Sunday, May 26, 2024

ဆီဆိုင်မြို့နယ်မှ ထွက်ပြေးလာသည့် စစ်ရှောင်များကို စစ်ကောင်စီတပ်ဖွဲ့က စစ်ဆေးရိုက်နှိက်၍ အမျိုးသား ၁ ဦးသေဆုံး

Must read

သျှမ်းပြည် ဆီဆိုင်မြို့နယ်မှ ထွက်ပြေးတိမ်းရှောင်လာသည့် စစ်ရှောင်များကို မြို့အထွက်ရှိ စစ်ကောင်စီတပ်ဖွဲ့များက စစ်ဆေးရိုက်နှိက်ခဲ့သဖြင့် စစ်ရှောင်အမျိုးသား ၁ ဦး သေဆုံးသွားခဲ့ကြောင်း စုံစမ်းသိရသည်။

ဖြစ်စဉ်မှာ ယနေ့ (ဇန်နဝါရီလ ၅ ရက်) မနက်ပိုင်း ၁၀ နာရီဝန်းကျင်တွင် ဆီဆိုင်မြို့နယ် နောင်အယ်ရွာမှ အမျိုသားတစ်ဦးသည် တိုက်ပွဲကြောင့် ဆိုက်ခေါင်ကျေးရွာဘက်သို့ ထွက်လားပြေးတိမ်းလာနေစဉ် မြို့အထွက်ရှိ စစ်ကောင်စီ၏ ခမရ (၄၂၃) တပ်စခန်းရှေ့မှ စစ်ကောင်စီတပ်သားနှင့်ထိပ်တွေ့ပြီး စစ်ဆေးရိုက်ခံရ၍ သေဆုံးသွားကြောင်း ဆီဆိုင်မြို့ဒေသခံတစ်ဦးက ပြောသည်။

“အရင်လာတဲ့သူတွေကို ဖမ်းထားပြီးချုပ်ထားတာ။ နောက်ကလာတဲ့သူတွေလည်း ပစ်ပြီးရပ်ခိုင်းတော့ အဲ့မှာရုန်းရင်းဆန်ခတ်ဖြစ်ပြီး သူကကြားထဲခံရပြီး ဆုံးသွားတာ။ အလောင်းကို သယ်လာချိန်မှာတော့ သေနတ်ဒဏ်ရာထားတာ မတွေ့ဘူး။ နှာခေါင်းနဲ့ ပါးစပ်မှာ သွေးတွေထွက်နေတာတော့ တွေ့တယ်” ဟု ၎င်းဒေသခံတစ်ဦးက ပြောသည်။

အဆိုပါ သေဆုံးသွားသူသည် အသက် ၅၀ ကျော် ဦးခွန်သြဖြစ်ကြောင်း သိရသည်။
ပြီးခဲ့သည့် (ဇန်နဝါရီလ ၂၄ ရက်) မှစပြီး ဆီဆိုင်မြို့ပေါ်တွင် ပအိုဝ်းအမျိုးသားလွတ်မြောက်ရေး တပ်မတော် PNLA နှင့် စစ်ကောင်စီတပ်ဖွဲ့တို့အကြား တိုက်ပွဲဖြစ်ပွားလာပြီးနောက် ဒေသခံနှင့် စစ်ဘေးရှောင်များကို စစ်ကောင်စီမှ ပစ်မှတ်ထားပြီး စစ်ဆေးမေးမြန်းကာ ရိုက်နှိက်မှုပြုလုပ် နေလျက်ရှိကြောင်း ဆိုသည်။

“ကျနော်အတွေ့အကြုံအရဆိုရင် နေရာမှာတင် ပွဲရှင်းပြီးပါပဲ။ ဒီတိုက်ပွဲကြားထဲမှာ ဒီလိုဖြစ်စဉ်တွေ ကြုံနေရတဲ့သူ ၅ ခါကျော်လောက်ရှိပြီ။ ဆီဆိုင်မြို့တွင်းထဲမှာကော၊ မြို့အဝင်အထွက်မှာကော ဖြစ်တာ။ တချို့လက်လှမ်းမမှီတဲ့ သတင်းတွေလည်း ရှိတယ်” ဟု ဒေသခံတစ်ဦးက ထပ်လောင်းပြောသည်။

အလားတူ ဇန်နဝါရီလ ၂၆ ရက်တွင်လည်းဆီဆိုင်မြို့နယ် အခြေစိုက် ခမရ (၄၂၄) တပ်စခန်းအတွင်း ခြေတစ်ဖက်ကျိုးဒဏ်ရာနှင့် လက်ပြန်ကြိုးတုတ် သေဆုံးနေသည့် အချုပ်သားအလောင်း ၁ လောင်းတွေ့ရှိခဲ့သည်။

သျှမ်းသံတော်ဆင့်မှ သီခြားကောက်ယူထားသည့် စာရင်းမှတ်တမ်းအရ ဆီဆိုင်မြို့အတွင်း တိုက်ပွဲကြား ပြည်သူ ၃ ဦးသေဆုံးပြီး ၆ ဦးထက်မနည်း ဒဏ်ရာရရှိခဲ့သည်။

Leave a Comments

- Advertisement -spot_img

Latest article