အာဏာသိမ်းစစ်ကောင်စီသည် အုပ်ချုပ်ရေးကာလကို နောက်ထပ်(၆)လ သက်တမ်းတိုး အုပ်ချုပ်သွားမည်ဖြစ်ကြောင်း သတင်းသိရသည်။

ယမန်နေ့ (ဇန်နဝါရီလ ၃၁ ရက်)တွင် နေပြည်တော်၌ အမျိုးသားကာကွယ်ရေးနှင့် လုံခြုံရေးကောင်စီ အစည်းအဝေး ဆုံးဖြတ်ချက်အရ အရေးပေါ်ကာလသက်တမ်းကို ၅ ကြိမ်မြောက်အဖြစ် ထပ်မံတိုးမြှင့်ခဲ့ပြီး ပြည်ထောင်စုအစိုးရကိုလည်း ပြင်ဆင်ဖွဲ့စည်းကြောင်း အာဏာသိမ်းစစ်ကောင်စီက သတင်းထုတ်ပြန်လာသည်။

တိုင်းရင်းသားလက်နက်ကိုင်နယ်မြေများရှိ မူးယစ်ဆေးဝါး ထုတ်လုပ်ရောင်းဝယ်ခြင်းနှင့် အွန်လိုင်းလိမ်လည်မှု နှိမ်နင်းဆောင်ရွက်ခြင်း အခြေအနေ၊ အထွေထွေရွေးကောက်ပွဲ ကျင်းပနိုင်ရေးအခြေအနေနှင့် ပြည်လုံးကျွတ် သန်းခေါင်စာရင်းကောက်ယူရန် ပြင်ဆင်နေသည့် အခြေအနေများကို အကြောင်းပြပြီး ယာယီသမ္မတ ဦးမြင့်ဆွေက အရေးပေါ်ကာလ နောက်ထပ် ၆ လ သက်တမ်းတိုးမြှင့်ပေးခဲ့သည်။

“နောက်ထပ် သက်တမ်းတိုးတာ မတိုးတာက အရေးမကြီးဘူး၊ သူတို့က အမှန်တကယ် အပြောင်းအလဲ လုပ်မလား မလုပ်ဘူးလား ဆိုတာက ပိုအရေးကြီးတာ။ အခု လုပ်နေတာက လူကိုပဲ ပြောင်းနေတာ၊ လုပ်နည်းလုပ်ဟန် ပြောင်းလာမလားဆိုတာ ထပ်ပြီးစောင့်ကြည့်ရဦးမယ်”ဟု နေပြည်တော်မှ စစ်တပ်အသိုင်းအဝိုင်းနှင့် နီးစပ်သူတစ်ဦးက ၎င်း၏ သဘောထားအမြင်ကို သျှမ်းသံတော်ဆင့်ကို ပြောသည်။

အလားတူ စစ်ကောင်စီက ရွေးကောက်ပွဲထပ်မံကျင်းပနိုင်ရန် ခြေလှမ်းပြင်ဆင်လာပြီး ယခင်က ပြည်ထောင်စုရွေးကောက်ပွဲကော်မရှင်ဥက္ကဋ္ဌ ဦးသိန်းစိုးကို ကျန်းမာရေးအကြောင်းပြချက်ဖြင့် အနားပေးလိုက်ပြီး ဦးကိုကို ဖြင့် အစားထိုးခန့်အပ်ထားသည်။

ထို့အပြင် စစ်ကောင်စီက ညီနောင်မဟာမိတ်တပ်များထံ တပ်စခန်းအများအပြား လက်လွတ်ဆုံးရှုံးခဲ့ရသည့် သျှမ်းပြည်တွင်လည်း ပြည်နယ်ဝန်ကြီးချုပ် ဦး‌အောင်ဇော်အေး ကို ဦးအောင်အောင်ဖြင့် အစားထိုးခန့်အပ်ကြောင်း ထုတ်ပြန်လာခဲ့သည်။

“အခု ပြည်သူတွေက ရွေးကောက်ပွဲကို မမျှော်လင့်ဘူး။ ပြည်သူတွေ မျှော်လင့်နေတာက တိုင်းပြည် အေးအေးချမ်းချမ်းနဲ့ နေရပ်ပြန်နိုင်ပြီး သားသမီးတွေ ပညာဆက်သင်နိုင်ဖို့ပဲ။ ဒီလို အပြောင်းအလဲမျိုး ဖြစ်လာနိုင်မလားဆိုတဲ့ မေးခွန်းတွေ ရှိတာပေါ့”ဟု နေပြည်တော်စစ်တပ်အသိုင်းအဝိုင်းနှင့် နီးစပ်သူတစ်ဦးက သျှမ်းသံတော်ဆင့်ကို ဆက်ပြောသည်။

၂၀၀၈ ဖွဲ့စည်းပုံအခြေခံ ဥပဒေအရ အရေးပေါ်ကာလ သက်တမ်းတိုးခြင်းဆိုင်ရာ ပုဒ်မ ၄၂၅ တွင် တပ်မတော် ကာကွယ်ရေး ဦးစီးချုပ်က တာဝန်ကို ပြီးမြောက်အောင် မဆောင်ရွက်နိုင်သေးပါက သာမန်အားဖြင့် ခြောက်လ နှစ်ကြိမ် သက်တမ်း တိုးပေးနိုင်ကြောင်း ပြဋ္ဌာန်းထားသော်လည်း သာမန်မဟုတ်သည့် အခြေအနေဟုဆိုကာ စစ်ကောင်စီ၏ အရေးပေါ်ကာလ သက်တမ်းတိုးမှုသည် ယခုအကြိမ်ဆိုလျှင်(၅) ကြိမ်မြောက်အထိ ရှိလာနေပြီ ဖြစ်သည်။