သျှမ်းပြည် ဆီဆိုင်မြို့အနီးတွင် စစ်ကောင်စီတပ်နှင့် တိုက်ပွဲဖြစ်ပွားခဲ့ပြီးနောက် စစ်ကောင်စီ အလောင်း ၅၀ တွေ့ပြီး လက်နက် ၅၀ ခန့်သိမ်းပိုက်ခဲ့ရရှိခဲ့ကြောင်း ပအိုဝ်းအမျိုးသား လွတ်မြောက်ရေးတပ်မတော် PNLA ပြောဆိုလိုက်သည်။
ယမန်နေ့ (ဇန်နဝါရီလ ၃၀ ရက်)တွင် ပအိုဝ်းအမျိုးသား လွတ်မြောက်ရေးတပ်မတော် PNLAမှ ဆီဆိုင်မြို့နယ်အတွင်း လုံခြုံရေးဆိုင်ရာ ကိစ္စကို ဆောင်ရွက်နေစဉ် စစ်ကောင်စီတပ်နှင့် မြို့မြောက်ဘက် တစ်နေရာတွင် တိုက်ပွဲခဲ့ကြောင်း PNLA က ယနေ့ (ဇန်နဝါရီလ ၃၁ ရက်)တွင် ထုတ်ပြန်သည်။
ယင်းတိုက်ပွဲဖြစ်ပွားပြီးနောက် PNLA မှသွားရောက် နယ်မြေရှင်းလင်းခဲ့ရာ စစ်ကောင်စီတပ်ဖွဲ့ဝင် တပ်သား၏ အလောင်း ၅၀ ခန့် တွေ့ပြီး လက်နက် ၅၀ ခန့် သိမ်းပိုက်ရရှိခဲ့ကြောင်း ဆိုသည်။
ထို့နောက် စစ်ကောင်စီတပ်ဖွဲ့သည် တိုက်ပွဲဖြစ်ပွားခြင်းမရှိ၊ PNLA တပ်ဖွဲ့များ လှုပ်ရှားခြင်း မရှိသည့် လွယ်ထွဲကျေးရွာထဲကို လေယာဉ်ဖြင့် ညပိုင်းတွင်းလာရောက်ဗုံးကြဲတိုက်ခိုက်ခဲ့သဖြင့် ယင်းကျေးရွာရှိ ဘုန်းကြီးကျောင်းဆောင် ပျက်စီးသွားခဲ့သည်ဟု ဆိုသည်။
ဆီဆိုင်မြို့နယ်အတွင်း တိုက်ပွဲစတင်ဖြစ်ပွားလာချိန်မှစ၍ စစ်ကောင်စီနှင့် လက်အောက်ခံ ပြည်သူ့စစ်အဖွဲ့ PNAတို့သည် ပအိုဝ်းကျေးရွာများအား လက်နက်ကြီးများ၊ လေယာဉ်များဖြင့် အသုံးပြုပြီး ပစ်ခတ်ကာ ဖျက်စီးနေလျက်ရှိကြောင်း PNLAက ပြောဆိုထားသည်။
“အခုထိတော့ အိမ်ကိုမပြန်ရဲသေးဘူး။ ရွာတွေဘက်မှာ ခဏစစ်ရှောင်နေတုန်းပဲ။ ဒီမှာနေတာတောင် အသံတွေက တစ်ချက်ချက်ကြားနေရသေးတယ်။ လေယာဉ်သံတွေလည်း ကြားနေရသေးတယ်” ဆီဆိုင်မြို့နယ် ဒေသခံ အမျိုးသမီးတစ်ဦးက ပြောသည်။
အလားတူ တောင်ကြီးမြို့နယ် ကျောက်တလုံးဒေသနှင့် ဟိုပုံးမြို့နယ်တွင်လည်း ပအိုဝ်းအမျိုးသား လွတ်မြောက်ရေး တပ်မတော် PNLA ၏နာမည်ကို စစ်ကောင်စီနှင့် PNA တို့က အလွှဲသုံးစားပြုပြီး တပ်ဖွဲ့ဝင်အသစ်များကို လိမ်လည်စုဆောင်းနေသည်ဟု ထပ်လောင်းပြောဆိုထားသည်။
PNLA တပ်ဖွဲ့အနေဖြင့် အဆိုပါကျေးရွာများတွင် တပ်ဖွဲ့ဝင်အသစ်များ စုဆောင်းခြင်းမရှိကြောင်း အသိပေးထားသည်။
လက်ရှိအချိန်ထိ စစ်ကောင်စီနှင့် လက်အောက်ခံ ပြည်သူ့စစ်အဖွဲ့ PNO တို့သည် ဆီဆိုင်မြို့နှင့် ကျေးရွာဒေသကို လက်နက်ကြီးများဖြင့် တိုက်ခိုက်ခြင်း၊ ဗုံးကြဲတိုက်ခိုက်ခြင်းကြောင့် မြို့တွင်းအခြေအနေမှာ လုံခြုံမှုအားနည်းနေဆဲ ဖြစ်သည်။
ထို့ကြောင့် ဒေသခံပြည်သူများအနေဖြင့် မလိုအပ်ဘဲ နေအိမ်ပြန်ကြည့်ခြင်း၊ ပစ္စည်းများ ပြန်သယ်ခြင်းများ မပြုလုပ်ကြသေးရန်နှင့် လုံခြုံဘေးကင်းသည့်နေရာများသို့ ခေတ္တခိုလှုံနေထိုင်ကြရန် တိုက်တွန်းထားသည်။
