သျှမ်း-ကရင်နီ နယ်စပ်တကြောတွင် ဒေသခံနှင့် စစ်ရှောင်များ တိုက်ပွဲကြားတွင် ပိတ်မိနေကြောင် စုံစမ်းသိရသည်။

သျှမ်းပြည်-ကရင်နီ နယ်စပ်တကြောတွင် ဆီဆိုင်မြို့နယ် နှင့် လွိုင်ကော်မြို့နယ် ကြားရှိ ပိန်းချဉ်ကျေးရွာတွင် ပြည်သူများ ပိတ်မိနေပြီး စိုးရိမ်မှုများရှိနေကြောင်း ဒေသခံများက သျှမ်းသံတော်ဆင့်ကို ပြောသည်။

“ဆီဆိုင်ဖက်ကလဲ တိုက်ပွဲတွေဖြစ်နေတာလေ။ ဆီဆိုင်ကို ရောက်သွားတဲ့ ဟာတွေလဲ ထပ်ပြေးနေရတာ။ တချို့တွေတောင် ပြေးဖို့ပိုက်ဆံမရှိတော့ဘူး။ အိမ်ပြန်လာတာတွေ ရှိတယ်၊ လေယာဉ်နဲ့ဗုံးကြဲခံရမှာတော့ စိုးရိမ်တာပေါ့။ ခုက အကုန်လုံးကို ကြောက်နေရတာ၊စားဖို့သောက်ဖို့ ဝယ်ဖို့ခက်သွားပြီ၊ ရေရှည်ဆို ရင်‌တော့ စိုးရိမ်ရပါတယ်” ဟု ဒေသခံ အမျိုးသမီးတစ်ဦးတစ်ဦးကပြောသည်။

ပြီးခဲ့သည့် ဇန်နဝါရီလ စတွင်လည်း သျှမ်း-ကရင်နီ နယ်စပ်တကြော တိုက်ပွဲများ စစ်ကောင်စီမှ လက်နက်ကြီးပစ်ခက်မှုကြောင့် လွိုင်လင်လေးမြို့နှင့် အနီးတဝိုက် ကျေးရွာမှ သံဃာတော်များ ပိန်းချဉ်ကျေးရွာသို့ စစ်ဘေး‌ရှောင်လာခဲ့ကြောင်း သိရသည်။

သျှမ်းပြည် ဆီဆိုင်မြို့နယ်တွင် ပအိုဝ်းအမျိုးသားလွတ်မြောက်ရေး တပ်မတော် ( PNLO/PNLA) ၊ KNDF၊ PDF ပူးပေါင်းတပ်ဖွဲ့နှင့် PNO ၊ စစ်ကောင်စီ ပူးပေါင်တပ်ဖွဲ့များသည် ဇန်နဝါရီလ ၂၄ ရက်တွင် တိုက်ပွဲ ပြင်းထန်စွာဖြစ်ပွားခဲ့ပြီး မြို့ခံအပါအဝင် ကရင်နီစစ်ရှောင်များ ထပ်မံ ထွက်ပြေးတိမ်းရှောင်နေရကြောင်း သိရသည်။

ကရင်နီစစ်ရှောင်များသည် စစ်ဘေးဒဏ်ကို ထပ်ဆင့်ခံစားရ၍ နောက်ထပ်စစ်ရှောင်ရလျှင် နေစရာ အခက်အခဲများစွာ ရှိနိုင်ကြောင်း စစ်ရှောင်များက ပြောသည်။