သျှမ်းပြည် သီပေါမြို့နယ်အတွင်းရှိ နမ္မချောင်းပေါ်တွင် တည်ဆောက်ထားသည့် စဉ့်အင်ယာယီတံတားပေါ်မှ ယာဉ်ငယ်များ စတင်ဖြတ်သန်းသွားလာနိုင်ပြီဖြစ်ကြောင်း စုံစမ်းသိရသည်။
ယနေ့ (ဇန်နဝါရီလ ၂၇ ရက်) နံနက် ၁၀ နာရီခန့်မှ စတင်၍ သီပေါမြို့နယ် နမ္မချောင်းပေါ်တွင် ဆောက်လုပ်ထားသည့် စဉ့်အင် ယာယီတံတားပေါ်မှတဆင့် (၈)တန်ထက် မပိုသော ယာဉ်ငယ်များ စတင်ဖြတ်သန်းသွားလာနေပြီး သီပေါမှ လားရှိုးမြို့သို့ ပြည်ထောင်စုလမ်းမကြီးအတိုင်း ခရီးဆက်လက်ထွက်ခွာနိုင်ကြောင်း သီပေါဒေသခံများက ပြောသည်။
“စဉ့်အင်ယာယီတံတားက ကွန်ခိုက်ရွာနားမှာရှိတာ။ တံတားဖွင့်ပွဲက ဒီနေ့မနက် ၁၀ နာရီခွဲလောက်က လုပ်ပြီးသွားတော့ ကမ်းကူးမယ့် ယာဉ်ငယ်တွေ စလွှတ်ပေးတာ။”ဟု သီပေါမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
ယခုဆောက်လုပ်ပြီးစီးသွားသော စဉ့်အင်ယာယီတံတားသည် သစ်သားတံတား အမျိုးအစားဖြစ်ပြီး သတ်မှတ်အလေးချိန် ၈ တန်ထက် မပိုသော ခရီးသည်တင်ယာဉ်ငယ်များ ဖြတ်သန်းသွားလာနိုင်ပြီး တံတားဖြတ်သန်းခ တစ်ကြိမ်လျှင် ၂ သောင်းကျပ် ပေးဆောင်ရမည်ဖြစ်ကြောင်း သိရသည်။
“သီပေါဘက်က လာရင် ကုန်းမုံရွာနားကနေ ဝင်ရတယ်။ လားရှိုးဘက်က လာရင်တော့ စဉ့်အင်ရွာ နတ်စင်နားကလေ လမ်းထဲကွေ့ဝင်သွားရမယ်။ အခုတော့ အများကြီး နီးသွားပြီ၊ အချိန်သက်သာတာပေါ့”ဟု သီပေါမြို့မှ ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။
သီပေါမြို့နယ်အတွင်း နမ္မချောင်းကို ဖြတ်သန်းဆောက်လုပ်ထားသည့် စဉ့်အင်ယာယီတံတားကို ကွန်ခိုက်ကျေးရွာမှ ရွာသူရွာသားများ စုပေါင်းပြီး ဇန်နဝါရီလ ၇ ရက်နေ့မှ စတင်ဆောက်လုပ်ခဲ့ကာ ဇန်နဝါရီလ ၂၅ ရက်တွင် ပြီးစီးခဲ့သည်ဟု သိရသည်။
ပြီးခဲ့သည့် ဇန်နဝါရီလ ၁၈ ရက်ကလည်း သီပေါမြို့နယ်ရှိ AAA ကုမ္ပဏီမှ ဖျက်ဆီးခံထားရသည့် ကျင်သီတံတားပေါ်သို့ ကျောက်မီးသွေးများ လာရောက်သွန်ချခဲ့ပြီး မြေကော်ကား(ဘက်ဟိုး)ဖြင့် ကျောက်မဲဘက်ခြမ်းမှ ကုန်တင်ကားပေါ်သို့ ပြန်လည်ကဲ့ယူခဲ့ရာ ဒေသခံများက ကျင်သီတံတား ပြန်လည်ပြုပြင်နေသည်ဟု ထင်ယောင်ထင်မှား ဖြစ်ခဲ့ကြောင်း သီပေါဒေသခံများက ပြောသည်။
“၁၀၂၇ စစ်ဆင်ရေး”အတွင်း သီပေါမြို့နယ်တွင် ဗုံးခွဲဖျက်ဆီးခံထားရသည့် ကျောက်မဲ-သီပေါအကြားရှိ ကျင်သီတံတား၊ သီပေါ-လားရှိုးအကြားရှိ စဉ့်အင်တံတား၊ သီပေါ-နမ္မတူအကြားရှိ မိုးတေတံတားတို့အား လက်ရှိအချိန်အထိ ပြန်လည်ပြုပြင်နိုင်ခြင်း မရှိသေးကြောင်း သီပေါဒေသခံများထံမှ သိရသည်။
Leave a Comments