သျှမ်းပြည် မိုးမိတ်မြို့နယ် စစ်ကောင်စီတပ်က ရိက္ခာပြန်ယူသည့် စစ်ဘေးရှောင်များကို သေနတ်ပစ်ခတ်ပြီး ပြည်သူနေအိမ်များထဲသို့ ပစ္စည်းဝင်ရောက်ခိုးယူကာ မီးရှို့ဖျက်ဆီးနေကြောင်း စုံစမ်းသိရသည်။

မိုးမိတ်မြို့ကို စစ်ကောင်စီတပ်က ဇန်နဝါရီလ ၂၇ ရက်တွင် ပြန်လည်ထိန်းချုပ်ခဲ့ပြီးနောက် မြို့ပေါ်သို့ ရိက္ခာပြန်ယူသည့် စစ်ဘေးရှောင်များကို သေနတ်ပစ်ခတ်ခဲ့ပြီး စစ်ကောင်စီတပ်သားများက လက်ခုပ်တန်းနှင့် မြောက်ပိုင်းရပ်ကွက်ရှိ ပြည်သူနေအိမ်များထဲသို့ ပစ္စည်းဝင်ရောက်ခိုးယူကာ မီးရှို့ဖျက်ဆီးနေကြောင်း မိုးမိတ်မြို့ စစ်ဘေးရှောင်များက ပြောသည်။

“မြို့ထဲကို သူတို့တပ်ဘက်က ပေးမဝင်ဘူး ပိတ်ထားတယ်။ အခုဆို စားစရာမရှိလို့ ကိုယ့်အိမ်ထဲက ဆန်သွားသယ်တာ သေနတ်နဲ့ ပစ်ခံရလို့ ခြေထောက်ကို သေနတ်မှန်သွားတယ်။ တော်တော်ဆိုးဆိုး ဝါးဝါးပဲ။ အခုက တပ်မိသားစု အချင်းချင်းတောင် မရဘူး”ဟု မိုးမိတ်မြို့ဒေသခံ စစ်ဘေးရှောင်အမျိုးသားတစ်ဦးက သျှမ်းသံတော်ဆင့်ကို ပြောသည်။

မိုးမိတ်မြို့ စစ်ကောင်စီတပ်နှင့် ကချင်လွတ်မြောက်ရေးတပ် KIA တို့၏ နှစ်ဘက်ထိတွေ့တိုက်ပွဲ တစ်လအတွင်း စစ်ဘေးရှောင်ဦးရေ တစ်သောင်းခန့်သည် မန္တလေး၊ ပြင်ဦးလွင်မြို့ဘက်သို့ အများအပြား ထွက်ပြေးတိမ်းရှောင်နေရပြီး လက်ခုပ်ပင်နှင့် မိုးဘုံရွာတွင်လည်း စစ်ဘေးရှောင် ၁၀၀၀ ကျော် ခိုလှုံလျက်ရှိကာ စားနပ်ရိက္ခာနှင့် အဝတ်အထည်များ လိုအပ်နေကြောင်း မိုးမိတ်ဒေသခံများထံမှ သိရသည်။

“မြို့ရှောင်လမ်းနဲ့ ရွှေစာလီဘက်ကနေ သူတို့မသိခင် ဝင်သွားတဲ့အချိန် စစ်ကြောင်းတွေနဲ့ တိုးရင် ကြိုးချည်တုပ်ပြီး ဝမ်းလျားမှောက်ခိုင်းတာ၊ လွတ်စေချင်ရင် ပိုက်ဆံ ၅ သိန်းပေးဆိုပြီးတော့မှ အဲ့လိုလုပ်တာ။ အိမ်ကောင်းတွေဆိုလည်း စစ်တပ်က သေနတ်နဲ့ ပစ်ဖောက်သွားတယ်၊ ပစ္စည်းတွေ စိတ်ကြိုက်ယူပြီးမှ အိမ်ကို မီးရှို့သွားတာ”ဟု မိုးမိတ်မြို့မှ ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။

အလားတူ ဇန်နဝါရီလ ၂၇ ရက်နေ့က မိုးမိတ်မြို့လယ်လမ်းတွင် ဖွင့်လှစ်ထားသည့် ဆိုင်ကယ်အရောင်းဆိုင်များမှ ကျပ်သိန်း ၂၀၀၀ ကျော် တန်ဖိုးရှိ ဆိုင်ကယ်အများအပြားကိုလည်း မိုးမိတ်စစ်ကောင်စီတပ် ခလရ-၂၇၆ မှ ကားကြီးများဖြင့် သယ်ဆောင်သွားခဲ့ပြီး အပြစ်မဲ့ အရပ်သားပြည်သူများကို ဖမ်းဆီးစစ်ဆေးမှုများ ရှိနေကြောင်း မျက်မြင်တွေ့ရှိခဲ့သည့် မိုးမိတ်ဒေသခံများက သျှမ်းသံတော်ဆင့်ကို ပြောသည်။

မိုးမိတ်မြို့နယ်ရှိ စစ်ကောင်စီလက်အောက်ခံ တပ်နှင့် ရဲစခန်းတို့ကို ကချင်လွတ်မြောက်ရေးတပ် KIA က ဇန်နဝါရီလ ၂၄ ရက်တွင် ထိန်းချုပ်နိုင်ခဲ့သော်လည်း စစ်ကောင်စီဝါဒဖြန့် မီဒီယာများတွင် စစ်ကောင်စီတပ်က မိုးမိတ်မြို့ကို ဇန်နဝါရီလ ၂၇ ရက်က ပြန်လည်သိမ်းပိုက်နိုင်ခဲ့ကြောင်း ဖော်ပြထားသည်။

စစ်ကောင်စီတပ်နှင့် KIA တပ်ဖွဲ့တို့၏ မိုးမိတ်မြို့နယ် တိုက်ပွဲတစ်လအတွင်း လက်နက်ကြီးနှင့် လေကြောင်းတိုက်ခိုက်မှုများကြောင့် အမျိုးသမီး ၄ ဦးအပါအဝင် စုစုပေါင်း ၁၂ ဦးထက်မနည်း သေဆုံးခဲ့ပြီး မိုးမိတ်မြို့မဈေးနှင့် ပြည်သူနေအိမ် ၁၀၀ ကျော်လည်း မီးလောင်ပျက်စီးခဲ့ကြောင်း မိုးမိတ်ဒေသခံများက ပြောသည်။