သျှမ်းပြည် မိုးမိတ်မြို့နယ် စစ်ကောင်စီတပ်က အိမ်စောင့်ကျန်ခဲ့သည့် အရပ်သား ၅ ဦးကို ပစ်သတ်ခဲ့ပြီး အမျိုးသမီး ၅ ဦးအပါအဝင် ၄၀ ဦးထက်မနည်းကိုလည်း ဖမ်းဆီးထားကြောင်း စုံစမ်းသိရသည်။

ဖေဖော်ဝါရီလ ၂ ရက် ညနေပိုင်းတွင် မိုးမိတ်မြို့နယ် ရွှေဇာလီကျေးရွာတွင် အိမ်စောင့်ကျန်ခဲ့သည့် အရပ်သား ၅ ဦးကို အကြောင်းပြချက်မရှိဘဲ စစ်ဆေးရန်ဟုဆိုကာ စစ်ကောင်စီတပ်မှ ရွာလယ်ဘုရားသို့ ခေါ်ဆောင်သွားခဲ့ပြီး ပစ်သတ်ခဲ့ကြောင်း မိုးမိတ်မြို့ဒေသခံများက ပြောသည်။

“အိမ်ထဲမှာနေတဲ့လူ အကုန်လုံးကို ထွက်ခိုင်းတာ။ သူတို့ ငါးဦးက ဘုရားထဲကို ခေါ်သွားပြီးမှ စစ်မယ်၊ ဆေးမယ်ဆိုပြီးတော့ သတ်လိုက်တာပေါ့။ ၂ ရက်နေ့ ညနေပိုင်းကို ခေါ်တာ၊ နောက်ရက် မနက်မှ သေတယ်ဆိုတာ အတည်ပြုလို့ရတာ။ အဲ့လိုပဲ တစ်ညတိတ် ခေါ်စစ်နေကျ၊ မနက်ဆို ပြန်လွှတ်ပေးနေကျပဲပေါ့။ အဲ့တာ မလွှတ်တော့ ဟိုမှာသွားကြည့်တာ သေနေပြီ”ဟု မိုးမိတ်မြို့မှ ဖြစ်စဉ်သိရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

မိုးမိတ်စစ်ကောင်စီတပ်က ရွာလယ်ဘုရားတွင် ပစ်သတ်ခဲ့သူများမှာ ရွှေဇာလီကျေးရွာနေ အသက် ၄၀ မှ ၅၀ နှစ်အရွယ်ရှိ ဦး‌ဇော်ဝင်း၊ ပန်းရံဆရာဖြစ်သူ ဦးမောင်မြင့်နှင့် ဦးမောင်တင့်၊ ဈေးသည်တစ်ဦးနှင့် အခြားအရပ်သားတစ်ဦးတို့ဖြစ်ကြောင်း မိုးမိတ်ဒေသခံများထံမှ သိရသည်။

အလားတူ မိုးမိတ်မြို့ မြောက်ပိုင်းရပ်ကွက်ရှိ မြို့လယ်သာသနာ့ဗိမာန်တွင် တပ်မ-၉၉ နှင့် နယ်မြေခံတပ်မှ စစ်ကောင်စီတပ်သားများက နေအိမ်ပြန်ကြည့်သည့် စစ်ဘေးရှောင်ဦးရေ ၄၀ ဦးထက်မနည်းကို ဖမ်းဆီးထားပြီး ငွေခြိမ်းခြောက်တောင်းနေကြောင်း မိုးမိတ်ဒေသခံများက ပြောသည်။

“အခုမြို့ထဲမှာလည်း မိန်းကလေး ၄ ဦး ၅ ဦးလောက် ပါတယ်၊ ယောကျ်ားလေးကတော့ ဆိုင်ကယ်တွေ့တာ အစီး ၄၀ လောက်ရှိတယ်။ စစ်ကောင်စီတွေက အိမ်တွေထဲ ဝင်မွှေပြီး တံခါးဖွင့်ခံထားရတော့ တံခါးသွားပိတ်ကြတာ။ အာသံလမ်း၊ ရွှေဇာလီလမ်းပွင့်တယ်ဆိုပြီး ဝင်တဲ့လူတွေကို အကုန်ဖမ်းထည့်ထားတာ။ ပိုက်ဆံနဲ့ ရွေးရမယ်လို့ ပြောတယ်”ဟု မိုးမိတ်မြို့မှ ၎င်းဒေသခံအမျိုးသားတစ်ဦးက သျှမ်းသံတော်ဆင့်ကို ဆက်ပြောသည်။

ထို့အပြင် ရွှေဇာလီနှင့် နမ့်မောင်းချောင်းတံတားတွင်လည်း စစ်ကောင်စီလက်အောက်ခံ တပ်မ-၉၉ နှင့် ပျူစောထီးအဖွဲ့ဝင်များက စစ်ဘေးရှောင်များထံမှ ပစ္စည်းလုယူနေကြောင်း မိုးမိတ်ဒေသခံများက ပြောသည်။

မိုးမိတ်မြို့ စစ်ကောင်စီတပ်နှင့် ကချင်လွတ်မြောက်ရေးတပ် KIA တို့၏ နှစ်ဘက်ထိတွေ့တိုက်ပွဲ တစ်လအတွင်း စစ်ဘေးရှောင်ဦးရေ တစ်သောင်းခန့်သည် မန္တလေး၊ ပြင်ဦးလွင်မြို့ဘက်သို့ အများအပြား ထွက်ပြေးတိမ်းရှောင်နေရပြီး လက်ခုပ်ပင်နှင့် မိုးဘုံရွာတွင်လည်း စစ်ဘေးရှောင် ၁၀၀၀ ကျော် ခိုလှုံလျက်ရှိကာ စားနပ်ရိက္ခာနှင့် အဝတ်အထည်များ လိုအပ်နေကြောင်း စစ်ဘေးရှောင်ကူညီသူများထံမှ သိရသည်။

မိုးမိတ်မြို့နယ်တွင် စစ်ကောင်စီတပ်၏ လက်နက်ကြီးနှင့် လေကြောင်းဗုံးကြဲ တိုက်ခိုက်မှုများကြောင့် အမျိုးသမီး ၄ ဦးအပါအဝင် စုစုပေါင်း ၁၇ ဦးထက်မနည်း သေဆုံးခဲ့ပြီး မိုးမိတ်မြို့မဈေးနှင့် ပြည်သူနေအိမ် ၂၀၀ ကျော်လည်း မီးလောင်ပျက်စီးခဲ့ကြောင်း မိုးမိတ်ဒေသခံများက ပြောသည်။