သျှမ်းပြည် ညောင်ရွှေမြို့ရှိ စစ်ကောင်စီတပ်နှင့် ပအိုဝ်း ပြည်သူ့စစ် (PNA)တပ်သားများကို ဒေသခံများက နေ့စဥ်ထမင်းပို့နေရသဖြင့် အခက်အခဲဖြစ်နေကြာင်း စုံစမ်းသိရသည်။
ညောင်ရွှေမြို့နယ်ရှိ မှော်ဘီလမ်းစုံ အဝိုင်းပတ်တောင်ဘက်ရှိ စစ်ဆေးရေးဂိတ်၌ စစ်ကောင်စီတပ်သားများနှင့် PNA တပ်သားများအတွက် ထမင်းထုပ်ကို တစ်အိမ်တစ်ထုပ် ရက်တိုင်း ပို့ဆောင်ပေးနေရသောကြောင့် ဒေသခံများအတွက် စားဝတ်နေရေး အခက်ခဲရှိလာကြောင်းသိရှိရပါသည်။
“နေ့တိုင်းပို့ရတယ်။ ကိုယ်စားဖို့က အသာထား သူတို့အတွက်ကို ဦးစားပေး လုပ်နေရတယ်။ မဟုတ်ရင် သူတို့က မထင်ရင် မထင်သလို ဆဲတယ်။ အကြာင်းမရှိ အကြောင်းရှာပြီး မပစ်သတ်ဘူးလို့ပြောမရဘူးလေ”ဟု ဒေသခံတစ်ဦးက ပြောပါသည်။
ထိုသို့ ပို့ဆောင်နေရသည်မှာ ၅ လခန့် ကြာမြင့်ပြီဖြစ်ပြီးဖြစ်ကြောင်း၊ ထိုကဲ့သို့ ပို့ဆောင်နေရတာကြောင့် ဒေသခံများတွက် စားသောက်ရေးပါ အခက်အခဲရှိလာပြီး လုံခြုံရေးအရလည်း စိတ်ပူနေရကြောင်းကို အခုလိုပြောပြထားသည်။
” ကိုယ်စားဖို့တောင် အနိုင်နိုင်ဆိုနေမှ သူတို့ကို ပို့နေရတော့ စားဖို့ဘယ် ကျန်တော့မှာလဲ။ ခေတ်ကာလကလည်း မကောင်း ပိုက်ဆံရှာဖို့ကခက်တော့ ဝင်ငွေကမရှိနဲ့ အဆင်မပြေနေဘူး။”ဟု ထိုအမျိူးသားက ထပ်ဆင့်ပြောထားသည်။
ဒေသခံများသည် ဆန်အိတ်ကို တစ်အိတ်သာ သယ်ဆောင်ခွင့်ရှိပြီး တစ်အိတ်ထက်ပိုလျှင် ကရင်နီပြည်ဘက်သို့ ထောက်ပံ့နေသည်ဟု စွပ်စွဲ ပြောဆိုမှုများလုပ်ကာ ပြန်သိမ်းသွားကြောင်း ဒေသခံများထံမှ သိရပါသည်။
