစ်အထက် ကျန်းမာရေးကောင်းမွန်သည့် တအာင်း(ပလောင်) အမျိုးသားများ၊ မိသားစုအတွင်း သားယောကျ်ား ၂ ဦးနှင့်အထက် ရှိပါက မဖြစ်မနေ စစ်မှုထမ်းရမည်ဟု ရုပ်သံထုတ်ပြန်ချက်အရ သိရှိရသည်။
“အသက်ပြည့်ပြီးသူ ၁၈ နှစ်မှ ၃၅ နှစ်အထိ တအာင်းလူမျိုး”များကို စစ်မှုထမ်းဆိုင်ရာ မူဝါဒအရ တပ်သားစုဆောင်း ခေါ်ယူနေကြောင်း TNLA တပ်ဖွဲ့၏ သတင်းနှင့်ပြန်ကြားရေးဌာနမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် တအာင်း(ပလောင်)တပ်ဖွဲ့ TNLA က ထိန်းချုပ်ထားသည့် နမ့်ဆန်၊ မန်တုံ၊ နမ္မတူနှင့် နမ့်ခမ်းမြို့နယ်များတွင် စစ်မှုထမ်းရန် လူငယ်များကို တပ်သားသစ်စုဆောင်းမှုများ လုပ်ဆောင်နေကြောင်း သိရပြီး ၎င်းတို့အထဲတွင် ကျောင်းနေအရွယ် ကလေးများလည်း ပါဝင်နေကြောင်း ဒေသခံများက ပြောသည်။
၎င်းကိစ္စနှင့် ပတ်သက်ပြီး သျှမ်းသံတော်ဆင့်မှ TNLA တပ်ဖွဲ့ထံသို့ ဆက်သွယ်မေးမြန်းခဲ့ရာ “အသက်မပြည့်ရင် ခေါ်ယူခြင်း မရှိပါဘူး”ဟု TNLA တပ်ဖွဲ့၏ သတင်းနှင့်ပြန်ကြားရေးဌာနမှ တာဝန်ရှိသူတစ်ဦးက သျှမ်းသံတော်ဆင့်ကို ဆက်ပြောသည်။
ယခုထုတ်ပြန်လာသည့် TNLA တပ်ဖွဲ့၏ စစ်မှုထမ်းဆိုင်ရာ မူဝါဒတွင် မိသားစုအတွင်း သားယောကျ်ား ၂ ဦးရှိသော်လည်း တစ်ဦးမှာ သာသနာ့ဘောင် ဝင်ရောက်နေသူ၊ ကျန်းမာရေး ချို့ယွင်းချက်ရှိသူနှင့် ကိုယ်လက်အင်္ဂါ မသန်စွမ်းသူ ဖြစ်ပါက စစ်မှုထမ်းကင်းလွတ်ခွင့် ရမည်ဟု ဆိုသည်။
ထို့အပြင် မိသားစုအတွင်း သမီးမိန်းကလေး ၃ ဦးနှင့်အထက် ရှိပါက အနည်းဆုံး ၁ ဦး စစ်မှုထမ်းရမည်ဖြစ်ပြီး ၎င်းတို့အထဲမှ တစ်ဦးသည် အရပ်ဘက်အဖွဲ့အစည်းများတွင် ဗဟိုကော်မတီအဆင့် တာဝန်ထမ်းဆောင်နေမှသာ စစ်မှုထမ်း ကင်းလွတ်ခွင့်ရမည်ဟု သိရသည်။
တအာင်းအမျိုးသား လွတ်မြောက်ရေးတပ်မတော် TNLA သည် စစ်ဒေသအဖြစ် တပ်မဟာ (၇) ခု ဖွဲ့စည်းထားပြီး တပ်မဟာ တစ်ခုလျှင် တပ်ရင်း ၅ ရင်း ရှိကာ အုပ်ချုပ်ရေးနယ်မြေအဖြစ် ခရိုင် (၅) ခု သတ်မှတ်ထားသည်။
“၁၀၂၇ စစ်ဆင်ရေး”အတွင်း နမ့်ဆန်၊ မန်တုံ၊ နမ္မတူ၊ နမ့်ခမ်း၊ ကွတ်ခိုင်၊ မိုင်းလုံနှင့် မိုင်းငေါ့မြို့တို့ကို TNLA တပ်ဖွဲ့မှ သိမ်းပိုက်ထိန်းချုပ်ထားပြီး အုပ်ချုပ်ရေးလုပ်ငန်းများ လည်ပတ်နိုင်ရန် လုပ်ဆောင်လျက်ရှိသည်။
၎င်းမြို့များသို့ TNLA တပ်ဖွဲ့၏ ထိပ်ပိုင်းခေါင်းဆောင်များက သွားရောက်ကြည့်ရှုစစ်ဆေးပြီး ဒေသခံ ပြည်သူလူထုနှင့်လည်း တွေ့ဆုံဆွေးနွေးမှုများ ပြုလုပ်နေကြောင်း သိရသည်။
